ଫିରିଙ୍ଗିଆ, ୨୪/୭ : ମା’ ରୋଗୀଣା, ଝିଅ  ଦିବ୍ୟାଙ୍ଗ। ତଥାପି ମିଳୁନି ସରକାରୀ ସହାୟତା ।  ଝିଅକୁ ମିଳୁନି ଦିବ୍ୟାଙ୍ଗ ଭତ୍ତା।  ମା’ ଓ ଝିଅ ଅସହାୟ ଅବସ୍ଥାରେ ଜୀବନ ବିତାଉଛନ୍ତି। କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ସୁମେରୁ ବନ୍ଧ ପଞ୍ଚାୟତର ଡମାଙ୍ଗ ପଦର ଗାଁରେ ଏହା ଦେଖିବାକୁ ମିଳୁଛି। 

କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ସୁମେରୁ ବନ୍ଧ ପଞ୍ଚାୟତର ଡମାଙ୍ଗ ପଦର ଗାଁରେ ରହୁଛନ୍ତି  ତପି ଦିଗାଲ , ଝିଅ ଅମୂଲ୍ୟା ଦିଗାଲ ଓ  ସାନ ପୁଅ। ବାପା ମନୋରଞ୍ଜନ ଦିଗାଲ ଦଶ ବର୍ଷ ପୂର୍ବରୁ ଘର ଛାଡି କେଉଁ ଆଡେ ଚାଲି ଯାଇଛନ୍ତି l ମା’ ତପି ଦିଗାଲ ବର୍ତ୍ତମାନ ରୋଗୀଣା ଓ ଅସହାୟ ଅବସ୍ଥାରେ ଠିକରେ ଚାଲି ବି ପାରୁ ନାହାନ୍ତି l ପରିବାରରେ ତପି ଦିଗାଲ ନିଜର ୧୯ ବର୍ଷର ଭିନ୍ନକ୍ଷମ ଝିଅ ଏବଂ ସାନ ପୁଅକୁ ଧରି ବହୁ କଷ୍ଟରେ ଚଳୁଛନ୍ତି l ଅମୂଲ୍ୟା ଛୋଟ ବେଳେ ଭଲ ଥିବା ବେଳେ ଆଖିକୁ ଦେଖାଯାଉଥିଲା।  କିନ୍ତୁ ୨ ରୁ ୩ ବର୍ଷ ବୟସରେ ଆଖି ଖରାପ ହେବାରୁ ପରିବାର ଲୋକେ ବିଭିନ୍ନ ମେଡିକାଲରେ ଦେଖାଇ ଥିଲେ ମଧ୍ୟ ଭଲ ହେଲା ନାହିଁ ।  ଆଖି ୨ ଟିକୁ ଠିକ୍ ଭାବେ ଦେଖାଯାଉ ନାହିଁ।  ବର୍ତ୍ତମାନ ୧୯ ବର୍ଷ ହୋଇଥିଲେ ମଧ୍ୟ ଅମୂଲ୍ୟାକୁ କୌଣସି ଭିନ୍ନକ୍ଷମ ପ୍ରମାଣ ପତ୍ର  ମିଳି ନଥିବାରୁ ସରକାରଙ୍କ କୌଣସି ସୁବିଧା ପାଇ ପାରୁ ନାହାନ୍ତି l ବର୍ତ୍ତମାନ ପରିବାରରେ କେବଳ ମା’ ତପି ଦିଗାଲଙ୍କୁ ସରକାରଙ୍କ ତରଫରୁ ୫ କିଲୋ ଚାଉଳ ମିଳୁଛି।  କିନ୍ତୁ ଭିନ୍ନକ୍ଷମ ଝିଅ କିମ୍ବା ପୁଅକୁ ଚାଉଳ ମିଳୁ ନାହିଁ  । ପୁଅ ଝିଅର କୌଣସି କାଗଜ ପତ୍ର ମଧ୍ୟ ହୋଇ ପାରି ନାହିଁ l ପୂର୍ବରୁ ୩୫ ହଜାର ଟଙ୍କାର ଆବାସ ଗୃହ ମନୋରଞ୍ଜନଙ୍କ ନାମରେ ଆସିଥିବା ବେଳେ ବର୍ତ୍ତମାନ ଏହା ଭାଙ୍ଗିରୁଜି ଗଲାଣି । କୌଣସି ରୋଜଗାର ନଥିବାରୁ ୧୩ ବର୍ଷର ପୁଅ ମୁଲ ଲାଗି ପରିବାର ଚଳାଉଛି।  ଭିନ୍ନକ୍ଷମ ଭତ୍ତା, ଚାଉଳ ଓ ରହିବା ପାଇଁ ଆବାସ ଗୃହ ଖଣ୍ଡିଏ ଯୋଗାଇ ଦେବାକୁ ଅସହାୟ ପରିବାର ନିବେଦନ କରିଛନ୍ତି।  ଏ ନେଇ  ପଞ୍ଚାୟତ ନିର୍ବାହୀ ଅଧିକାରୀ ସୁନୀଲ କୁମାର ପାତ୍ରଙ୍କୁ ପଚାରିବାରୁ ତୁରନ୍ତ ସମସ୍ତ ବ୍ୟବସ୍ଥା କିଭଳି ହୋଇ ପାରିବ ଚେଷ୍ଟା କରାଯିବ ବୋଲି କହିଛନ୍ତି l