ତେଲ୍ ଆଭିଭ୍/ବିରୁଟ୍ ୦୧/୧୦: ଇସ୍ରାଏଲ୍-ହିଜ୍ବୁଲ୍ଲା ଯୁଦ୍ଧ ତୀବ୍ର ହେବାରେ ଲାଗିଛି । ସ୍ଥଳଭାଗରୁ ହମ୍ଲା ପାଇଁ ଇସ୍ରାଏଲ୍ ଏହାର ସେନା ଓ ଟ୍ୟାଙ୍କ୍ ମୁତୟନ କରିଥିବା ବେଳେ ହିଜ୍ବୁଲ୍ଲା ମଧ୍ୟ ପଛକୁ ହଟିବାକୁ ଚାହୁଁନାହିଁ । ମୁଖିଆ ହସନ୍ ନସ୍ରଲ୍ଲାହର ମୃତ୍ୟୁରେ ଆତଙ୍କୀ ସଙ୍ଗଠନ ଭୟଭୀତ ହୋଇଯାଇ ନାହିଁ । ଇସ୍ରାଏଲ୍ର ସବୁ ପ୍ରକାର ପ୍ରହାରକୁ ସାମ୍ନା କରି ଜବାବ ଦେବା ଲାଗି ବଳ ଜୁଟାଉଛି ହିଜ୍ବୁଲ୍ଲା । ଏଭଳି ସ୍ଥିତିରେ ଇସ୍ରାଏଲ୍ର ଏୟାର ଷ୍ଟ୍ରାଇକ୍ ଜାରି ରହିଛି । ଲେବାନନ୍ରେ ପୁଣି ୪୫ ଜଣ ପ୍ରାଣ ହରାଇଥିବା ବେଳେ ୭୫ ଆହତ ହୋଇଛନ୍ତି ।
ହିଜ୍ବୁଲ୍ଲା ମୁଖ୍ୟ ନସ୍ରଲ୍ଲାହର ମୃତ୍ୟୁ ପରେ ପ୍ରଥମ ଥର ପାଇଁ ଏହାର ଉପମୁଖ୍ୟ ନଇମ୍ କାସିମ୍ ଲେବାନନ୍ର ଜନତାଙ୍କୁ ସମ୍ବୋଧନ କରିଛି। ଇସ୍ରାଏଲ୍ ଏବେ ନରସଂହାର ଚଳାଇଥିବା ସେ ଅଭିଯୋଗ କରିଛି । କାସିମ୍ ଆହୁରି କହିଛି ଯେ ଯଦି ଲେବାନନ୍ରେ ଇସ୍ରାଏଲ୍ ସେନା ଅନୁପ୍ରବେଶ କରେ, ତେବେ ଆମ ଯୋଦ୍ଧାମାନେ ଲଢ଼ିବାକୁ ପ୍ରସ୍ତୁତ । ନସ୍ରଲ୍ଲାହଙ୍କ ମୃତ୍ୟୁ ପରେ ବି ଆମ ଯୋଜନାରେ କୌଣସି ପରିବର୍ତ୍ତନ କରାଯାଇ ନାହିଁ । ଲେବାନନ୍ର କାମଚଳା ପ୍ରଧାନମନ୍ତ୍ରୀ ନାଜିବ ମିକାତି ଦକ୍ଷିଣରେ ସେନା ମୁତୟନ ଲାଗି ପ୍ରସ୍ତୁତି ଚଳାଇଛନ୍ତି । ୨୦୦୬ର ୟୁଏନ୍ଏସ୍ସି ସଂକଳ୍ପ ୧୭୦୧କୁ ସମ୍ପୂର୍ଣ୍ଣ ଲାଗୁ ପାଇଁ ସରକାର ପ୍ରସ୍ତୁତ ବୋଲି ସେ କହିଛନ୍ତି ।
ଇସ୍ରାଏଲ୍ର ପ୍ରତିରକ୍ଷା ମନ୍ତ୍ରୀ ୟୋଆବ୍ ଗ୍ୟାଲେଣ୍ଟ ନିଜ ସେନାକୁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦେଇଛନ୍ତି । କହିଛନ୍ତି, ହିଜ୍ବୁଲ୍ଲା ମୁଖ୍ୟ ନସ୍ରଲ୍ଲାହକୁ ନିପାତ କରାଯିବା ଏକ ବହୁତ ବଡ଼ ଉପଲବ୍ଧି । ଆତଙ୍କୀ ସଙ୍ଗଠନର