ନୂଆଦିଲ୍ଲୀ: ମହାକୁମ୍ଭ ମେଳାକୁ ନେଇ ଯୋଗୀ ସରକାରଙ୍କୁ ଟାର୍ଗେଟ କରିଛନ୍ତି ସମାଜବାଦୀ ପ୍ରମୁଖ ଅଖିଳେଶ ଯାଦବ। ଏହି ସମୟରେ ସେ ମହାକୁମ୍ଭ ମେଳାର ଆୟୋଜନ ଉପରେ ପ୍ରଶ୍ନ ଛିଡା କରିଛନ୍ତି ଏବଂ ରାଜ୍ୟର ବିଜେପି ସରକାରଙ୍କ ଠାରୁ ଏହାର ଉତ୍ତର ଲୋଡିଛନ୍ତି । ଅଖିଳେଶ ଅଭିଯୋଗ କରିଛନ୍ତି ଯେ, ପାଖାପାଖି ୧ ହଜାର ହିନ୍ଦୁ ପ୍ରୟାଗରାଜର ଏହି ଧାର୍ମିକ ମେଳାରୁ ନିଖୋଜ ଅଛନ୍ତି ଏବଂ ବର୍ତ୍ତମାନ ସୁଦ୍ଧା ଉତ୍ତରପ୍ରଦେଶ ସରକାର ସେମାନଙ୍କୁ ଚିହ୍ନଟ କରିବାରେ ବିଫଳ ହୋଇଛନ୍ତି।
ବୁଧବାର ଅଖିଳେଶ ରାଜ୍ୟର ଯୋଗୀ ସରକାରଙ୍କୁ ସମାଲୋଚନା କରି କହିଛନ୍ତି କି, ଏହା ଆମର ସୌଭାଗ୍ୟ ଯେ, ଆମେ ମହାକୁମ୍ଭକୁ ମନେ ରଖିଛନ୍ତି । ଆଉ ଏହା ପରେ ଗୋଟିଏ ପରେ ଗୋଟିଏ କୁମ୍ଭ ମଧ୍ୟ ଆସିବ। ତେବେ ଏସବୁ ଭିତରେ ସବୁଠୁ ବଡ ପ୍ରଶ୍ନ ହେଉଛି ଯେ,ଏତେ ବଡ ମହାକୁମ୍ଭର ଆୟୋଜନ ପାଇଁ ଭାରତ ସରକାର କେତେ ଟଙ୍କା ବ୍ୟୟବରାଦ କରିଥିଲେ ?
ଅଖିଳେଶ ବିଜେପି ସରକାରଙ୍କୁ କହିଛନ୍ତି ଯେ, ଯେଉଁ ଶ୍ରଦ୍ଧାଳୁ ମାନେ ଏଠାରୁ ନିଖୋଜ ରହିଛନ୍ତି ସେମାନଙ୍କ ପରିବାରକୁ ଅନ୍ତତଃ ସହଯୋଗ କରାଯାଉ । ବର୍ତ୍ତମାନ ସୁଦ୍ଧା ପ୍ରାୟତଃ ୧୦୦୦ ହିନ୍ଦୁ ଏଠାରୁ ନିଖୋଜ ରହିଛନ୍ତି । ରାଜ୍ୟ ସରକାର ଏମାନଙ୍କ ସୂଚନା ରଖନ୍ତୁ ଏବଂ ସେମାନଙ୍କ ପରିବାରକୁ ଦିଅନ୍ତୁ । ଏହି ନିଖୋଜ ମାନଙ୍କ ପୋଷ୍ଟର ଏବେ ଏଠାକାର କାନ୍ଥବାଡରେ ଲାଗୁଛି । ତେବେ ବିଜେପି ସରକାର ଏହି ପୋଷ୍ଟର ଗୁଡିକୁ ଲିଭାଇବାକୁ ଚେଷ୍ଟା କରୁଛନ୍ତି। ସରକାର ଏମାନଙ୍କୁ ଖୋଜି ବାହାର କରିବାକୁ ଚେଷ୍ଟା କରନ୍ତୁ ବୋଲି ଅଖିଳେଶ କହିଛନ୍ତି। ଏଥି ସହ ଅଖିଳେଶ ଏହାର ଭିଡ ନିୟନ୍ତ୍ରଣ ଉପରେ ମଧ୍ୟ ପରିଚାଳନା କମିଟିକୁ ସମାଲୋଚନା କରିଛନ୍ତି, ଯେଉଁଥିରେ ବରିଷ୍ଠ ଅଧିକାରୀ ଏବଂ ପୋଲିସ ମଧ୍ୟ ରହିଛନ୍ତି।
ତେବେ ଅଖିଳେଶଙ୍କ ଏହି ସମାଲୋଚନା ଏଭଳି ସମୟରେ ଆସିଛି, ଯେତେବେଳେ କି ନିକଟରେ ପିଏମ ମୋଦୀ ମହାକୁମ୍ଭର ସଫଳ ଆୟୋଜନ ଏବଂ ସମାପନ ପାଇଁ ଯୋଗୀ ସରକାର, ବିଭିନ୍ନ ସଂଗଠନ ଏବଂ ଉତ୍ତରପ୍ରଦେଶବାସୀଙ୍କୁ ପ୍ରଶଂସା କରିଛନ୍ତି । ଏହା ଏକ ଐତିହାସିକ ସମୟ ଥିଲା, ଯାହାକି ସ୍ବାମୀ ବିବେକାନନ୍ଦଙ୍କ ଆମେକରିକାର ଚିକାଗୋରେ ସମ୍ବୋଧନ ଏବଂ ଦାଣ୍ଡି ଅଭିଯାନ ଭଳି ଜନସମାଗମ ଭଳି ଥିଲା ବୋଲି ମୋଦି କହିଛନ୍ତି । ଏହା ଭାରତୀୟ ଯାତ୍ରା ପାଇଁ ଏକ ମାଇଲ୍ଷ୍ଟୋନ୍ ବୋଲି ସେ କହିଥିଲେ ।
