ନୂଆଦିଲ୍ଲୀ,୩୦/୦୮: ଖବରକାଗଜ, ନ୍ୟୁଜପେପର, ସମ୍ବାଦପତ୍ର, ପେପର । କିଏ କେତେ ନାମରେ ଜାଣେ । ରାତି ପାହିଲେ ସେ ଖୋଜା ପଡିଥାଏ । ହାତରେ ଚା' କପ ସାଙ୍ଗକୁ ସେ ଥାଏ ସାଥୀରେ । ବିଶ୍ୱରେ ଗୁରୁତ୍ୱପୂର୍ଣ୍ଣ ସୂଚନା ଏବଂ ବିକାଶ ବାବଦରେ ଜାଣିବା ପାଇଁ ଖବରକାଗଜ ସବୁଠୁ ଗୁରୁତ୍ୱପୂର୍ଣ୍ଣ ମାଧ୍ୟମ । ସମୟ କ୍ରମେ ଖବର ପରିବେଶଣର ମାଧ୍ୟମ ବଦଳୁଛି । ଡିଜିଟାଲ ଯୁଗରେ ପାଦ ଥାପୁଛି ଦୁନିଆ । ତେଣୁ ଖବର ବି  ଡିଜିଟାଲ ଜରିଆରେ ଲୋକଙ୍କ ପାଖରେ ପହଞ୍ଚାଯାଉଛି । ସୋସିଆଲ ମିଡିଆ ପ୍ଲାଟଫର୍ମ ଖବରର ପ୍ରାଥମିକ ଉତ୍ସ ପାଲଟିଛି । ଏହାକୁ ଧ୍ୟାନରେ ରଖି ଯୁକ୍ତରାଷ୍ଟର ଏକ ଗଣମାଧ୍ୟମ ସଂଗଠନ ତାର ୧୫୦ ବର୍ଷ ପୁରୁଣା ଖବରକାଗଜ ଛାପିବା ବନ୍ଦ କରିଛି । ଚଳିତବର୍ଷ ଶେଷ ସୁଦ୍ଧା ଏହି ଗଣମାଧ୍ୟମ ସମ୍ପୂର୍ଣ୍ଣ ଡିଜିଟାଲ ମଡେଲରେ ପରିବର୍ତ୍ତନ ହେବ । ତାର ପାଠକଙ୍କ ପାଖରେ ଡିଜିଟାଲି ଖବର ପହଞ୍ଚାଇବାକୁ ଯୋଜନା କରୁଛି ।

ଆଟଲାଣ୍ଟା ଜର୍ଣ୍ଣାଲ-କନଷ୍ଟିଚ୍ୟୁସନ୍ (AJC) ଗୁରୁବାର ଘୋଷଣା କରିଛି ଯେ, ଏହା ଡିସେମ୍ବର ୩୧, ୨୦୨୫ ପରେ ଏହାର ମୁଦ୍ରିତ ଖବରକାଗଜର ଛପା ବନ୍ଦ କରିବ । ୧୫୦ ବର୍ଷରୁ ଅଧିକ ସମୟ ଧରି ଜର୍ଜିଆରେ ସବୁଠାରୁ ବିଶ୍ୱସନୀୟ ସଂଗଠନ ମଧ୍ୟରୁ ଗୋଟିଏ । ଜାନୁଆରୀ ୧, ୨୦୨୬ରେ ସମ୍ପୂର୍ଣ୍ଣ ଭାବରେ ଏକ ଡିଜିଟାଲ୍ ନ୍ୟୁଜ୍ ଆଉଟଲେଟ୍‌ରେ ପରିବର୍ତ୍ତନ ହେବ । ଏଜେସି ଅନୁଯାୟୀ, ''ଏହି ପଦକ୍ଷେପ ସଂଗଠନର ଡିଜିଟାଲ୍ ପରିବର୍ତ୍ତନରେ ନିରନ୍ତର ନିବେଶକୁ ପ୍ରତିଫଳିତ କରୁଛି । କାରଣ ଏହି ସଂଗଠନ "ଏକ ମହତ୍ତ୍ୱାକାଂକ୍ଷୀ, ଦୀର୍ଘକାଳୀନ ଅଭିବୃଦ୍ଧି ରଣନୀତିକୁ ତ୍ୱରାନ୍ୱିତ କରି ଏଜେସିକୁ ଏକ ମହତ୍ତ୍ୱାକାଂକ୍ଷୀ ଦୈନିକ ଖବରକାଗଜରୁ ଏକ ଆଧୁନିକ ମିଡିଆ କମ୍ପାନୀରେ ପରିଣତ କରିବାକୁ ଚାହୁଁଛି । "

