ମାଲକାନଗିରି,୫/୧୦ : ମାଲକାନଗିରି ଜିଲ୍ଲାରେ ପିଏମ କିଷାନ ଯୋଜନାରେ ୭୪,୧୧୫ଜଣ ଚାଷୀଙ୍କ ନାମ ପଞ୍ଜିକରଣ ହୋଇଥିବାବେଳେ ୫୪,୨୨୧ଜଣ ଯୋଗ୍ୟ ଚାଷୀଙ୍କ ଖାତାକୁ ୨ହଜାର ଲେଖା ଟଙ୍କା ଯିବାର ବ୍ୟବସ୍ଥା ହୋଇଛି । ଆଜି ଜିଲ୍ଲାପରିଷଦ କାର୍ଯ୍ୟାଳୟ ସମ୍ମିଳନୀ କକ୍ଷରେ ପିଏମ କିଶାନ ଉତ୍ସବ ଦିବସ ପାଳିତ ହୋଇଯାଇଛି । ମାଲକାନଗିରି ଜିଲ୍ଲାସ୍ତରୀୟ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଜିଲ୍ଲାପାଳ ଆଶିଷ ଈଶ୍ୱର ପାଟିଲ, ସମ୍ମାନିତ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷା ସମାରୀ ଟାଙ୍ଗୁଲ, ଜିଲ୍ଲା ଉନ୍ନୟନ ଅଧିକାରୀ ତଥା ଜିଲ୍ଲା ପରିଷଦ ନିର୍ବାହୀ ଅଧିକାରୀ ନରେଶ ଶବର, ମୁଖ୍ୟ ଜିଲ୍ଲା କୃଷି ଅଧିକାରୀ ଯାମି ସୂର୍ଯ୍ୟ ରାଓ, ସାଂସଦ ପ୍ରତିନିଧି ସଞ୍ଜୟ ସରକାର, ଜିଲ୍ଲା ମୃତିକା ସଂରକ୍ଷଣ ଉପ ନିର୍ଦ୍ଦେଶକ, ମତ୍ସ୍ୟ ଅଧୂକାରୀ, ଜିଲ୍ଲା ପ୍ରାଣୀ ଚିକିତ୍ସା ଅଧିକାରୀ, ଏଆରସିଏସ ପ୍ରମୁଖ ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ଥିଲେ।
ମାଲକାନଗିରି ଜିଲ୍ଲାର ମୋଟ ୭୪ହଜାର ୧୧୫ ଜଣ ଚାଷୀ ପିଏମ କିଷାନ ଯୋଜନା ପାଇଁ ନାମ ପଞ୍ଜିକରଣ କରିଥିଲେ । ସେମାନଙ୍କ ମଧ୍ୟରୁ ୫୪,୨୨୧ଜଣ ଯୋଗ୍ୟ କୃଷକଙ୍କୁ ଜଣ ପିଛା ୨ ହଜାର ଟଙ୍କା ଲେଖା ଡିବିଟି ମାଧ୍ୟମରେ ସେମାନଙ୍କ ଆକାଉଣ୍ଡ ଦ୍ବାରା ସହାୟତା ଦିଆଯିବ ବୋଲି ମୁଖ୍ୟ କୃଷି ଅଧିକାରୀ ଶ୍ରୀରାଓ ସୂଚନା ଦେଇଛନ୍ତି । ଆଜି କିଛି ଚାଷୀଙ୍କ ଖାତାକୁ ଟଙ୍କା ପଠାଯାଇଛି । ଏହି କାର୍ଯ୍ୟକ୍ରମରେ ଅନ୍ୟାନ୍ୟ ଜିଲ୍ଲାସ୍ତରୀୟ ଅଧିକାରୀ, କର୍ମଚାରୀ ଓ ଜିଲ୍ଲାର ୭ଟି ଯାକ ବ୍ଲକରୁ ଶତାଧିକ କୃଷକମାନେ ଯୋଗଦେଇଥିଲେ ।
