ଭଦ୍ରକ, ୧/୫ : ଅପହରଣର ୧୦ ମାସ ପରେ ମା’କୋଳକୁ ଫେରିଲା ଅପହୃତ ୩ବର୍ଷର ଶିଶୁ ପୁତ୍ର । ସ୍ବାମୀର ମୃତ୍ୟୁ ପରେ ନେଇ ଯାଇଥିଲେ ଶ୍ଵଶୁର ଘର ଲୋକେ । ସୂଚନା ଅନୁଯାୟୀ ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ସୋରୋ ଗ୍ରାମର ସୁମିତା ଜେନା ୨୦୨୧ରେ ସରସଦା ଗ୍ରାମର ସୌମ୍ୟରଞ୍ଜନ ଜେନାଙ୍କୁ ବିବାହ କରିଥିଲେ ।
ଶିଶୁପୁତ୍ର ହେବା ପରେ ପରେ ସେପ୍ଟେମ୍ବର ୨୦୨୩ରେ ଏକ ସଡ଼କ ଦୁର୍ଘଟଣାରେ ସୌମ୍ୟ ପ୍ରାଣ ହରାଇଥିଲେ । ସ୍ୱାମୀଙ୍କ ମୃତ୍ୟୁ ପରେ ସୁମିତା ନିଜ ବାପ ଘରେ ରହୁଥିବାବେଳେ ଜୁନ ୨୦୨୪ରେ ସୁମିତାଙ୍କ ଶ୍ୱଶୁର ଘର ଲୋକ ସେଠାରେ ପହଞ୍ଚି ଚଞ୍ଚକତା କରି ପିଲାଟିକୁ ଅପହରଣ କରିନେଇଥିଲେ । ଘଟଣାକୁ ନେଇ ସୁମିତା ଭଣ୍ଡାରିପୋଖରୀ ଥାନାରେ ଏକ ମାମଲା ରୁଜୁ କରିଥିଲେ । ତେବେ ମାମଲା ରୁଜୁ ହେବାର ୧୦ମାସ ପରେ ଭୁବନେଶ୍ୱର ଚନ୍ଦ୍ରଶେଖରପୁର ଅଞ୍ଚଳରୁ ଶିଶୁଟିକୁ ପୋଲିସ ଉଦ୍ଧାର କରିବା ସହ ଶିଶୁକୁ ନିଜ ମା’କୁ ହସ୍ତାନ୍ତର କରିଛି । ତେବେ ଘଟଣାକୁ ନେଇ ୪ଜଣଙ୍କ ନାଁରେ ମାମଲା ରୁଜୁ ହୋଇଥିବାବେଳେ ଜଣଙ୍କୁ ପୋଲିସ ଅଟକ ରଖିଥିବା ଭଦ୍ରକ ଏସପିଙ୍କ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଅତିରିକ୍ତ ଏସପି ସମ୍ବିତ ମାଝୀ । ଅନ୍ୟପଟେ ୧୦ ମାସ ପରେ ନିଜ କୋଳରେ ଜନ୍ମିତ ଶିଶୁକୁ ପାଇ ବେଶ ଖୁସି ଅନୁଭବ କରିଛନ୍ତି ସୁମିତା।
