କଟକ,୧୮/୦୧: କଟକ ରୁପା ତାରକସିକୁ ଜିଆଇ ମାନ୍ୟତା ମିଳିବା ପରେ କାରିଗର, ବିକ୍ରେତା ଏବଂ ଉତ୍ପାଦକ ଗୋଷ୍ଠୀ କ’ଣ ଲାଭ ପାଇବେ ତାକୁ ନେଇ ଗତ କିଛି ମାସ ଧରି ଚର୍ଚ୍ଚା ଲାଗି ରହିଥିଲା । ଏବେ ଏ ଚିତ୍ର ଏକପ୍ରକାର ସ୍ପଷ୍ଟ ହୋଇଛି । ରୁପା ତାରକସି ସହ ଜଡ଼ିତ ଥିବା କାରିଗରମାନେ ଏଣିକି ବ୍ୟକ୍ତିଗତ ଭାବେ ଜିଆଇ ମାନ୍ୟତାର ଲାଭ ପାଇପାରିବେ । କାରିଗର, ବିକେତ୍ରା ଓ ଉତ୍ପାଦନକାରୀ ଗୋଷ୍ଠୀଙ୍କୁ ଜିଆଇ ପ୍ରମାଣପତ୍ର ଦିଆଯିବ । ଏନେଇ ମଧ୍ୟମ, କ୍ଷୁଦ୍ର, ଅଣୁ ଉଦ୍ୟୋଗ (ଏମ୍ଏସ୍ଏମ୍ଇ) ବିଭାଗ ତରଫରୁ ଉଦ୍ୟମ ଆରମ୍ଭ ହୋଇଛି । ସେହିକ୍ରମରେ ଶୁକ୍ରବାର କଟକର ୪୨ଜଣ କାରିଗର, ବିକ୍ରେତା ଜିଆଇ ପ୍ରମାଣପତ୍ର ପାଇଁ ଆବେଦନ କରିଛନ୍ତି । ଗୁରୁତ୍ୱପୂର୍ଣ୍ଣ କଥା ହେଉଛି, ପ୍ରଥମଥର କୌଣସି ଜିଆଇ ମାନ୍ୟତାପ୍ରାପ୍ତ ଦ୍ରବ୍ୟର ଲାଭ ତୃଣମୂଳ ସ୍ତରରେ କାରିଗରଙ୍କୁ ସିଧାସଳଖ ପ୍ରମାଣପତ୍ର ଆଧାରରେ ମିଳିବାକୁ ଯାଉଛି । ଯାହାଫଳରେ କଟକର ଅସଲି ରୁପା ତାରକସିର ଆଦୃତି ଆହୁରି ବଢ଼ିବ ବୋଲି ଆଶା କରାଯାଉଛି ।
ଏମ୍ଏସ୍ଏମ୍ଇ ବିଭାଗ ତରଫରୁ ଆଜି ‘ଜିଆଇ ଅଥରାଇଜ୍ଡ୍ ୟୁଜର୍ସ ଡ୍ରାଇଭ୍’ ଆୟୋଜନ କରାଯାଇଥିଲା । ଏଥିରେ ରୁପା ତାରକସି ସହ ଜଡ଼ିତ ଥିବା କାରିଗର, ବିକ୍ରେତା, ଉତ୍ପାଦନକାରୀ ଅଂଶଗ୍ରହଣ କରିଥିଲେ । ଆଧାରକାର୍ଡ, ଉଦ୍ୟମ ପ୍ରମାଣପତ୍ର, ସ୍କିଲ୍ ଇଣ୍ଡିଆ ପ୍ରମାଣପତ୍ର, କାରିଗର କାର୍ଡ ଆଦି ଦାଖଲ କରିବା ପରେ ସେମାନଙ୍କ ନାମ ପଞ୍ଜିକରଣ କରାଯାଇଛି ।
ସୂଚନା ଥାଉ କି, ଜିଆଇ ମାନ୍ୟତାର ପ୍ରକ୍ରିୟା ଅନୁସାରେ ରାଜ୍ୟ ସରକାରଙ୍କ ହସ୍ତତନ୍ତ ୟୁନିଟ୍ ‘ଉତ୍କଳିକା’ ଆବେଦନକାରୀ ଭାବେ କଟକ ରୁପା ତାରକସିର ଜିଆଇ ଟ୍ୟାଗ୍ ହାସଲ କରିଛି। ଏବେ କାରିଗର, ବିକ୍ରେତାମାନେ ଜିଆଇର ‘ପାର୍ଟ-ବି ସାର୍ଟିଫିକେଟ୍’ ପାଇଁ ଆବେଦନ କରୁଛନ୍ତି । ଏଥିଲାଗି