ଭୁବନେଶ୍ୱର, (୧୪/୧୧):ବିଭିନ୍ନ ଜାତୀୟ ଓ ଅନ୍ତର୍ଜାତୀୟ କ୍ରୀଡ଼ା ପ୍ରତିଯୋଗିତା ମାନଙ୍କରେ ନିଜର ଉଲ୍ଲେଖନୀୟ ପ୍ରଦର୍ଶନ ମାଧ୍ୟମରେ ଓଡ଼ିଶା ପାଇଁ ଗର୍ବ ଓ ଗୌରବ ଅର୍ଜନ କରିଥିବା ସଫଳ କ୍ରୀଡ଼ାବିତ୍‌ ମାନଙ୍କୁ ଆଜି ଓଡ଼ିଶା କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ଆର୍ଥିକ ପୁରସ୍କାର ରାଶି ପ୍ରଦାନ କରାଯାଇଛି। ବିଭାଗ ପକ୍ଷରୁ ୧୫ଟି କ୍ରୀଡା ବର୍ଗରେ ସର୍ବମୋଟ ୧୨୯ କ୍ରୀଡ଼ାବିତ୍‌ମାନଙ୍କୁ ୧୭ ଲକ୍ଷ ୮୩ ହଜାର ୫୦୦ ଟଙ୍କା ପୁରସ୍କାର ରାଶି ପ୍ରଦାନ କରାଯାଇଛି।

 ମିଳିଥିବା ସୂଚନା ଅନୁଯାୟୀ, ଖୋଖୋ କ୍ରୀଡ଼ାବିତ୍‌ଙ୍କୁ ୩ ଲକ୍ଷ ୭୫ ହଜାର, ବୁଶୁ (Wushu) କ୍ରୀଡ଼ାବିତ୍‌ଙ୍କୁ ୧ ଲକ୍ଷ ୯୬ ହଜାର, କରାଟେ କ୍ରୀଡ଼ାବିତ୍‌ଙ୍କୁ ୩ ଲକ୍ଷ ୫୮ ହଜାର ୫୦୦ ଟଙ୍କା, ପେଂଚକ ସିଲେଟ (Pancak Silat) କ୍ରୀଡ଼ାବିତ୍‌ଙ୍କୁ ୨ ଲକ୍ଷ ୬୦ ହଜାର ଟଙ୍କା ପ୍ରଦାନ କରାଯାଇଛି।

 ସେହିପରି ଭାବେ ପାରା-ଆଥଲେଟିକ କ୍ରୀଡ଼ାବିତମାନଙ୍କୁ ୧ ଲକ୍ଷ ୧୭ ହଜାର ଟଙ୍କା, ବେସବଲ୍ କ୍ରୀଡ଼ାବିତ୍‌ଙ୍କୁ ୨୪,୫୦୦ ଟଙ୍କା, ତାଇକ୍ଵାଣ୍ଡୋ (Taekwondo) କ୍ରୀଡ଼ାବିତ୍‌ଙ୍କୁ ୯୮ ହଜାର ଟଙ୍କା, ମୁକବଧିର କ୍ରିକେଟ୍ (Deaf Cricket) କ୍ରୀଡ଼ାବିତ୍‌ଙ୍କୁ ୬୨ ହଜାର ୫୦୦ ଟଙ୍କା, ଜୁ-ଜିସ୍‌ଛୁ (Ju-Jitsu) କ୍ରୀଡ଼ାବିତ୍‌ଙ୍କୁ ୫୩ ହଜାର ଟଙ୍କା, ହ୍ୱିଲଚେୟାର ଫେନ୍‌ସିଙ୍ଗ (Wheel Chair Fencing) କ୍ରୀଡାବିତ୍‌ଙ୍କୁ ୭୦ ହଜାର ଟଙ୍କା, ପାରା ସନ୍ତରଣ କ୍ରୀଡ଼ାବିତ୍‌ଙ୍କୁ ୫୩ ହଜାର ଟଙ୍କା, ଭାରୋତ୍ତୋଳନ କ୍ରୀଡ଼ାବିତ୍ ଙ୍କୁ  ୪୪   ହଜାର ଟଙ୍କା, ସନ୍ତରଣ କ୍ରୀଡ଼ାବିତଙ୍କୁ  ୩୭,୦୦୦ ଟଙ୍କା,ପାରା-ବ୍ୟାଡ଼ମିଣ୍ଟନ କ୍ରୀଡ଼ାବିତଙ୍କୁ ୩୦ ହଜାର ଟଙ୍କା ଓ ଚେସ୍‌ ଖେଳାଳୀଙ୍କୁ ୫,୦୦୦ଟଙ୍କା ପୁରସ୍କାର ରାଶି ପ୍ରଦାନ କରାଯାଇଛି।

 ଆଜିର ପୁରସ୍କାର ବିତରଣ କାର୍ଯ୍ୟକ୍ରମରେ କ୍ରୀଡା ଓ ଯୁବସେବା ବିଭାଗର ନିର୍ଦ୍ଦେଶକ ସିଦ୍ଧାର୍ଥ ଦାସ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ନିଜର ଅଭିଭାଷଣରେ  ସେ ସମସ୍ତ କ୍ରୀଡାବିତ୍ ମାନଙ୍କୁ ଶୁଭେଚ୍ଛା ଜଣାଇବା ସହ ପ୍ରତିଭାବାନ୍‌ କ୍ରୀଡାବିତ୍ ମାନଙ୍କୁ ପ୍ରୋତ୍ସାହନ ଦେବା ଦିଗରେ କ୍ରୀଡା ଓ ଯୁବସେବା ବିଭାଗର ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ।

 ନିର୍ଦ୍ଦେଶକ ଶ୍ରୀ ଦାସ କହିଥିଲେ ଯେ, ବିଭିନ୍ନ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ଅନୁଷ୍ଠିତ ହୋଇଥିବା କ୍ରୀଡା ପ୍ରତିଯୋଗିତା ମାନଙ୍କରେ ଆପଣମାନେ ନିଜର ଉତ୍କୃଷ୍ଟ ପ୍ରଦର୍ଶନ ମାଧ୍ୟମରେ ଆମ ରାଜ୍ୟ ପାଇଁ ଗର୍ବ ଓ ଗୌରବ ଆଣିଛନ୍ତି।ଏହା ଆମ ସମସ୍ତଙ୍କ ପାଇଁ ଖୁସିର ବିଷୟ ଏବଂ ଆଜିର ଦିନଟି କ୍ରୀଡାବିତ୍ ମାନଙ୍କର ସଫଳତା ନିମନ୍ତେ ଉତ୍ସର୍ଗୀକୃତ। ଆଗକୁ ମଧ୍ୟ ଆମ କ୍ରୀଡାବିତ୍ ମାନେ ବିଭିନ୍ନ ପ୍ରତିଯୋଗିତା ମାନଙ୍କରେ ପଦକ ହାସଲ କରି ଆମ ରାଜ୍ୟ ଏବଂ ଦେଶ ପାଇଁ ଗୌରବ ଅର୍ଜନ କରିବେ ବୋଲି ମୋର  ଆଶା ଓ ବିଶ୍ୱାସ। ଏଥିସହ କ୍ରୀଡାର ଓ କ୍ରୀଡାବିତ୍ ମାନଙ୍କର ବିକାଶ ପାଇଁ ସମସ୍ତ ପ୍ରକାର ସୁବିଧା ଓ ସହଯୋଗ ପ୍ରଦାନ କରାଯିବ ବୋଲି ସେ ମତପ୍ରକାଶ କରିଥିଲେ।କାର୍ଯ୍ୟକ୍ରମରେ ସମ୍ବର୍ଦ୍ଧିତ ହୋଇଥିବା କ୍ରୀଡାବିତ୍‌ମାନଙ୍କ ସମେତ ଓଡ଼ିଶା କ୍ରୀଡା ଓ ଯୁବସେବା ବିଭାଗର ଅଧିକାରୀମାନେ ଉପସ୍ଥିତ ଥିଲେ।