ଇସଲାମାବାଦ,୨।୮:  ପାକିସ୍ତାନର ଖାଇବର ପଖତୁନଖ୍ୱା (କେପିକେ) ପ୍ରଦେଶରେ ମୋର୍ଟାର ସେଲ୍ ବିସ୍ଫୋରଣ। ଏଥିରେ ପାଞ୍ଚ ଜଣ ପିଲାଙ୍କ ମୃତ୍ୟୁ ଘଟିଥିବା ବେଳେ୧୨ ଜଣ ଆହତ ହୋଇଛନ୍ତି। ଏହି ଘଟଣା କେପିକେର ଲକ୍କି ମରୱାତ ଜିଲ୍ଲାର ଏକ ଗାଁରେ ଘଟିଛି। ଦୁର୍ଘଟଣାରେ ମୃତକଙ୍କ ମଧ୍ୟରେ ଚାରି ଜଣ ଝିଅ ଅଛନ୍ତି। ସେଭଳି ଆହତଙ୍କ ମଧ୍ୟରେ ଦୁଇଜଣ ମହିଳା ଅଛନ୍ତି। ଆହତମାନଙ୍କୁ ହସ୍ପିଟାଲରେ ଚିକିତ୍ସା କରାଯାଉଛି। ପିଲାମାନେ ଏକ ମୋର୍ଟାର ସେଲ୍ ସହ ଖେଳୁଥିବା ବେଳେ  ତାହା ବିସ୍ଫୋରଣ ହୋଇଥିଲା।

ସ୍ଥାନୀୟ ପୋଲିସର ସୂଚନା ଅନୁଯାୟୀ, ପିଲାମାନେ କ୍ଷେତରୁ ଏକ ପୁରୁଣା ମୋର୍ଟାର RPG-7 ସେଲ୍ ପାଇଥିଲେ। ସେମାନେ ଏହାକୁ ଗୋଟାଇ ଖେଳିବା ପାଇଁ ଘରକୁ ଆଣିଥିଲେ। ଘର ଭିତରେ ଏଥିରେ  ଖେଳିବା ଆରମ୍ଭ କରିଥିଲେ। ଏହି ସମୟରେ ସେଲ୍ ବିସ୍ଫୋରଣ ହୋଇଥିଲା। ପୋଲିସ କହିଛି ଯେ ଆହତ ପିଲା ଏବଂ ମହିଳାମାନେ ଗୋଟିଏ ପରିବାରର।

ପୋଲିସର କହିବା ଅନୁସାରେ, ପିଲାମାନଙ୍କୁ କ୍ଷେତ ଭିତରେ ମୋର୍ଟର ସେଲ୍ ମିଳିଥିଲା। ଏହାକୁ ଖେଳନା ଭାବି ସେମାନେ ନିଜ ଗାଁ ସୋରବନ୍ଦକୁ ନେଇଯାଇଥିଲେ। ଘର ଭିତରେ ଏହା ବିସ୍ଫୋରଣ ଘଟିଥିଲା। ସେ କହିଛନ୍ତି, ମୃତକ ଓ ଆହତ ପିଲାଙ୍କୁ ଖଲିଫ ଗୁଲ ନଓ୍ବାଜ ହସ୍ପିଟାଲରେ ଆଡମିଟ୍ କରାଯାଇଛି।