ବଡବିଲ,୧୭।୧୧ ଚମ୍ପୁଆ ଥାନା ୨୦ ନମ୍ବର ଜାତୀୟ ରାଜପଥ ମହେଶ୍ବରପୁର ନିକଟରେ ଭାରସାମ୍ୟ ହରାଇ ରାସ୍ତା କଡ଼ ଗଛରେ ପିଟିହେଲା କାର୍। କାରରେ ବସିଥିବା ସମସ୍ତ ୬ଜଣ ଆହତ ହୋଇଛନ୍ତି। ସ୍ଥାନୀୟ ଲୋକେ ଆହତ ମାନଙ୍କୁ ଉଦ୍ଧାର କରି ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଛନ୍ତି । ଆହତଙ୍କ ମଧ୍ୟରୁ ୪ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ସମସ୍ତ ଆହତ ଚମ୍ପୁଆ ଏନଏସି ଅନ୍ତର୍ଗତ ଶିରପୁର ଗ୍ରାମର ବୋଲି ସୂଚନା ମିଳିଛି ।
ଶିରପୁର ଗ୍ରାମର ଦିପକ ଦାସ, ଚିତ୍ତ ରଂଜନ ମହାନ୍ତ, ବିକାଶ ମହାକୁଡ଼, ସୁଜିତ ସର୍ଦ୍ଦାର, ଯଶୋବନ୍ତ ମହାନ୍ତ ଓ ସୁଭମ ନାଏକ କାର୍ ଯୋଗେ ଚମ୍ପୁଆରୁ ରିମୁଳି ପଟକୁ ଯାଉଥିଲେ। ମହେଶ୍ବରପୁର ନିକଟରେ ଭାରସାମ୍ୟ ହରାଇ ତାଙ୍କ କାର ରାସ୍ତାରୁ ଓହ୍ଲାଇ ଯାଇ ଏକ ଗଛରେ ପିଟି ହୋଇଥିଲା। ଫଳରେ କାରରେ ଥିବା ସମସ୍ତେ ଆହତ ହୋଇଥିଲେ । ଦୁର୍ଘଟଣା ପରେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ନିକଟସ୍ଥ ଚମ୍ପୁଆ ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ। ଖବର ପାଇ ଚମ୍ପୁଆ ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।
