ନୂଆଦିଲ୍ଲୀ: ବେଙ୍ଗାଲୁରୁ ଆୟକର ବିଭାଗକୁ ନେଇ ଏକ ରୋଚକ ମାମଲା ସାମ୍ନାକୁ ଆସିଛି। ଖବର ମୁତାବକ, ନଭେମ୍ବର ୨୦୧୯ରେ ଆୟକର ବିଭାଗ ଦ୍ୱାରା କରାଯାଇଥିବା ଏକ ତଲାସୀ ସମୟରେ, ସୁରେଶଙ୍କ (ଛଦ୍ମ ନାମ) ବାସଭବନରୁ ପ୍ରାୟ ୧.୬୫ କୋଟି ଟଙ୍କାର ସୁନା ଅଳଙ୍କାର ଏବଂ ୩ କିଲୋଗ୍ରାମ ଓଜନର ରୂପା ଜିନିଷ ଜବତ କରାଯାଇଥିଲା। ଇନଭଏସ୍, ବ୍ୟାଙ୍କ ଏବଂ କ୍ରେଡିଟ୍ କାର୍ଡ ପେମେଣ୍ଟ ଏବଂ ତଲାସୀ ସମୟରେ ପ୍ରସ୍ତୁତ ଇନଭେଣ୍ଟରୀ ମଧ୍ୟରେ ପାର୍ଥକ୍ୟକୁ ଦେଖି ସେଠାରେ ଥିବା ମୂଲ୍ୟାୟନ ଅଧିକାରୀମାନେ ଆୟକର ଆଇନର ଧାରା 69 ଅନୁଯାୟୀ ସୁରେଶଙ୍କ ଆୟରେ ଏହି ମୂଲ୍ୟକୁ ଆୟ ବହିର୍ଭୁତ ପୁଞ୍ଜି ଭାବରେ ଏହାକୁ ସିଜ୍ କରିଥିଲେ।
ଏହି ଅଳଙ୍କାରଗୁଡ଼ିକ ତାଙ୍କ ପତ୍ନୀ ଶୁଭା ସୁନୀଲଙ୍କର ବୋଲି ସୁରେଶ ଦାବି କରିଥିଲେ। ଏହାଛଡା ପୂର୍ବରୁ ଇନକମ୍ ଟ୍ୟାକ୍ସ ରିଟର୍ଣ୍ଣ (ITR) ଦାଖଲ ସମୟରେ ସେ ଏହି ସମ୍ପତ୍ତିଗୁଡ଼ିକର ତଥ୍ୟ ପ୍ରକାଶ କରିଥିଲେ ବୋଲି କହିଥିଲେ। ଏହା ଛଡା କିଛି ଅଳଙ୍କାର ପୈତୃକ କିମ୍ବା ଉପହାର ଭାବରେ ପ୍ରାପ୍ତ ହୋଇଛି ବୋଲି ସେ ଦାବି କରିଥିଲେ। ତେବେ ସେ ଏଥିପାଇଁ କୌଣସି ଆନୁଷ୍ଠାନିକ ପ୍ରମାଣ ପ୍ରଦାନ କରିପାରିନଥିଲେ। ତେଣୁ ତାଙ୍କ ଏ ସମସ୍ତ ସାମଗ୍ରୀକୁ ଆୟକର ବିଭିଗ ସିଜ୍ କରିନେଇଥିଲା। ମୂଲ୍ୟାୟନ ଅଧିକାରୀଙ୍କ ଏହି ନିଷ୍ପତ୍ତିରେ ଅସନ୍ତୁଷ୍ଟ ହୋଇ, ସୁରେଶ ଆପିଲ୍ କମିଶନର (CIT(A)) ଏବଂ ପରେ ବାଙ୍ଗାଲୋରର ଆୟକର ଆପିଲେଟ୍ ଟ୍ରିବ୍ୟୁନାଲ୍ (ITAT)ରେ ଏହା ବିରୋଧରେ ଏକ ମାମଲା ଆବେଦନ କରିଥିଲେ।
ଜାତୀୟ ଗଣମାଧ୍ୟମ ଇକୋନୋମିକ୍ ଟାଇମ୍ସର ଏକ ରିପୋର୍ଟ ଅନୁଯାୟୀ, ଚଳିତ ମା, ୧୧ ତାରିଖରେ, ITAT CIT(A)ର ଆଦେଶକୁ ସମର୍ଥନ କରିଥିଲା, ଯାହା ସୁରେଶଙ୍କ ସପକ୍ଷରେ ଥିଲା। ଟ୍ରିବ୍ୟୁନାଲ୍ ଉଲ୍ଲେଖ କରିଛନ୍ତି ଯେ ମୂଲ୍ୟାୟନ ଅଧିକାରୀ ପୂର୍ବରୁ ଧାରା ୧୪୩(୩), ୧୫୩ସି ଏବଂ ୧୫୩ଡି ଅନୁଯାୟୀ ଅଳଙ୍କାରର ଉତ୍ସ ଏବଂ ମାଲିକାନା ସ୍ୱୀକାର କରିସାରିଛନ୍ତି। ଯେହେତୁ ସମାନ ଅଳଙ୍କାର ପୂର୍ବରୁ ପତ୍ନୀଙ୍କ ଫେରସ୍ତରେ ଅନ୍ତର୍ଭୁକ୍ତ ଥିଲା, ସୁରେଶଙ୍କ ମାମଲାରେ ଏହାକୁ ଅସ୍ପଷ୍ଟ ବୋଲି ବିବେଚନା କରାଯାଇପାରିବ ନାହିଁ। ପରବର୍ତ୍ତୀ ସମୟରେ ରାଜସ୍ୱ ବିଭାଗର ଆବେଦନକୁ ମଧ୍ୟ ଖାରଜ କରାଯାଇଥିଲା। ଟ୍ରିବ୍ୟୁନାଲ୍ ଏହା ମଧ୍ୟ ଲକ୍ଷ୍ୟ କରିଥିଲେ ଯେ ଜବତ ଅଳଙ୍କାରର ଇନଭେଣ୍ଟରୀ ଏବଂ ବର୍ଣ୍ଣନା ଉଭୟ ମୂଲ୍ୟାଙ୍କନରେ ସମାନ ଥିଲା, ଯାହା ତାଙ୍କ ମାମଲାରେ ପୃଥକ ଭାବରେ ଯୋଡିବା ପାଇଁ କୌଣସି ଆଇନଗତ ପ୍ରମାଣ ଛାଡିନଥିଲା।
ITAT CIT-A ର ନିଷ୍ପତ୍ତିକୁ ସମର୍ଥନ କରିଛି ଏବଂ ଆୟକର ବିଭାଗର ଆବେଦନକୁ ଖାରଜ କରିଛି। ଚାଟାର୍ଡ ଆକାଉଣ୍ଟାଣ୍ଟ ସୁରେଶ ସୁରାନା କହିଛନ୍ତି ଯେ ଏପରି ପରିସ୍ଥିତିକୁ ଏଡାଇବା ପାଇଁ, ଲୋକମାନେ ପ୍ରତ୍ୟେକ କ୍ରୟ ପାଇଁ ଉପଯୁକ୍ତ ବିଲ୍ ଏବଂ ଡକ୍ୟୁମେଣ୍ଟ ରଖିବା ଉଚିତ। ଯଦି ଅଳଙ୍କାର ଏକ ଉପହାର କିମ୍ବା ଉତ୍ତରାଧିକାର ସୁତ୍ରରେ ପ୍ରାପ୍ତ ହେଉଛି, ତେବେ ମଧ୍ୟ ଉକ୍ତ ସାମଗ୍ରୀ ଗୁଡିକର ଡକ୍ୟୁମେଣ୍ଟ ଉପଲବ୍ଧ ରଖିବା ଉଚିତ। ଏହା ଟିକସ ଅଡିଟ୍ ସମୟରେ ଯେକୌଣସି ଅସୁବିଧାକୁ ରୋକିବାରେ ସହାୟକ ହେବ।
