ନୂଆଦିଲ୍ଲୀ: ତାମିଲନାଡୁର ତ୍ରିଚିରୁ ଶାରଜାହ ଯାଉଥିବା ଏୟାର ଇଣ୍ଡିଆର ବିମାନ ସଫଳତାପୂର୍ବକ ଅବତରଣ କରିଛି । କିନ୍ତୁ ଏହା ପୂର୍ବରୁ ସାଢ଼େ ୩ ଘଣ୍ଟା ପର୍ଯ୍ୟନ୍ତ ୧୪୦ ଯାତ୍ରୀଙ୍କ ଜୀବନ ବାଜିରେ ଲାଗିଥିଲା । ଏନେଇ ଯାତ୍ରୀଙ୍କ ପାଖରେ କୌଣସି ଖବର ବି ନଥିଲା । ଯାତ୍ରୀମାନେ କେବଳ ଜାଣିଥିଲେ, ବିମାନରେ ସାମାନ୍ୟ ଯାନ୍ତ୍ରିକ ତ୍ରୁଟି ଦେଖାଦେଇଛି । ସେତେବେଳକୁ ବିମାନଟି ଅବତରଣ କରିନପାରି ଆକାଶରେ ଚକ୍କର କାଟୁଥିଲା । ତେବେ ବିମାନରେ ହାଇଡ୍ରୋଲିକ୍ ସିଷ୍ଟମ ଖରାପ ହୋଇଯାଇଥିଲା ।
ସେପଟେ ଯାତ୍ରୀଙ୍କ ସୁରକ୍ଷାକୁ ନଜରରେ ରଖି ବିମାନ ବନ୍ଦରରେ ୨୦ରୁ ଅଧିକ ଆମ୍ବୁଲାନ୍ସ ଏବଂ ଦମକଳ ଗାଡ଼ି ମୁତୟନ କରାଯାଇଥିଲା । ଏହାରି ମଧ୍ୟରେ ତ୍ରିଚିର ଜିଲ୍ଲାପାଳଙ୍କୁ ବିମାନ ବନ୍ଦର ନିର୍ଦ୍ଦେଶକ ସୂଚନା ଦେଇଥିଲେ ଯେ, ଚିନ୍ତା କରିବାର କିଛି ନାହିଁ । ବିମାନଟି ସୁରୁଖୁରୁରେ ଅବତରଣ କରିପାରିବ । ଅନ୍ୟପଟେ ପାଇଲଟ୍ ଜରୁରୀ ସ୍ଥିତି ଥିବା ନେଇ ଜଣାଇବା ପରେ ଏୟାରପୋର୍ଟରେ ହାଇଆଲର୍ଟ ଜାରି କରଗଲା ।
ଏମର୍ଜେନ୍ସି ଲ୍ୟାଣ୍ଡିଂ ଲାଗି ସବୁ ପ୍ରକାର ପ୍ରସ୍ତୁତି ଚାଲିଲା । ଏହି ଖବର ଗଣମାଧ୍ୟମରେ ଆସିବା ପରେ ଏୟାରପୋର୍ଟ ବାହାରେ ଲୋକଙ୍କ ଭିଡ଼ ଜମିଗଲା । ଲୋକେ ବିମାନର ସୁରକ୍ଷିତ ଅବତରଣ ଲାଗି ପ୍ରାର୍ଥନା କଲେ । ତ୍ରିଚି ଏୟାରପୋର୍ଟ ପାଖାପାଖି ଥିବା ବିଲ୍ଡିଂର ଛାତ ଉପରକୁ ଲୋକେ ଚଢ଼ିଯାଇ ଆକାଶରେ ବିମାନକୁ ଖୋଜିବାକୁ ଲାଗିଲେ । କିନ୍ତୁ ଯେତେବେଳେ ବିମାନଟି ସୁରକ୍ଷିତ ଅବତରଣ କଲା ଲୋକେ ତାଳି ବଜାଇ ପାଇଲଟଙ୍କୁ ଧନ୍ୟବାଦ ଜଣାଇଲେ । ତେବେ ପାଇଲଟଙ୍କ ଉପସ୍ଥିତ ବୁଦ୍ଧି ପାଇଁ ୧୪୦ ଯାତ୍ରୀଙ୍କ ଜୀବନ ବଞ୍ଚିଗଲା ।
ରିପୋର୍ଟ ଅନୁସାରେ, ଏୟାର ଇଣ୍ଡିଆ ଏକ୍ସପ୍ରେସ ବିମାନ IX 613 ତ୍ରିଚିରୁ ଆଜି ସନ୍ଧ୍ୟା ୫.୩୨ରେ ଉଡ଼ାଣ ଭରିଥିଲା । ଉଡ଼ାଣ ଭରିବା ପରେ ପରେ ବିମାନର ଲ୍ୟାଣ୍ଡିଂ ଗିୟରରେ ଥିବା ହାଇଡ୍ରୋଲିକ୍ ସିଷ୍ଟମରେ ସମସ୍ୟା ଥିବା ନେଇ ଜାଣିବାକୁ ପାଇଥିଲେ ପାଇଲଟ୍ । ଏହା ପରେ ପାଇଲଟ୍ ବିମାନଟିକୁ ଜରୁରୀ ଅବତରଣ ଲାଗି ଅନୁମତି ଲୋଡ଼ିଥିଲେ । ୩ ଘଣ୍ଟାରୁ ଅଧିକ ସମୟ ଆକାଶରେ ଚକ୍କର କାଟି ବିମାନର ଫୁଏଲ କମ୍ କରିବାକୁ ପ୍ରୟାସ କରିଥିଲେ ପାଇଲଟ । ସେପଟେ ଏୟାରପୋର୍ଟରେ ଜରୁରୀ ଅବତରଣ ଲାଗି ସମସ୍ତ ପ୍ରସ୍ତୁତି ସରିବା ପରେ ବିମାନଟି ସୁରକ୍ଷିତ ଲ୍ୟାଣ୍ଡିଂ କରିଥିଲା ।
