ବିଶାଖାପାଟଣା,୨୧/୧୧: ଆନ୍ଧ୍ର ପ୍ରଦେଶର ବିଶାଖାପାଟଣାରେ ୨୦ ବର୍ଷୀୟା ଆଇନ ଛାତ୍ରୀଙ୍କୁ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଏହି ଘଟଣାରେ ପୀଡ଼ିତାଙ୍କ ପ୍ରେମିକଙ୍କ ସମେତ ୪ ଜଣଙ୍କୁ ଗିରଫ କରାଯାଇଛି । ପୁଲିସ ସେମାନଙ୍କୁ ରିମାଣ୍ଡରେ ନେଇଛି ।
ଥାନାରେ ହୋଇଥିବ ଅଭିଯୋଗ ଅନୁସାରେ, ଅଭିଯୁକ୍ତ ବଂଶୀ ସହ ବର୍ଷେ ହେଲା ପୀଡ଼ିତା ଆଇନ ଛାତ୍ରୀଙ୍କର ପ୍ରେମ ସମ୍ପର୍କ ଥିଲା । ଉଭୟ ସହପାଠୀ । ଚଳିତବର୍ଷ ଅଗଷ୍ଟରେ ପୀଡ଼ିତାଙ୍କୁ ବଂଶୀ ବିଶାଖାପାଟଣାର କ୍ରିଷ୍ଣାନଗରରେ ଥିବା ଏକ ବନ୍ଧୁଙ୍କ ଘରକୁ ନେଇଥିଲା । ସେଠାରେ ତାଙ୍କୁ ଦୁଷ୍କର୍ମ କରିଥିଲା । ଦୁଷ୍କର୍ମର ଭିଡିଓ ବି ବନାଇଥିଲା । ପରେ ଭିଡିଓ କ୍ଲିପ୍ ଭାଇରାଲ କରିବାର ଭୟ ଦେଖାଇ ପୀଡ଼ିତାଙ୍କୁ ସେ ବାରମ୍ବାର ଯୌନ ଉତ୍ପୀଡ଼ନ ଦେଇଥିଲା । ଏମିତିକି ଶେଷରେ ତା’ର ୩ ଜଣ ବନ୍ଧୁ ଭିଡିଓ ଲିକ୍ କରାଇଦେବେ ବୋଲି କହି ଦୁଷ୍କର୍ମ କରିଥିଲେ । ଅକଥନୀୟ ଅତ୍ୟାଚାରର ଶିକାର ହେବା ପରେ ପୀଡ଼ିତା ଜଣକ ଆତ୍ମହତ୍ୟା ପାଇଁ ନିଷ୍ପତ୍ତି ନେଇଥିଲେ । ସୋମବାର ସେ ଆତ୍ମହତ୍ୟା ଉଦ୍ୟମ କରୁଥିବା ବେଳେ ତାଙ୍କ ପିତା ତାଙ୍କୁ ରୋକିଥିଲେ । ପରିବାର ଲୋକଙ୍କୁ ସବୁକଥା କହିବା ପରେ ସେ ଥାନାରେ ଅଭିଯୋଗ କରିଥିଲେ । ୪ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ ହୋଇଥିଲା । ସେମାନଙ୍କୁ ଗିରଫ କରାଯାଇଛି ।
