ପୁରୀ,୨୭/୦୪: ଚନ୍ଦନପୁର ଥାନା ପୁଲିସ ଦୁଇ ଜଣ ସନ୍ଦିଗ୍ଧଙ୍କ ଉଠାଇ ନେଇଛି । ଶନିବାର ରାତିରେ ବାଲିପାଟଣା ତଣ୍ଡିକେରା ଛକ ଠାରେ ସ୍ଥାନୀୟ ଲୋକଙ୍କ ଦ୍ୱାରା ଅଟକ ଥିବା ୨ ଜଣ ସନ୍ଦିଗ୍ଧ ଯୁବକଙ୍କୁ ନେଇ ଥାନାରେ ପଚରା ଉଚରା କରୁଛି ପୁଲିସ ।
ମିଳିଥିବା ଖବର ଅନୁସାରେ ସନ୍ଧ୍ୟାରେ କିଛି ଛୋଟପିଲା ଯଜ୍ଞ କାର୍ଯ୍ୟ ପାଇଁ ଛକରେ ବାଟୋଇଙ୍କ ଠାରୁ ଦାନ ଅର୍ଥ ସଂଗ୍ରହ କରୁଥିଲେ । ଏହି ୨ ଅଣଓଡ଼ିଆ ଯୁବକ ଏହି ପିଲାମାନଙ୍କୁ ଗାଳିଗୁଲଜ କରି ଧମକ ଦେଉଥିବା ଅଭିଯୋଗ ହୋଇଛି । ଲୋକେ ଉଭୟଙ୍କୁ ଧରି ପଚରା ଉଚରା କରିଥିଲେ । ସେମାନେ ସଂଖ୍ୟାଲଘୁ ସମ୍ପ୍ରଦାୟର ବୋଲି ପରିଚୟ ଦେଇଥିଲେ । ତେବେ ଛୋଟ ପିଲାଙ୍କୁ ଧମକ ଦେବା କାରଣ ପଚାରିବାରୁ ଦୁହେଁ କୌଣସି ସନ୍ତୋଷଜନକ ଉତ୍ତର ଦେଇଥିଲେ । ଉତ୍ତେଜନା ପ୍ରକାଶ ପାଇବାରୁ ସେମାନେ ହିନ୍ଦୁ ଧର୍ମର ବ୍ୟକ୍ତିବିଶେଷ ବୋଲି କହିଥିଲେ। କଥାରେ ତାଳମେଳ ରହୁନଥିବା କାରଣରୁ ସେମାନଙ୍କ ଉପରେ ଲୋକଙ୍କ ସନ୍ଦେହ ବଢ଼ିଥିଲା । ଏହାପରେ ଲୋକେ ପୁଲିସକୁ ଖବର ଦେଇଥିଲେ । ପରେ ପୁଲିସ ପହଞ୍ଚି ୨ ଜଣଙ୍କୁ ଥାନାକୁ ନେଇଥିଲା । ତେବେ ଉଭୟଙ୍କ ଭାଷା ବୁଝାପଡ଼ୁନଥିବାବେଳେ ମାନସିକ ବିକାରଗ୍ରସ୍ତଙ୍କ ଭଳି ଆଚରଣ ପ୍ରଦର୍ଶନ କରୁଥିବା କହିଛନ୍ତି ଆଇଆଇସି ଭୁବନମୋହନ ସାମନ୍ତରାୟ । ସେମାନଙ୍କୁ ଚନ୍ଦନପୁର ସ୍ଥିତ ମାନସିକ ବିକାରଗ୍ରସ୍ତଙ୍କ ପାଇଁ ଥିବା ସେଲ୍ଟର୍ ହୋମ୍ରେ ଛଡ଼ା ଯାଇଥିବା ସେ କହିଛନ୍ତି ।
