ଭୁବନେଶ୍ୱର,୦୩/୦୩: ବିମାନ ଚଳାଇବା ପାଇଁ ସ୍ୱପ୍ନ ରଖିଥିବା ଆଦିବାସୀ ଛାତ୍ରଛାତ୍ରୀଙ୍କ ପାଇଁ ଆସିଛି ନୂଆ ସୁଯୋଗ । କାରଣ ରାଜ୍ୟ ସରକାର ୫୦ ଆଦିବାସୀ ଛାତ୍ରଛାତ୍ରୀଙ୍କୁ ପାଇଲଟ୍ ତାଲିମ ଦେବା ପାଇଁ ସ୍ଥିର କରିଛନ୍ତି । ଏହି ୫୦ ଜଣଙ୍କ ଭିତରେ ଅଧିକାଂଶ ଛାତ୍ରୀ ରହିବେ । ଏଥିପାଇଁ ରାଜ୍ୟ ବାଣିଜ୍ୟ ଏବଂ ପରିବହନ ବିଭାଗ ଏକ ପେସାଦାର ସଂସ୍ଥାକୁ ନିଯୁକ୍ତ କରିବାକୁ ଟେଣ୍ଡର ଆହ୍ୱାନ କରିଛି ।
ବିଭାଗର ଜଣେ ଅଧିକାରୀ କହିଛନ୍ତି, ଟେଣ୍ଡର ଅନୁଯାୟୀ, ସରକାର ଉକ୍ତ ସଂସ୍ଥା ମାଧ୍ୟମରେ ଅତିକମ୍ରେ ୩ ଶହ ଆଦିବାସୀ ଛାତ୍ରଛାତ୍ରୀଙ୍କୁ ଚିହ୍ନଟ କରିବ । ସେଥିରୁ ୫୦ ଜଣଙ୍କୁ ବଛାଯାଇ ତାଲିମ ପ୍ରଦାନ କରାଯିବ । ଏହି ୫୦ ଜଣ ‘ଏୟାରଲାଇନ୍ କ୍ୟାଡେଟ୍ ପାଇଲଟ୍ ଆସେସମେଣ୍ଟ୍’ ପରୀକ୍ଷା ପାଇଁ ଭୁବନେଶ୍ୱରରେ ୮ ସପ୍ତାହ ପାଇଁ କୋଚିଂ ନେବେ । ଦିନକୁ ୬ ଘଣ୍ଟା ଲେଖାଁ ସପ୍ତାହରେ ୫ ଦିନ ତାଲିମ ନେବେ । ଡିଜିସିଏ ଦ୍ୱାରା ଧାର୍ଯ୍ୟ ଫାଉଣ୍ଡେସନ୍ ପାଠ୍ୟକ୍ରମ ତଥା ବିମାନ ତାଲିମ ପାଠ୍ୟକ୍ରମର ଏକ ମୋଟାମୋଟି ଧାରଣା ମଧ୍ୟ ସେମାନଙ୍କୁ ଦିଆଯିବ । ଇଂରାଜୀରେ ଦକ୍ଷତା, ବ୍ୟକ୍ତିତ୍ୱ ବିକାଶ, ମୌଳିକ ବିମାନ ଚଳାଚଳ ଜ୍ଞାନ, ଗ୍ରୁପ୍ ଆଲୋଚନା ଏବଂ ସାକ୍ଷାତକାର ଆଦି ବିଷୟରେ ଶିକ୍ଷା ଦିଆଯିବ । ପ୍ରତ୍ୟେକ ମଡ୍ୟୁଲ୍ ଶେଷ ପରେ ନିୟମିତ ମୂଲ୍ୟାଙ୍କନ କରାଯିବ । ପଛରେ ପଡ଼ିଥିବା ଛାତ୍ରଛାତ୍ରୀଙ୍କ ପାଇଁ ସପ୍ତାହନ୍ତରେ ସ୍ୱତନ୍ତ୍ର ତାଲିମ ପ୍ରଦାନ କରାଯିବ । ଏହି ତାଲିମ ପରେ ୫୦ ଜଣ ଛାତ୍ରଛାତ୍ରୀ ଏୟାର ଇଣ୍ଡିଆ ଏବଂ ଇଣ୍ଡିଗୋ ଭଳି ବିମାନ କମ୍ପାନୀ ଦ୍ୱାରା ଚୟନ ହେବେ । ସେହି ବିମାନ କମ୍ପାନୀଗୁଡିକ ଶ୍ରେଷ୍ଠ ୧୦ ଛାତ୍ରଛାତ୍ରୀଙ୍କୁ ବାଛି ପେସାଦାର ପାଇଲଟ୍ ହେବା ପାଇଁ ବୈଷୟିକ ତାଲିମ ପ୍ରଦାନ କରିବେ ବୋଲି ଉକ୍ତ ଅଧିକାରୀ ସୂଚନା ଦେଇଛନ୍ତି ।
