ଖୋର୍ଦ୍ଧା, ୨୪।୪ : ଅଗ୍ନିବିରରେ ଚାକିରୀ କରେଇଦେବା ନାଁରେ ଟଙ୍କା ହଡପ ଅଭିଯୋଗରେ ୩ ଜଣଙ୍କୁ ଗିରଫ କରିଛି ପୋଲିସ। ଏହି ଘଟଣାରେ ଆଉ ୨ ଜଣ ସମ୍ପୃକ୍ତି ଥିବା ପୋଲିସ ଜାଣିବାକୁ ପାଇଛି। ଗିରଫ ଅଭିଯୁକ୍ତମାନେ ହେଲେ ନୌସେନାର ଅଧିକାରୀ। ସେମାନଙ୍କ ଠାରୁ ୪ଟି ମୋବାଇଲ ଜବତ କରିବା ସହ ୧୨ ଟି ବ୍ୟାଙ୍କ ଆକାଉଣ୍ଟ ସିଜ କରିଛି ପୋଲିସ।
ଅଗ୍ନିବିରରେ ଚାକିରୀ କରେଇଦେବା ନାଁରେ ଟଙ୍କା ହଡଫ ହୋଇଥିବା ନେଇ ଆଇଏନଏସ ଚିଲିକାର ଟ୍ରେନିଙ୍ଗ କରେଶପଣ୍ଡେଟ ଗତ ୧୯ ତାରିଖରେ ବାଲୁଗାଁ ଥାନାରେ ଏକ ଏତଲା ଦେଇଥିଲେ । ସେହି ଆଧାରରେ ଖୋର୍ଦ୍ଧା ପୋଲିସ ତନାଘନା କରିବାବେଳେ ଏଥିରେ ନାଭି ଅଧିକାରୀମାନଙ୍କ ସମ୍ପୃକ୍ତି ମିଳିଥିଲା । ପରେ ଏମାନଙ୍କୁ ଧରିବାକୁ ପୋଲିସ ପକ୍ଷରୁ ଆରମ୍ଭ ହୋଇଥିଲା ଯୋଜନା । ଏହି ଘଟଣାରେ ପୋଲିସ ୩ ଜଣଙ୍କୁ ଗିରଫ କରିଛି। ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରେ ଜଣେ ପୂର୍ବତନ ନୌସେନା ଅଧିକାରୀ,ଅନ୍ୟ ୨ ଜଣ ଆଇଏନଏସ ଚିଲିକା ଓ ଆଇଏନଏସ କେଶରୀରେ କାର୍ଯ୍ୟରତ ଅଛନ୍ତି। ପୂର୍ବତନ ନୌସେନା ଅଧିକାରୀ ଜଣକ ଉତ୍ତର ପ୍ରଦେଶର। ସେ ଏଠାରେ ରହି ଏହି ରାକେଟକୁ ଚଳାଉଥିଲେ। ଏଥିରେ ସମ୍ପୃକ୍ତ ଆଉ ୨ ଜଣ ଆଣ୍ଡାମାନ ନିକୋବର ଆଇଏନ୍ଏସ୍ କେଶରୀରେ କାର୍ଯ୍ୟରତ ଅଛନ୍ତି ବୋଲି ଖୋର୍ଦ୍ଧା ଏସପି ସାଗରିକା ନାଥ ସୂଚନା ଦେଇଛନ୍ତି ।
