ହାଙ୍ଗଝୌ,୧୪/୦୯: ମହିଳା ଏସିଆ କପ୍ ହକିର ସୁପର-୪ରେ ଭାରତ ଶନିବାର ଜାପାନ ସହ ୧-୧ ଗୋଲରେ ଡ୍ର’ ରଖି ଫାଇନାଲରେ ପ୍ରବେଶ କରିଛି । ରବିବାର ଚୀନ ଓ ଭାରତ ଫାଇନାଲ ଖେଳିବେ ।
ଶନିବାର ଅନ୍ତିମ ସୁପର-୪ ମ୍ୟାଚ୍ରେ ଭାରତୀୟ ଦଳ ବିଜୟ କିମ୍ବା ଡ୍ର’ ଆବଶ୍ୟକ କରୁଥିଲା । ଆରମ୍ଭରୁ ସପ୍ତମ ମିନିଟରେ ବିୟୁଟୀ ଡୁଙ୍ଗଡୁଙ୍ଗ ଚମତ୍କାର ଫିଲ୍ଡ ଗୋଲ୍ ଦେଇ ଦଳକୁ ୧-୦ ଗୋଲରେ ଅଗ୍ରଣୀ କରାଇଥିଲେ । ପରବର୍ତ୍ତୀ ସମୟ ଖେଳ ବେଶ ସଂଘର୍ଷପୂର୍ଣ୍ଣ ହୋଇଥିଲା । ତେଣୁ ଦ୍ୱିତୀୟ ଓ ତୃତୀୟ କ୍ୱାର୍ଟର ଖେଳ ଗୋଲଶୂନ୍ୟ ରହିଥିଲା । ଖେଳ ଶେଷ ହେବାର ୨ ମିନିଟ ପୂର୍ବରୁ ଜାପାନ ଗୋଲ ପରିଶୋଧ କରି ସ୍ଥିତି ୧-୧ କରିଥିଲା । ଶେଷ ମୁହୂର୍ତ୍ତ ଖେଳ ବେଶ ଚିତାକର୍ଷକ ହୋଇଥିଲା । ଉଭୟ ଦଳ ବିଜୟୀ ହେବା ପାଇଁ ସମସ୍ତ ବଳ ଲଗାଇ ଦେଇଥିଲେ । କିନ୍ତୁ ଗୋଲ୍ ହୋଇ ନଥିଲା । ପଏଣ୍ଟ ଭାଗ କରିବା ଦ୍ୱାରା ଭାରତ ୩ଟି ମ୍ୟାଚରୁ ଗୋଟିଏ ବିଜୟ, ଗୋଟିଏ ପରାଜୟ ଓ ଗୋଟିଏ ଡ୍ର’ ରଖି ମୋଟ୍ ୪ ପଏଣ୍ଟ ପାଇ ଟେବୁଲରେ ଦ୍ୱିତୀୟ ସ୍ଥାନରେ ରହିଲା । ଚୀନ ଅପରାଜେୟ ସହ ଟେବୁଲ ଟପ୍ପର ହୋଇଥିଲା । ଜାପାନ ଓ ଦକ୍ଷିଣ କୋରିଆ ବ୍ରୋଞ୍ଜ ପଦକ ପାଇଁ ଖେଳିବେ । ଏସିଆ କପ୍ ଚାମ୍ପିଅନ ଦଳ ସିଧାସଳଖ ୨୦୨୬ ବିଶ୍ୱକପ୍କୁ ଯୋଗ୍ୟତା ହାସଲ କରିବ ।