ଅନେକ ନେତାଙ୍କୁ ବି ନିପାତ କରାଗଲାଣି । କିନ୍ତୁ ଏହା ଯଥେଷ୍ଟ ନୁହେଁ । ଏଣିକି ଆମକୁ ଆହୁରି ସଶକ୍ତ ହେବାକୁ ପଡ଼ିବ । ଆମ ପାଖରେ ଯେଉଁସବୁ କ୍ଷମତା ରହିଛି, ତାହାକୁ ସମ୍ପୂର୍ଣ୍ଣ ବ୍ୟବହାର କରାଯିବ । ଲେବାନନ୍ର ସ୍ଥଳଭାଗରେ ପଶିବା ପୂର୍ବରୁ ଇସ୍ରାଏଲୀ ସେନା ରିହର୍ସାଲ୍ କରିଥିବା ଜଣାପଡ଼ିଛି । ଉଭୟ ପକ୍ଷ ମଧ୍ୟରେ ସାମ୍ନାସାମ୍ନି ଲଢ଼େଇ ହେବାକୁ ଥିବାରୁ ଫ୍ଲାଏଦୁବାଇ ଅକ୍ଟୋବର ୩ ପର୍ଯ୍ୟନ୍ତ ବିରୁଟ୍କୁ ଏହାର ବିମାନ ଉଡ଼ାଣ ବାତିଲ କରିଦେଇଛି ।
ଲେବାନନ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଦେଶର ପଶ୍ଚିମ ବେକାସ୍ଥିତ ସାହମାର୍ରେ ଥିବା ବେସାମରିକ ପ୍ରତିରକ୍ଷା କେନ୍ଦ୍ର ଉପରେ ଇସ୍ରାଏଲ୍ ଆକ୍ରମଣ କରିବା ଯୋଗୁ ୬ ଜଣ ସ୍ୱାସ୍ଥ୍ୟକର୍ମୀ ପ୍ରାଣ ହରାଇଥିବା ବେଳେ ୪ ଜଣ ଆହତ ହୋଇଛନ୍ତି । ଦିନକ ପୂର୍ବରୁ ଅର୍ଥାତ୍ ରବିବାର ୧୪ ପାରାମେଡିକ୍ସ ପ୍ରାଣ ହରାଇଥିଲେ । ଦକ୍ଷିଣ ଲେବାନନ୍ର ୱାଜାନିଠାରେ ଏକ ଚେକ୍ ପଏଣ୍ଟ ଉପରେ ଇସ୍ରାଏଲ୍ ଡ୍ରୋନ୍ ଆକ୍ରମଣ କରିବାରୁ ଦେଶର ଜଣେ ସୈନ୍ୟ ପ୍ରାଣ ହରାଇଛନ୍ତି ।
ଲେବାନନ୍ରେ ସ୍ଥିତି ଅଣାୟତ୍ତ ହେଉଥିବାରୁ ୟୁରୋପୀୟ ସଂଘ ରାଷ୍ଟ୍ରଗୁଡ଼ିକର ବିଦେଶ ମନ୍ତ୍ରୀମାନେ ଆଜି ଜରୁରି ବୈଠକ କରିଛନ୍ତି । ସଂଘର ବିଦେଶ ନୀତି ମୁଖ୍ୟ ଯୋଶେପ ବୋରେଲ୍ ଅପରାହ୍ନ ୩ଟାରେ ଭିଡିଓ କନ୍ଫରେନ୍ସରେ ସମସ୍ତଙ୍କ ସହ ଆଲୋଚନା କରିଛନ୍ତି । ନସ୍ରଲ୍ଲାହକୁ ନିପାତ କରାଯିବା ଉଚିତ ଥିଲା ବୋଲି ଜର୍ମାନୀର ବିଦେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଅନ୍ୟପକ୍ଷରେ ଇସ୍ରାଏଲ୍ ବିରୋଧରେ ଲଢ଼ିବା ପାଇଁ ଇରାନ୍ ଏହାର ସେନା ଲେବାନନ୍କୁ ପଠାଇବ ନାହିଁ ବୋଲି ସ୍ପଷ୍ଟ କରିଦେଇଛି।
