ନୂଆଦିଲ୍ଲୀ,୨୩/୦୭: ସମ୍ପତ୍ତି ହଡ଼ପ କରିବାକୁ ଷଡ଼ଯନ୍ତ୍ର। ମାତ୍ର ୮ ବର୍ଷ ବୟସରେ ୩ ଜଣ ପୁତ୍ର ସନ୍ତାନର ଜନନୀ । ତେବେ ଉତ୍ତରପ୍ରଦେଶ ଔରିୟାର ରାମନଗର ଗାଁରୁ ଏଭଳି ଅଜବ ଘଟଣା ସାମ୍ନାକୁ ଆସିଛି। ସେଠାରେ ଜଣେ ମହିଳା ମାତ୍ର ୮ ବର୍ଷ ବୟସରେ ୩ ଜଣ ପୁତ୍ର ସନ୍ତାନର ଜନନୀ ହୋଇଥିବା ସରକାରୀ କାଗଜପତ୍ରରେ ଦର୍ଶାଯାଇଛି । ଏ ନେଇ ଅଭିଯୋଗ ଆସିବା ପରେ ମାମଲାର ତଦନ୍ତ ଆରମ୍ଭ ହୋଇଛି ।
ସୂଚନା ମୁତାବକ, ରାମନଗର ଗାଁର ବାସିନ୍ଦା ନିରାଶ୍ରୟ ମହିଳା କମଲେଶଙ୍କ ସ୍ୱାମୀଙ୍କର ୨୦୨୧ରେ ମୃତ୍ୟୁ ହୋଇଯାଇଥିଲା । ଏକମାତ୍ର ଝିଅର ବି ତା’ପରେ ମୃତ୍ୟୁ ହୋଇଥିଲା । ଏହାପରେ ଶ୍ୱଶ୍ୱର ଘର ଲୋକେ ତାଙ୍କୁ ମାର୍ପିଟ କରି ଘରୁ ବାହାର କରିଦେଇଥିଲେ । ଅନ୍ୟ ଉପାୟ ନଥିବାରୁ ସେବେଠାରୁ ସେ ନିଜ ବାପଘରେ ରହି ଆସୁଛନ୍ତି । କମଲେଶଙ୍କ ଅଭିଯୋଗ ଅନୁସାରେ, ତାଙ୍କ ସମ୍ପତ୍ତିଙ୍କୁ ହଡ଼ପ କରିବାକୁ ଶ୍ୱଶ୍ୱର ଘର ଲୋକେ ତାଙ୍କ ସ୍ୱାମୀଙ୍କର ଜଣେ ଦ୍ୱିତୀୟ ପତ୍ନୀ ଗୁଡ୍ଡି ଦେବୀ ଥିବା ଦର୍ଶାଇଛନ୍ତି । ଗୁଡ୍ଡୀ ଦେବୀଙ୍କର ୩ ଜଣ ପୁତ୍ର ଶିବପୂଜନ, ସୋନୁ, ପପ୍ପୁ ରହିଥିବା ବି ସେମାନେ ଦାବି କରୁଛନ୍ତି । କେବଳ ସେତିକି ନୁହେଁ, ପଞ୍ଚାୟତ ଅଧିକାରୀଙ୍କ ସହ ମିଶି ସେମାନେ ଏହି ତଥ୍ୟକୁ ପରିବାର ରେଜିଷ୍ଟରରେ ମଧ୍ୟ ଚଢ଼ାଇ ଦେଇଛନ୍ତି ।
ରେଜିଷ୍ଟରରେ ଗୁଡ୍ଡୀ ଦେବୀଙ୍କ ଜନ୍ମତିଥି ୧୯୮୪ ମସିହା ଜାନୁଆରୀ ୧ ତାରିଖରେ ହୋଇଥିବା ଦର୍ଶାଯାଇଛି । ତାଙ୍କର ୩ ପୁଅଙ୍କ ଜନ୍ମ ଯଥାକ୍ରମେ ୧୯୮୯, ୧୯୯୦ ଓ ୧୯୯୨ ମସିହାରେ ହୋଇଥିବା ଉଲ୍ଲେଖ ରହିଛି । ଅର୍ଥାତ୍ କାଗଜପତ୍ରରେ ଗୁଡ୍ଡୀ ଦେବୀ ମାତ୍ର ୫ ବର୍ଷ ବୟସରେ ମା’ ହୋଇଥିଲେ । ୮ବର୍ଷର ହେବାବେଳକୁ ତାଙ୍କର ୩ଟି ପିଲା ହୋଇଯାଇଥିଲେ । ଏହି ଜାଲିଆତିକୁ ନେଇ କମଲେଶ ମୋଟ ୧୨ ଜଣ ଲୋକଙ୍କ ବିରୋଧରେ ଅଭିଯୋଗ କରିଛନ୍ତି ।
