ଭୁବନେଶ୍ବର, ୧୯।୧ ଖବର ସଂଗ୍ରହ କରୁଥିବା ବେଳେ ସାମ୍ବାଦିକ ଓ ଡ୍ୟୁଟି ବେଳେ ପୋଲିସକୁ ଆକ୍ରମଣ ଘଟଣାରେ ୩ ଜଣଙ୍କୁ ମଞ୍ଚେଶ୍ୱର ଥାନା ପୋଲିସ ଗିରଫ କରିଛି। ତେବେ ମୁଖ୍ୟ ଅଭିଯୁକ୍ତ ଏବେ ବି ଫେରାର ରହିଛି। ମୁଖ୍ୟଅଭିଯୁକ୍ତକୁ ଗିରଫ କରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି।
ଶନିବାର ରାତିରେ କିଛି ବାଇକ୍ ଚୋରଙ୍କ ସନ୍ଧାନରେ ଥିବା ପୋଲିସ ଲୋକେସନ୍ ଠାବ କରି ଚଢାଉ କରୁଥିଲେ। ହଠାତ୍ ଗୋଟିଏ ଘରକୁ ଯାଇ ପୋଲିସ ପଚରାଉଚରା କରିଥିଲା। ସେହି ଘର ଲୋକେ ପୋଲିସକୁ ଚୋର ଭାବି ତାଲା ପକାଇ ଦେଇଥିଲେ। ପରେ ଅଧିକ ପୋଲିସ ଓ ପିସିଆର୍ କର୍ମଚାରୀ ଆସିବାରୁ ପୋଲିସଙ୍କୁ ଛାଡିଥିଲେ। ଘଟଣା ସମ୍ପର୍କରେ ଜଣେ ସାମ୍ବାଦିକ ଖବର ସଂଗ୍ରହ କରୁଥିଲେ। ଏହି ସମୟରେ ଏକ ଧଳା ସ୍କର୍ପିଓ ଗାଡ଼ିରୁ କିଛି ଦୁର୍ବୃତ୍ତ ବାହାରି ପ୍ରଥମେ ଗାଳିଗୁଲଜ୍ କରିଥିଲେ। ପରେ ସଂଘବନ୍ଧ ଭାବେ ମରଣାନ୍ତକ ଆକ୍ରମଣ କରିଥିଲେ। କ୍ୟାମେରାକୁ ଛଡାଇ ତଳେ ପକାଇ ଭାଙ୍ଗିବା ପରେ ରିପୋର୍ଟର ଓ କ୍ୟାମେରା ମ୍ୟାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ଏନେଇ ମଞ୍ଚେଶ୍ବର ଥାନାରେ ସାମ୍ବାଦିକ ଜଣକ ଅଭିଯୋଗ କରିଥିଲେ।
