ନୂଆଦିଲ୍ଲୀ,୧୧/୧୦: ସୀମା ସୁରକ୍ଷା ବଳ (ବିଏସ୍ଏଫ୍) ଗତ ୨-୩ ବର୍ଷରେ ପଶ୍ଚିମବଙ୍ଗ-ବାଂଲାଦେଶ ସୀମାରୁ ୬ କୋଟି ଟଙ୍କାରୁ ଅଧିକ ମୂଲ୍ୟର ଫେନସିଡିଲ୍ କଫ୍ ସିରପ୍ ଜବତ କରିଛି। ଏହି କଫ୍ ସିରପ ଗୁଡ଼ିକ ଭାରତର ବେଆଇନ ଔଷଧ ବଜାରକୁ ଯୋଗାଣ କରାଯିବାର ଥିଲା। ନିକଟରେ ନକଲି କଫ୍ ସିରପ୍ ଯୋଗୁଁ ମଧ୍ୟପ୍ରଦେଶରେ ୧୪ ଜଣ ପିଲାମାନଙ୍କର ମୃତ୍ୟୁ ପରେ, ଏକ ଗମ୍ଭୀର ପ୍ରଶ୍ନ ଉଠିଛି ଯେ ଏହି ନକଲି ଔଷଧଗୁଡ଼ିକ ବର୍ତ୍ତମାନସୁଦ୍ଧା ଦ୍ୱାରା କେତେ ପରିମାଣରେ ପହଞ୍ଚିଥିବ। ପ୍ରତିବର୍ଷ, ବିଏସଏଫ ପଶ୍ଚିମବଙ୍ଗ, ଆସାମ ଏବଂ ତ୍ରିପୁରାରେ ଭାରତ-ବାଂଲାଦେଶ ସୀମାରେ ଅନେକ ଅବୈଧ ଜିନିଷ ଜବତ କରିଥାଏ। ଏଥିରେ ଫେନସିଡିଲ୍ କାଶ ସିରପ୍ ମଧ୍ୟ ରହିଛି। ପ୍ରଥମେ ଏହା ଔଷଧ ଭାବରେ ବ୍ୟବହୃତ ହେଉଥିଲା, ଏବେ କିନ୍ତୁ ଏହାକୁ ମଦ୍ୟପାନକାରୀ ନିଶା ଭାବରେ ବ୍ୟବହାର କରାଯାଉଛି।
କଖାରୁ, ବାଉଁଶ ଏବଂ କଂକ୍ରିଟରେ ଲୁଚାଇ ଚାଲାଣ ହେଉଥିଲା ଫେନସିଡିଲ:
ଚୋରାଚାଲାଣକାରୀମାନେ ଏହି ନିଶା ବୋତଲଗୁଡ଼ିକୁ ବଜାରକୁ ପରିବହନ କରିବା ପାଇଁ ଅସାଧାରଣ ପଦ୍ଧତି ଅବଲମ୍ବନ କରିଥିଲେ। ବିଏସଏଫ ଦ୍ୱାରା ଜବତ ହୋଇଥିବା ପ୍ରଥମ ବ୍ୟାଚ୍ରେ ଫମ୍ପା ବାଉଁଶ ଭିତରେ ଫେନସିଡିଲ୍ ବୋତଲକୁ ଲୁଚାଇ ଚାଲାଣ କରାଯାଉଥିବା ଜଣାପଡ଼ିଥିଲା। ପ୍ରଥମ ନଜରରେ, ସେଗୁଡ଼ିକ ସାଧାରଣ ବାଉଁଶ ପରି ମନେ ହେଉଥିଲା, କିନ୍ତୁ ଭଲ ଭାବରେ ଯାଞ୍ଚ କରିବା ପରେ ଜଣାପଡ଼ିଥିଲ ଯେ, ଏହି ବାଉଁଶ ଭିତରେ ଶହ ଶହ ସିରପ ବୋତଲ ଲୁଚାଯାଇଥିଲା।
ଦ୍ୱିତୀୟଥର ଯେତେବେଳେ ଜବତ କରାଯାଇଥିଲା, ସେତେବେଳେ କଂକ୍ରିଟ୍ ଖମ୍ବ ଭିତରେ ଏହାକୁ ଲଚାଇ ଚାଲାଣ କରାଯାଉଥିଲା। ଯେତେବେଳେ ଏହି କଂକ୍ରିଟର ଏହି ଖମ୍ବଗୁଡ଼ିକୁ ଭଙ୍ଗାଗଲା, ସେତେବେଳେ ବିଏସଏଫ କର୍ମଚାରୀମାନେ ଭିତରେ ଫେନସିଡିଲ୍ ବୋତଲରେ ଭର୍ତ୍ତି ଏକ ଲୁହାର ଥାକ ପାଇଥିଲେ।
ତୃତୀୟ ଜବତରେ, ବିଏସଏଫ ଜବାନକୁ ଏକ ଆଶ୍ଚର୍ଯ୍ୟ କଲାଭଳି ପ୍ରକ୍ରିୟା ଦେଖିବାକୁ ମିଳିଲା। କଖାରୁ ଭର୍ତ୍ତି ବ୍ୟାଗଗୁଡ଼ିକୁ ଜବତ କରିଥିଲା ବିଏସ୍ଏଫ୍। ଯାଞ୍ଚ କରିବା ପରେ ଜଣାପଡ଼ିଲା ଯେ, ଏହି କଖାରୁଗୁଡ଼ିକ ଫମ୍ପା ଥିଲା ଏବଂ କଖାରୁ ଭିତରେ ଫେନସିଡିଲ୍ ସିରପ ବୋତଲ ଥିଲା।
ଗତ ୨-୩ ବର୍ଷରେ ୬ କୋଟି କଫ୍ ସିରପ ଜବତ:
ବରିଷ୍ଠ ବିଏସଏଫ ଅଧିକାରୀମାନେ କହିଛନ୍ତି ଯେ ମୁଖ୍ୟ ଚୋରା ଚାଲାଣ କେନ୍ଦ୍ରଗୁଡ଼ିକ ହେଉଛି ଉତ୍ତର ୨୪ ପରଗନା, ନଦିଆ, ଦକ୍ଷିଣ ୨୪ ପରଗନା, ସିଲିଗୁଡି, କୁଚବିହାର, ଆଲିପୁରଦୁଆର ଏବଂ ଦିନାଜପୁର ଜିଲ୍ଲା। ଚୋରା ଚାଲାଣ ବାଟଗୁଡ଼ିକ ଆସାମ, ମଣିପୁର, ତ୍ରିପୁରା ଏବଂ ମେଘାଳୟକୁ ବ୍ୟାପିଛି। ଫେନସିଡିଲର ପ୍ରତ୍ୟେକ ବୋତଲର ମୂଲ୍ୟ ୭୦ ରୁ ୧୧୦ ଟଙ୍କା ମଧ୍ୟରେ। ଗତ ଦୁଇ ବର୍ଷ ମଧ୍ୟରେ କେବଳ ଦକ୍ଷିଣ ଏବଂ ଉତ୍ତର ବଙ୍ଗରେ ୬ କୋଟି ମୂଲ୍ୟର କଫ୍ ସିରପ ଜବତ କରାଯାଇଛି।
