ନୂଆଦିଲ୍ଲୀ,୦୨/୦୫: ରାଜଧାନୀ ଦିଲ୍ଲୀରେ ପ୍ରବଳ ବର୍ଷା । କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି । କାଳବୈଶାଖୀ ପ୍ରଭାବରେ ପ୍ରବଳ ଝଡ଼ ତୋଫାନ ହୋଇଛି । ସାଧାରଣ ଜୀବନ ପ୍ରଭାବିତ ହୋଇଛି । ଅଦିନିଆ ବର୍ଷାରେ ଉବୁଡୁବୁ ହୋଇଛି ଦିଲ୍ଲୀ-ଏନସିଆର । ଏଥିରେ ଗୋଟିଏ ପରିବାରର ୪ଜଣଙ୍କର ମୃତ୍ୟୁ ହୋଇଛି । ଖରଖରି କେନାଲ ଅଞ୍ଚଳ ଏକ ଗାଁରେ ଗଛ ଉପୁଡି ମା' ସମେତ ୩ ପିଲାଙ୍କର ମୃତ୍ୟୁ ହୋଇଛି । ଆଗକୁ ଆହୁରି ଝଡବର୍ଷା ହେବା ସମ୍ଭାବନା ରହିଛି । ପ୍ରବଳ ପବନ ବହିବ । ୭୦ରୁ ୮୦କିମି ବେଗରେ ବହିପାରେ ପବନ । ଏ ନେଇ ଦିଲ୍ଲୀକୁ ରେଡ ଆଲର୍ଟ ଜାରି କରିଛି ଭାରତୀୟ ପାଣିପାଗ ବିଭାଗ ।
ଗୁରୁବାର ବିଳମ୍ବିତ ରାତିରୁ ପ୍ରବଳ ଝଡ ତୋଫାନ ହୋଇଥିଲା । ଆଜି ବି ବର୍ଷା ଜାରି ରହିଛି । ରାଜଧାନୀ ଦିଲ୍ଲୀର ବିଭିନ୍ନ ଅଞ୍ଚଳରେ କିଛି ଘଣ୍ଟାରେ ପାଣି ଜମିଯାଇଥିଲା । ଦକ୍ଷିଣ ଦିଲ୍ଲୀ ଜାଫରପୁରେ ବଡ ଅଘଟଣ ଘଟିଛି । ଗଛ ପଡି ଗୋଟିଏ ପରିବାର ୪ଜଣଙ୍କର ମୃତ୍ୟୁ ହୋଇଛି । ସେମାନଙ୍କ ମଧ୍ୟରେ ମାଆ ଓ ୩ ପିଲା ରହିଛନ୍ତି । କିଛି ଲୋକ ଚାପି ହୋଇ ରହିଛନ୍ତି ।
ଗୁରୁବାର ପ୍ରବଳ ବର୍ଷାରେ ବେହାଲ ହୋଇଛି ରାଜଧାନୀ ଦିଲ୍ଲୀ । ଗଳି କନ୍ଦିରେ ପାଣି ଜମିଛି । ତଳିଆ ଅଞ୍ଚଳ ବୁଡିଯାଇଛି । ବିଭିନ୍ନ ସ୍ଥାନରେ ଜଳବନ୍ଦୀ ସ୍ଥିତି ପାଇଁ ଜନଜୀବନ ପ୍ରଭାବିତ ହୋଇଛି । ଏକ ପ୍ରକାର ବନ୍ୟା ପରିସ୍ଥିତି ସୃଷ୍ଟି ହୋଇଛି । ଗଛ, ବିଦ୍ୟୁତ ଖୁଣ୍ଟ ଉପୁଡି ଟ୍ରାଫିକ୍ ଜାମ୍ ହୋଇଛି । ରାସ୍ତାରେ ପାଣି ଲହଡୀ ଭାଙ୍ଗିବାକୁ ଗାଡିମୋଟର ଫସି ରହିଛି । ସେପଟେ ଖରାପ ପାଣିପାଗ ପାଇଁ ୧୦୦ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ୪୦ ବିମାନ ଦିଗ ପରିବର୍ତ୍ତନ ହୋଇଛି । ଏ ନେଇ ଆଡଭାଇଜରୀ ଜାରି କରିଛନ୍ତି ବିମାନ ବନ୍ଦର କର୍ତ୍ତୃପକ୍ଷ ।
ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ଦିଲ୍ଲୀକୁ ଆଜି ପାଇଁ ରେଡ୍ ଆଲର୍ଟ ଜାରି କରାଯାଇଛି । ଆଜି ଦିଲ୍ଲୀରେ ପ୍ରବଳ ବର୍ଷା ସହ ୭୦ରୁ ୮୦ କିମି ବେଗରେ ପବନ ବହିବ ବୋଲି ପୂର୍ବାନୁମାନ କରାଯାଇଛି ।
