ରାଞ୍ଚି,୨୯/୦୭: ମହାଦେବଙ୍କୁ ଜଳଲାଗି କରି ଫେରିବା ବେଳେ ସଡ଼କ ଦୁର୍ଘଟଣା । କାଉଡିଆ ଯାତ୍ରା ହେଲା ଶେଷଯାତ୍ରା । ଝାଡଖଣ୍ଡ ଦେଓଗଡ଼ ମହାନପୁର ଥାନା ଜାମୁନିଆ ଜଙ୍ଗଲ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । କାଉଡିଆଙ୍କୁ ନେଇ ଯାଉଥିଲା ଏକ ବସ୍କୁ ଟ୍ରକ୍ ପିଟିଦେବା ଫଳରେ ୧୮ ଜଣଙ୍କର ମୃତ୍ୟୁ ହୋଇଛି । ମୃତ୍ୟୁସଂଖ୍ୟା ବଢିବା ଆଶଙ୍କା କରାଯାଉଛି । ୨୦ ଜଣ ଆହତ ହୋଇଛନ୍ତି । ଆହତଙ୍କ ଅବସ୍ଥା ଗୁରୁତର ରହିଛି । ଦୁର୍ଘଟଣା ନେଇ ନେଇ ସୂଚନା ଦେଇଛନ୍ତି ବିଜେପି ସାଂସଦ ନିଶିକାନ୍ତ ଦୁବେ ।
ଭୋର୍ ପ୍ରାୟ ୪ଟା ୩୦ମିନିଟ୍ରେ ମୋହନାପୁର ଥାନା ଜାମୁନିଆ ଜଙ୍ଗଲ ନିକଟ ରାସ୍ତାରେ ଦୁର୍ଘଟଣା ଘଟିଛି । ବାବା ବୈଦନାଥଙ୍କୁ ଜଳଲାଗି କରି କାଉଡ଼ିଆକୁ ନେଇ ଏକ ବସ୍ ଫେରୁଥିଲା । ଗ୍ୟାସ ସିଲିଣ୍ଡର ଭର୍ତ୍ତି ଏକ ଟ୍ରକ ବସ୍କୁ ଧକ୍କା ଦେବା ଫଳରେ ୧୮ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଛି । ୨୦ ଜଣ ଆହତ ହୋଇଛନ୍ତି । ଘଟଣାସ୍ଥଳରେ ପୁଲିସ୍ ଓ ଉଦ୍ଧାରକାରୀ ଦଳ ପହଞ୍ଚି ରେସ୍କ୍ୟୁ କାର୍ଯ୍ୟ ଆରମ୍ଭ କରିଛନ୍ତି । ସ୍ଥାନୀୟ ଲୋକଙ୍କ ସହୟତାରେ ଆମ୍ବୁଲାନ୍ସରେ ଆହତଙ୍କୁ ମୋହନପୁର ସିଏଚ୍ସିକୁ ପଠାଯାଇଛି ।
ଜଣେ ପୁଲିସ ଅଧିକାରୀ କହିଛନ୍ତି, ଟ୍ରକ୍ଟି ବସ୍କୁ ଏତେ ଜୋରରେ ଧକ୍କା ଦେଇଛି କି, ''ବସ୍ର ସାମ୍ନା ପଟ ସମ୍ପୂର୍ଣ୍ଣ ଭାବେ ଚୁରମାର ହୋଇଛି । ଘଟଣାସ୍ଥଳରେ ହିଁ ୫ ଜଣଙ୍କର ମୃତ୍ୟୁ ହୋଇଥିଲା । ଅନ୍ୟମାନେ ଡ଼ାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଛନ୍ତି ।'' ପ୍ରଥମେ ମୃତ୍ୟୁକଙ୍କ ସଂଖ୍ୟା ୫ ନେଇ ଖବର ପ୍ରକାଶ ପାଇଥିଲା । ପରବର୍ତ୍ତୀ ସମୟରେ ୧୮କୁ ବୃଦ୍ଧି ହୋଇଥିଲା । ଅନେକଙ୍କ ଅବସ୍ଥା ସଙ୍କଟାପନ୍ନ ରହିଛି । ଚିକିତ୍ସା ଜାରି ରହିଛି ।
ଦୁର୍ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ଓ ଗୋଡା ସାଂସଦ ନିଶିକାନ୍ତ ଦୁବେ । ବାବା ବୈଦନାଥ ସେମାନଙ୍କ ପରିବାରକୁ ଶକ୍ତି ଦିଅନ୍ତୁ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଦେଓଗଡ଼ର ବାବାଧାମରେ ଶ୍ରାବଣ ମାସର ତୃତୀୟ ସୋମବାର ପ୍ରାୟ ୩ ଲକ୍ଷ ଶ୍ରଦ୍ଧାଳୁଙ୍କ ଭିଡ଼ ହୋଇଥିଲା । ଦେଓଗଡ଼ ଯାହାକୁ ବୈଦନାଥ ଧାମ ନାମରେ ଜଣାଯାଏ । ଏଠାରେ ପ୍ରତିବର୍ଷ ଶ୍ରାବଣ ମାସରେ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଥାଏ । ମହାଦେବଙ୍କୁ ଜଳ ଲାଗି କରିବାକୁ ଆସିଥାନ୍ତି । ଦେଓଗଡ଼ଙ୍କ ଦେବତାଙ୍କ ନିବାସ ସ୍ଥାନ ବୋଲି ବିଶ୍ୱାସ କରାଯାଏ ।
