ବାଲେଶ୍ୱର,୨୦/୧୧: ବାଲେଶ୍ୱର ଉପକଣ୍ଠ ଗୁଜୁରିବଜାର ପୋଲ ନିକଟରୁ ୨ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ଅନ୍ୟ ଦୁଇଜଣ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହୋଇଛନ୍ତି । ମୃତକ ଦ୍ୱୟ ହେଲେ କସିମାବାଦ ଅଞ୍ଚଳର ରକି ଟୁଡୁ ଏବଂ ବିକାଶ ମୁର୍ମୁ ବୋଲି ଜଣାପଡ଼ିଛି । ନିଶାସକ୍ତ ଅବସ୍ଥାରେ ଭାରସାମ୍ୟ ହରାଇ ଏଭଳି ଘଟଣା ଘଟିଥିବା ସନ୍ଦେହ କରାଯାଉଛି। ଆହତ ଦ୍ୱୟ ଅନନ୍ତ ମାଝି ଏବଂ ରାହୁଲ ମାଝି ବୋଲି ଜଣାପଡ଼ିଛି । ସେମାନ ନିକଟରୁ ତେଲଙ୍ଗା କଟୁରି, ଛୁରା ବାହାରିବା ତଦନ୍ତକୁ ଭିନ୍ନ ମୋଡ଼ ଦେଇଛି।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଏହି ଚାରିଜଣ ମଙ୍ଗଳବାର ରାତିରେ ବୁଲାବୁଲି କରୁଥିଲେ । ବୁଧବାର ଭୋର ସମୟରେ ସେମାନେ ଜଣେ ସାଙ୍ଗକୁ ଆଣିବା ପାଇଁ ଘୋଡ଼ାପଦା ଯାଇଥିଲେ । ଆସିବା ବେଳେ ରାସ୍ତାରେ ଭାରସାମ୍ୟ ହରାଇ ପୋଲ ତଳକୁ ଖସି ପଡିଥିବା ସନ୍ଦେହ କରାଯାଉଛି । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପୋଲିସ ପହଞ୍ଚିଥିଲା । ସେଠାରେ ପହଞ୍ଚି ୨ଟି ବାଇକ୍ ଜବତ କରିଛି ପୋଲିସ । ଏହା ସହ ଯୁବକଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଏହା ସହ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।
