ଖଲ୍ଲିକୋଟ,୦୯/୦୬: ବିଳମ୍ବରେ ପହଞ୍ଚିବା ଅଭିଯୋଗ କରି ୧୦୮ ଆମ୍ବୁଲାନ୍ସ ଡ୍ରାଇଭରଙ୍କୁ ୨ ଜଣ ଯୁବକ ଆକ୍ରମଣ କରିଥିବା ନେଇ ଖଲ୍ଲିକୋଟ ଥାନାରେ ଅଭିଯୋଗ ହୋଇଛି । ଆକ୍ରମଣ କରିବା ସହ ୧୦୮ ଗାଡ଼ିର ଚାବି ନେଇ ଦୁଇ ଯୁବକ ଫିଙ୍ଗି ଦେଇଥିବା ମଧ୍ୟ ଅଭିଯୋଗ ହୋଇଛି ।
ଖଲ୍ଲିକୋଟ ଥାନାରେ ହୋଇଥିବା ଅଭିଯୋଗରୁ ଜଣାପଡ଼ିଛି ଯେ, ରବିବାର ବିଳମ୍ବିତ ରାତିରେ ଖଲ୍ଲିକୋଟରୁ ବ୍ରହ୍ମପୁର ରୋଗୀ ନେଇ ଯାଇଥିଲେ ୧୦୮ ଆମ୍ବୁଲାନ୍ସର ଡ୍ରାଇଭର ସୁୟାଂଶୁ ବେହେରା । ଫେରିବା ବେଳେ ଛତ୍ରପୁର ନିକଟରେ ହୋଇଥିବା ବେଳେ ଆଉ ଏକ ରୋଗୀକୁ ଖଲ୍ଲିକୋଟ ମେଡିକାଲରୁ ବ୍ରହ୍ମପୁର ନେବା ପାଇଁ ଫୋନ ଆସିଥିଲା । ଛତ୍ରପୁରରେ ହୋଇଛି ଖଲ୍ଲିକୋଟରେ ପହଞ୍ଚିବା ପାଇଁ କିଛି ସମୟ ଲାଗିବ, ଅପେକ୍ଷା କରନ୍ତୁ ବୋଲି ଡ୍ରାଇଭର ସୁୟାଂଶୁ କହିଥିଲେ। ତାପରେ କିଛି ସମୟ ମଧ୍ୟରେ ସେ ଖଲ୍ଲିକୋଟ ମେଡିକାଲରେ ପହଞ୍ଚିଥିଲେ। ତେବେ ଏତେ ସମୟ କାହିଁକି ଲାଗିଲା ବୋଲି କହି ୨ଜଣ ଯୁବକ ଗାଡ଼ିରୁ ଭିଡ଼ି ନେଇ ସୁୟାଂଶୁଙ୍କୁ ମାଡ଼ ମାରିଥିଲେ । ଏହା ସହ ଗାଡ଼ିରେ ଗୁରୁତର ରୋଗୀ ରହିଥିବା ବେଳେ ଗାଡ଼ିରୁ ଚାବି ନେଇ ଫିଙ୍ଗି ଦେଇଥିଲେ ।
ଏନେଇ ସୋମବାର ଖଲ୍ଲିକୋଟରେ କାର୍ଯ୍ୟରତ ଥିବା ୧୦୮ ଆମ୍ବୁଲାନ୍ସ ସଂଘର କର୍ମଚାରୀମାନେ ଖଲ୍ଲିକୋଟ ଥାନାରେ ପହଞ୍ଚି ଲିଖିତ ଅଭିଯୋଗ କରିଛନ୍ତି । ତେବେ ଥାନାରେ ଏତଲା ନ ଦେବାକୁ ମଧ୍ୟ ଆକ୍ରମଣ କରିଥିବା ଯୁବକ ମାନେ ଧମକ ଦେଇଥିବା ୧୦୮ କର୍ମଚାରୀ କହିଛନ୍ତି ।
