ଭୁବନେଶ୍ୱର,୦୫/୦୫: ବୌଦ୍ଧ ଜିଲ୍ଲା ବାଉଁଶୁଣି ଥାନା ବାଉଁଶୁଣି କଲେଜ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ବାଇକ୍କୁ ଧକ୍କା ଦେଲା ପିକଅପ୍ ଭ୍ୟାନ। ଦୁର୍ଘଟଣାରେ ବାପାଙ୍କ ମୃତ୍ୟୁ ହୋଇଥିବା ବେଳେ ପୁଅ ଗୁରୁତର ହୋଇଛନ୍ତି । ଦୁର୍ଘଟଣା ଘଟାଇ ଫେରାର ମାରିଲା ଡ୍ରାଇଭର । ମୃତକ ବାପା ଗୋଚ୍ଛାପଡ଼ା ଗ୍ରାମର ମଛିନ୍ଦ୍ର ମେହେର ଏବଂ ଗୁରୁତର ପୁଅ ଦର୍ଶନ ମେହେର ବୋଲ ଜଣାପଡ଼ିଛି । ଉତ୍ୟକ୍ତ ଲୋକେ କଲେଜ୍ ଛକ ନିକଟରେ ୫୭ ନମ୍ୱର ଜାତୀୟ ରାଜପଥ ଅବରୋଧ କରିଥିବା ବେଳେ SDPO ଓ ତହସିଲଦାର ପହଞ୍ଚି ବୁଝାସୁଝା କରିବା ପରେ ହଟିଲା ରାସ୍ତାରୋକ ।
ସୂଚନା ମୁତାବକ, ଗୁଛାପଡା ଗ୍ରାମର ବାପା ପୁଅ ମଛିନ୍ଦ୍ର ମେହେର ଏବଂ ଦର୍ଶନ ମେହେର ଉଭୟ ଏକ ବାଇକ୍ ଯୋଗେ ବୌଦ୍ଧ ପଟରୁ ସୋନପୁର ଅଭିମୁଖେ ଯାଉଥିବା ବେଳେ ପଛରୁ ବାଇକ୍କୁ ଧକ୍କା ଦେଇଥିଲା ପିକଅପ୍ ଭ୍ୟାନ । ଫଳରେ ଘଟଣା ସ୍ଥଳରେ ପୁଅ ସମ୍ମୁଖରେ ବାପାଙ୍କ ଜୀବନ ଚାଲି ଯାଇଥିବା ବେଳେ ପୁଅ ଗୁରୁତର ହୋଇଛନ୍ତି । ଘଟଣା ସ୍ଥଳରେ ଉତ୍ୟକ୍ତ ଲୋକେ ୫୭ ନମ୍ୱର ଜାତୀୟ ରାଜପଥ ଅବରୋଧ କରିଥିଲେ । ଖବର ପାଇ ବୌଦ୍ଧ ତହସିଲଦାର ଅନିତା ସାହୁ, SDPO ଲାରେନ୍ ରାଉତରାୟ ଏବଂ ଥାନା ଅଧିକାରୀ ସାରଦା ପ୍ରସନ୍ନ ଦାସ ଘଟଣା ସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହିତ ରେଡକ୍ରସ୍ ପାଣ୍ଠିରୁ ୧୦ ହଜାର ଟଙ୍କା ଦେଇଛନ୍ତି । ଏହା ସହ ସମସ୍ତ ସରକାରୀ ସାହାଯ୍ୟ ସହଯୋଗ ଯୋଗାଇ ଦେବାକୁ ପ୍ରତିଶଶ୍ରୁତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିବା ଜଣାପଡିଛି। ମୃତକଙ୍କୁ ମହାପ୍ରୟାଣ ଗାଡ଼ିରେ ଶବ ବ୍ୟବଚ୍ଛେଦ ପାଇଁ ବୌଦ୍ଧ ପଠାଇଥିବା ବେଳେ ଗୁରୁତରଙ୍କୁ ଆମ୍ବୁଲାନ୍ସ ଯୋଗେ ବୌଦ୍ଧ ମେଡିକାଲରେ ଆଣି ଭର୍ତ୍ତି କରାଯାଇଛି ।
