ନୂଆଦିଲ୍ଲୀ,୨୭/୦୯: ରୁଷ ସହ ଏକ ବଡ଼ ଚୁକ୍ତି କରିବାକୁ ଯାଉଛି ଭାରତ । ଆମେରିକା ସହ ବିବାଦ ମଧ୍ୟରେ ଏହା ଅନେକ ମାତ୍ରାରେ ଗୁରୁତ୍ୱ ବହନ କରୁଛି । କୃଷି ଏବଂ ସାର କ୍ଷେତ୍ରରେ ଏକାଠି କାର୍ଯ୍ୟ କରିବାକୁ ଚିନ୍ତା କରୁଛନ୍ତି ଭାରତ ଏବଂ ରୁଷ । ପ୍ରକ୍ରିୟା ସହ ଜଡ଼ିତ ଜଣେ ବ୍ୟକ୍ତି ଏହି ସୂଚନା ଦେଇଛନ୍ତି ।
ବ୍ୟକ୍ତିଜଣକ କହିଛନ୍ତି ଯେ, ରୁଷ ସାର ଏବଂ କୃଷି ସହ ଜଡ଼ିତ କ୍ଷେତ୍ରଗୁଡ଼ିକରେ ଏକ ବଡ଼ ଖେଳାଳୀ । ଭାରତ ଏବଂ ରୁଷ ମଧ୍ୟରେ ଏ କ୍ଷେତ୍ରରେ ସହଯୋଗିତା ହେଲେ ଏହା ଉଭୟ ଦେଶ ମଧ୍ୟରେ ସମ୍ପର୍କକୁ ମଜଭୁତ କରିବ । ଏହି ସହଯୋଗିତା କେବଳ କ୍ରୟ ଏବଂ ବିକ୍ରୟ ମଧ୍ୟରେ ସୀମିତ ରହିବ ନାହିଁ । ରୁଷର ଉପ-ପ୍ରଧାନମନ୍ତ୍ରