ବାଙ୍କୀ/ଡମପଡ଼ା, ୩୧/୩(ଆପ୍ର): କଟକ ଜିଲ୍ଲା ବାଙ୍କୀ ଥାନା ତାଳବସ୍ତ ପାଣ୍ଡି ଅନ୍ତର୍ଗତ ବନହରା ଆଦିବାସୀ ସାହିରେ କାଜୁ ବଗିଚା ନିଲାମକୁ ନେଇ ଗୋଷ୍ଠୀ ସଂଘର୍ଷ ଘଟିଛି। ଏହି ଘଟଣାରେ ୧୨ଜଣ ଆହତ ହୋଇଛନ୍ତି। ଉତ୍ତ୍ୟକ୍ତ ଲୋକ ଜଣେ ବ୍ୟକ୍ତିଙ୍କ ଘରେ ନିଆଁ ଲଗାଇ ଦେଇଥିବାରୁ ୪ ବଖରା ଘର ପୋଡି ପାଉଁଶ ହୋଇଯାଇଛି। ରବିବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ବେଳେ ପୁଲିସ ୫ ଜଣଙ୍କୁ ଗିରଫ କରିଥିବା ବେଳେ ୨ ଜଣଙ୍କୁ ଅଟକ ରଖିଛି।
ସୂଚନା ମୁତାବକ, ତାଳବସ୍ତ ଫାଣ୍ଡି ଅନ୍ତର୍ଗତ ବନହରା ଆଦିବାସୀ ସାହି ନିକଟରେ ରହିଛି ଏକ କାଜୁ ଜଙ୍ଗଲ। ପ୍ରତିବର୍ଷ ଉପରସାହିର ଲୋକେ ଏହାକୁ ଜବରଦଖଲ କରି ଆସୁଥିବା ବେଳେ ଚଳିତ ବର୍ଷ ତଳସାହିର ଲୋକେ ଏହାକୁ ବିରୋଧ କରିଥିଲେ। କାଜୁ ଜଙ୍ଗଲଟି ଗ୍ରାମର ସମୂହ ସମ୍ପତ୍ତି ହୋଇଥିବାରୁ ଏହାର ଲାଭାଂଶ ଗାଁ ପାଣ୍ଠିରେ ଜମା ହେଉ ବୋଲି ଗୋଟିଏ ପକ୍ଷ ଦାବି କରିଥିଲା ତେବେ ଏହି କଥାରୁ ହିଁ ବିବାଦ ଆରମ୍ଭ ହୋଇଯାଇଥିଲା। ଏନେଇ ଦୁଇରୁ ତିନିଦିନ ଧରି ଗାଁରେ ବିବାଦ ଲାଗି ରହିଥିଲା।
ତେବେ ରବିବାର ରାତିରେ ଗାଁର ଜଣେ ବ୍ୟକ୍ତିଙ୍କ ଦଶାହ କାର୍ଯ୍ୟ ଚାଲିଥିବା ବେଳେ ଦୁଇଗୋଷ୍ଠୀ ମଧ୍ୟରେ ବିବାଦ ହୋଇଥିଲା। ପରେ କିଛି ଅସାମାଜିକ ଲୋକ ବିଳମ୍ବିତ ରାତିରେ ଗ୍ରାମର ବିପିନ ପ୍ରଧାନଙ୍କ ଘରେ ନିଆଁ ଲଗାଇ ଦେଇଥିଲେ। ଏଥିରେ ବିପିନଙ୍କ ଲକ୍ଷାଧିକ ଟଙ୍କାର ଆସବାବପତ୍ର ସମେତ ୪ ବଖରା ଘର ପୋଡି ପାଉଁଶ ହୋଇଯାଇଛି। ଏହି ଘଟଣାକୁ ନେଇ ବିବାଦ ଉଗ୍ରରୂପ ଧାରଣ କରିଥିଲା। ଉଭୟ ଗୋଷ୍ଠୀଙ୍କ ମଧ୍ୟରେ କଥା କଟାକଟି ପରେ ହାତାହାତି ସହ ପରସ୍ପରକୁ ମାରଣାସ୍ତ୍ରରେ ଆକ୍ରମଣ ଯାଏ କଥା ଯାଇଥିଲା। ଗୋଷ୍ଠୀ ସଂଘର୍ଷରେ ଉଭୟ ପକ୍ଷର ୧୨ଜଣ ଆହତ ହୋଇ ବାଙ୍କୀ ଡମପଡ଼ା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଛନ୍ତି।
