ଡ଼େରାଡୁନ,୦୮/୦୮: ୨୪ ଜଣ ବନ୍ଧୁ । ୧୯୯୦ ଦଶମ ବ୍ୟାଚମେଟ୍ । ୩୫ ବର୍ଷ ପରେ ବନ୍ଧୁ ମିଳନ ହୋଇଥିଲା । ଏକାଠୀ ଉତ୍ତରକାଶୀ ବୁଲିବାକୁ ଯାଇଥିଲେ । କେତେ ଖୁସି ଥିଲେ । ଅନେକ ବର୍ଷ ପରେ ସାଙ୍ଗମାନେ ଏକାଠୀ ହୋଇ ସୁନ୍ଦର ମୂହୁର୍ତ୍ତ ବାଣ୍ଟିଥିଲେ । ସାଙ୍ଗ ମେଳରେ ସ୍ମୁତି ସାଉଁଟିବାକୁ ଯାଇଥିଲେ । ହେଲେ ଉତ୍ତରକାଶୀ ଧରାଲିରେ ହୋଇଥିବା ବାଦଲଫଟା ବର୍ଷା ସବୁ କିଛି ଛାରଖାର କରିଦେଲା । ଉତ୍ତରକାଶୀର ବିପର୍ଯ୍ୟୟରେ ପୁନେର ଏହି ୨୪ ବନ୍ଧୁଙ୍କର କୌଣସି ପତ୍ତା ମିଳିନାହିଁ । ଏବେ ବି ପଙ୍କ, କାଦୁଅରୁ ଜୀବନ ଖୋଜା ଚାଲିଛି ।
ଯେଉଁ ହର୍ଷିଲ-ଧରାଲି ଉପତ୍ୟକା ପ୍ରାକୃତିକ ସୌନ୍ଦର୍ଯ୍ୟରେ ଚମକୁଥିଲା ଆଜି ପ୍ରାକୃତିକ ବିପର୍ଯ୍ୟୟ ତାକୁ ଛାରଖାର କରି ଦେଇଛି । ଚାରିଆଡ଼େ ପଙ୍କ, କାଦୁଅ ଭର୍ତ୍ତି । ଆବର୍ଜନା ତଳେ ପୋତି ହୋଇଛି ଶହ ଶହ ଘର, ଶତାଧିକ ଜୀବନ । ଅନେକ ହୋଟେଲ ମାଟିରେ ମିଶିବା ସହ ଅଳିଆ ତଳେ ଦବି ରହିଛି । ଉତ୍ତରାଖଣ୍ଡର ଉତ୍ତରକାଶୀରେ ମଙ୍ଗଳବାର ଭୟଙ୍କର ଜଳ ପ୍ରଳୟ ପରଠାରୁ ଆରମ୍ଭ ହୋଇଥିବା ଜୀବନ ସନ୍ଧାନ ଏ ଯାଏ ସରିନି । ଧରଲୀ ପ୍ରାକୃତିକ ବିପର୍ଯ୍ୟୟକୁ ୪ ଦିନ ହେଲାଣି । ଉଦ୍ଧାରକାର୍ଯ୍ୟ ଜାରି ରହିଛି । ୩୭୨ ଜଣଙ୍କୁ ଉଦ୍ଧାର କରାଯାଇଛି । ୫ ଜଣଙ୍କ ମୃତ୍ୟୁ ହୋଇଥିବା ନେଇ ସରକାରୀ ଭାବେ କୁହାଯାଉଥିଲେ ହେଁ ଏହି ସଂଖ୍ୟା ବେଶ୍ ଅଧିକ ଥିବା ଆକଳନ କରାଯାଉଛି । ପ୍ରଶାସନିକ ସୂଚନା ଅନୁସାରେ, ଏବେ ବି ୫୦ରୁ ଅଧିକ ନିଖୋଜ ଅଛନ୍ତି ।
ବିପର୍ଯ୍ୟୟ ପରିଚାଳନା ଅଧିକାରୀଙ୍କ ସୂଚନା ଅନୁସାରେ, ଗଙ୍ଗୋତ୍ରୀ ଏବଂ ଆଖପାଖ କ୍ଷେତ୍ରରେ ପ୍ରାୟ ୪୦୦ ଲୋକ ଫସି ରହିଛନ୍ତି । ସେଠାରୁ ଅଦ୍ୟାବଧି ୨୭୪ ଜଣଙ୍କୁ ଉଦ୍ଧାର କରାଯାଇ ହର୍ଷିଲକୁ ଅଣାଯାଇଛି । ହର୍ଷିଲରୁ ଅଦ୍ୟାବଧି ୧୯୦ ଜଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ରାଜ୍ୟ ସରକାର, ଜିଲ୍ଲା ପ୍ରଶାସନ, ବିପର୍ଯ୍ୟୟ ପରିଚାଳନା ବିଭାଗ, ଆଇଟିବିପି, ଏନଡିଆରଏଫ ଏବଂ ଅନ୍ୟ ଏଜେନ୍ସି ଉଦ୍ଧାର କାର୍ଯ୍ୟରେ ଲାଗିଛନ୍ତି । ପ୍ରଭାବିତ ଅଞ୍ଚଳରେ ଡାକ୍ତରୀ ଟିମ ମୁତୟନ ଅଛନ୍ତି । ବିଆରଓ ଟିମ ସଡ଼କ ଏବଂ ବ୍ରିଜ ମରାମତିରେ ଲାଗିଛନ୍ତି । ଭୂସ୍ଖଳନ ଏବଂ ସଡ଼କ ମାଧ୍ୟମରେ ଯୋଗାଯୋଗ ବିଚ୍ଛିନ୍ନ ହୋଇଥିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି । ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଲଗାତର ପ୍ରଭାବିତ ଅଞ୍ଚଳ ଗସ୍ତ କରି ଉଦ୍ଧାର କାର୍ଯ୍ୟ ଉପରେ ନଜର ରଖିଛନ୍ତି ।
