ରିଆମାଳ,୧୩/୧୧: ରିଆମାଳ ବ୍ଲକ କୁଣ୍ଢେଇଗୋଳା ରେଞ୍ଜ ଖଇରପାଲି କେନ୍ଦୁଲିପ ଗୋଦାମରୁ ଗତ ୩ ତାରିଖ ରାତି ବନ୍ଧୁକ ମୁନରେ ଲକ୍ଷାଧିକ ଟଙ୍କାର କେନ୍ଦୁପତ୍ର ଲୁଟ ଘଟଣା । ୧୩ ଜଣିଆ ଲୁଟେରା ଗ୍ୟାଙ୍ଗକୁ ଠାବ କଲା ପୋଲିସ । ଲୁଟ ହୋଇଥିବା ୪୫ ବଣ୍ଡଲ କେନ୍ଦୁପତ୍ର, ଲାପଟପ, ୩ଟି ଏମ.ଟେକ ବ୍ୟାଟ୍ରି ସମେତ ଲୁଟ ଘଟଣାରେ ବ୍ୟବହାର ହୋଇଥିବା ଏକ ଟାଟା ଏସି, ଦୁଇଟି ପିକଅପ ଭ୍ୟାନ ଏବଂ ଭୁଜାଲି ପୋଲିସ ଜବତ କରିଛି । ଏବେ ବି କୋଲକତାର ଜଣେ ଅଭିଯୁକ୍ତ ସହିତ ଅନେକ ଲୁଟେରା ଫେରାର ଥିବା ବେଳେ ଗିରଫ ହୋଇଥିବା ସମସ୍ତ ଲୁଟେରା ପୂର୍ବରୁ ମଧ୍ୟ ବିଭିନ୍ନ ଡକାୟତି ଘଟଣାରେ ସାମିଲ ଥିବା ଜଣାପଡିଛି । 

ସୂଚନା ମୁତାବକ, ନଭେମ୍ୱର ୩ ତାରିଖ ବିଳମ୍ବିତ ରାତିରେ ୧୬ ଜଣ ଲୁଟେରା ଗ୍ୟାଙ୍ଗ ଏକ ଟ୍ରକ, ଟାଟା ଏସି ଭ୍ୟାନ ଏବଂ ଏକ କାର୍‌ ଯୋଗେ ଖଇରପାଲି କେନ୍ଦୁଲିପ ଗୋଦାମକୁ ଆସିଥିଲେ । ସେଠାରେ ଥିବା କେନ୍ଦୁପତ୍ର ଶ୍ରମିକଙ୍କୁ ବନ୍ଧୁକ ଓ ଭୁଜାଲି ମୁନରେ ଭୟଭୀତ କରାଇ ହାତ ଗୋଡ ବାନ୍ଧି ଦେଇଥିଲେ । ଏଥିସହ ଲକ୍ଷାଧିକ ଟଙ୍କା ମୂଲ୍ୟର ୪୫ ବଣ୍ଡଲ କେନ୍ଦୁପତ୍ର, ଲାପଟପ୍, ୪ଟି ଏମ.ଟେକ ବ୍ୟାଟ୍ରି ନେଇ ଫେରାର ହୋଇ ଯାଇଥିଲେ । ଏନେଇ ନଭେମ୍ୱର ୪ ତାରିଖ ସକାଳୁ କୁଣ୍ଢେଇଗୋଳା ରେଞ୍ଜର ଛବିଳ ପ୍ରଧାନ ଥାନାରେ ଅଭିଯୋଗ କରିଥିଲେ । ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ଏକ ବଡ ଧରଣର ସଫଳତା ହାସଲ କରିଛି । ଏହି ଘଟଣାରେ କେବଳ ଅନୁଗୁଳ ଜିଲ୍ଲାର ୧୩ ଜଣେ ଲୁଟେରା ଗିରଫ ହୋଇଛନ୍ତି । ବୁଧବାର ଦେବଗଡ଼ ଏସପି ଅନିଲ କୁମାର ମିଶ୍ର କୁଣ୍ଢେଇଗୋଳା ଥାନାରେ ଏକ ପ୍ରେସ ମିଟ୍‌ରେ ଏହି ବିଷୟରେ ସବିଶେଷ ତଥ୍ୟ ଦେଇଛନ୍ତି l  ଉକ୍ତ ପ୍ରେସମିଟ୍‌ରେ ଥାନାଧିକାରୀ ସରସ୍ୱତୀ ଟୁଡୁ, ରେଞ୍ଜର ଛବିଳ ପ୍ରଧାନ ତଥା ଥାନା ଅଧିକାରୀ, କେନ୍ଦୁପତ୍ର ଅଧିକାରୀ ମାନେ ଉପସ୍ଥିତ ଥିଲେ l ପୋଲିସର ଏହି ସଫଳତା ପାଇଁ ଅଞ୍ଚଳରେ ଚର୍ଚ୍ଚା ଚାଲିଛି l