ଆଟଲାଣ୍ଟା ଜର୍ଣ୍ଣାଲ-କନଷ୍ଟିଚ୍ୟୁସନ୍‌ର ସଭାପତି ଏବଂ ପ୍ରକାଶକ ଆଣ୍ଡ୍ରୁ ମୋର୍ସ କହିଛନ୍ତି ଯେ, 'ଦ୍ରୁତ ଗତିରେ ବିକଶିତ ହେଉଥିବା ପ୍ରଯୁକ୍ତିବିଦ୍ୟା ଏବଂ ପାଠକଙ୍କ ରୁଚିକୁ ଦେଖି ଖବର ଶିଳ୍ପ ଉପରେ ପ୍ରଭାବ ପକାଉଛି । ଆମେ ଜାଣିଥିଲୁ ଯେ ଦିନେ ନା ଦିନେ ଏହି ଦିନ ଆସିବ । ଏଥିପାଇଁ ଯୋଜନା କରୁଥିଲୁ । ଆମର ପ୍ରିଣ୍ଟ ସଂସ୍କରଣ ଅପେକ୍ଷା ଆମର ଡିଜିଟାଲ୍ ପ୍ଲାଟଫର୍ମ ସହିତ ଅଧିକ ଲୋକ ଜଡିତ ଅଛନ୍ତି । ବର୍ଷ ଶେଷ ସୁଦ୍ଧା ଏକ ନୂଆ ମୋବାଇଲ୍ ଆପ୍‌ ଲଞ୍ଚ ହେବ । ଖବରକାଗଜ ସଂସ୍କରଣକୁ ପସନ୍ଦ କରୁଥିବା ପାଠକଙ୍କ ପାଇଁ ଏକ ଇଲେକ୍ଟ୍ରୋନିକ୍ ଫ୍ୟାକ୍ସିମାଇଲ୍ ସଂସ୍କରଣ ଉପଲବ୍ଧ ହେବ ।'' 

ଗତ ଦୁଇ ବର୍ଷ ମଧ୍ୟରେ, ଏଜେସି ତାର ନ୍ୟୁଜରୁମକୁ ବିସ୍ତାର ଏବଂ ଆଧୁନିକୀକରଣ କରିବା ପାଇଁ ପ୍ରୟାସକୁ ଆହୁରି ମଜବୁତ କରିଛି । ସଂଗଠନ ଏହାର ଡିଜିଟାଲ ଉତ୍ପାଦରେ ନିବେଶ କରିଛି । ଏହା ସହିତ ନ୍ୟୁଜଲେଟର, ପଡକାଷ୍ଟ ଏବଂ ମୂଳ ଭିଡିଓ ବିଷୟବସ୍ତୁ ମଧ୍ୟ ଲଞ୍ଚ କରିଛି । ଡିଜିଟାଲ ଗ୍ରାହକ ବୃଦ୍ଧି ଉପରେ ଧ୍ୟାନ ଦେଇଛି । ଏହାର ନ୍ୟୁଜ କଭରେଜ ବଢାଇବା ସହିତ  ନୂଆ ବ୍ୟୁରୋ ଖୋଲି ଆଉଟଲେଟ୍‌କୁ ଆହୁରି ବିସ୍ତାର କରିଛି ।