ଉତ୍କଳିକା ତରଫରୁ ମଧ୍ୟ ଏନ୍ଓସି (ଆପତ୍ତିବିହୀନ ପ୍ରମାଣପତ୍ର) ପ୍ରଦାନ କରାଯିବ । ଏନ୍ଓସି ପ୍ରକ୍ରିୟା ଶେଷ ହେଲେ ବ୍ୟକ୍ତିଗତ ପ୍ରମାଣପତ୍ର ଅର୍ଥାତ୍ ଜିଆଇ ଅଥରାଇଜ୍ଡ୍ ୟୁଜର୍ସ ପ୍ରମାଣପତ୍ର ପାଇବାକୁ କାରିଗର, ବିକ୍ରେତା ଗୋଷ୍ଠୀଙ୍କୁ ପ୍ରାୟ ୪ମାସ ସମୟ ଲାଗିବ ବୋଲି କୁହାଯାଉଛି ।
ପ୍ରଥମଥର ପାଇଁ କୌଣସି ଜିଆଇ ମାନ୍ୟତାପ୍ରାପ୍ତ ଦ୍ରବ୍ୟର ତୃଣମୂଳ ସ୍ତରରେ ଲାଭ ଦେବାକୁ ଏଭଳି ଅଭିଯାନ ଆରମ୍ଭ ହୋଇଛି । ଜିଆଇ ୟୁଜର୍ସ ପ୍ରମାଣପତ୍ର ପାଇଲେ କାରିଗରମାନେ ଜାତୀୟ, ଅନ୍ତର୍ଜାତୀୟ ସ୍ତରର ପ୍ରଦର୍ଶନୀରେ ଅଂଶଗ୍ରହଣ କରିବାକୁ ନିମନ୍ତ୍ରଣ ଓ ପ୍ରୋତ୍ସାହନ ପାଇବେ । ରୁପା ତାରକସି ନାଁରେ ଓଡ଼ିଶା ବଜାରରେ ପ୍ରବେଶ କରିଥିବା ନକଲି ରୁପାକସି ବିଶେଷ କରି କଲିକତା ଫ୍ୟାନ୍ସି ରୁପା ଦ୍ରବ୍ୟ ଉପରେ ରୋକ୍ ଲାଗିପାରିବ । ପର୍ଯ୍ୟଟକମାନେ ୟୁଜର୍ସ ପ୍ରମାଣପତ୍ରଧାରୀଙ୍କ ସମ୍ପର୍କରେ ଜାଣି ସେମାନଙ୍କଠାରୁ ଅସଲି ସାମଗ୍ରୀ କିଣିବାକୁ ସୁଯୋଗ ପାଇବେ । କେବଳ ସେତିକି ନୁହେଁ, କାରିଗରମାନେ ସେମାନଙ୍କ ଉତ୍ପାଦ ବା ସାମଗ୍ରୀରେ ଜିଆଇ ଟ୍ୟାଗ୍ଲାଇନ୍ (ଅତୁଲ୍ୟ ଭାରତର ଅମୂଲ୍ୟ ନିଧି) ଏବଂ ଲୋଗୋ ବ୍ୟବହାର କରିପାରିବେ ।
ଜିଆଇ ବିଶେଷଜ୍ଞ ଡକ୍ଟର ଅନୀତା ସାବତ ଆଜି କାରିଗରମାନଙ୍କୁ ଜିଆଇ ମାନ୍ୟତା ସାର୍ଟିଫିକେଟ୍ର ସୁବିଧା ସମ୍ପର୍କରେ ବିସ୍ତୃତ ଭାବେ ବୁଝାଇଥିଲେ । ଅନ୍ୟମାନଙ୍କ ମଧ୍ୟରେ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଟରପ୍ରିନ୍ୟୁୟର୍ସିପ୍ ଡେଭେଲପ୍ମେଣ୍ଟ୍(ଆଇଇଡି)ର ପି.ପ୍ରଭାକର ରାଓ, ହସ୍ତଶିଳ୍ପ ବିଭାଗର ସହକାରୀ ନିର୍ଦ୍ଦେଶକ ଜ୍ୟୋତିରଞ୍ଜନ ଜେନା, ଡିଆଇସିର ପରିଚାଳନା ନିର୍ଦ୍ଦେଶକ ତୁରଣକାନ୍ତି ମହାନ୍ତି, ଜିଆଇ ବିଶେଷଜ୍ଞ ଡକ୍ଟର ଏସ୍.କେ. କର, ଡକ୍ଟର ପୟୋଧର ପାଢୀ ପ୍ରମୁଖ ଉପସ୍ଥିତ ଥିଲେ।
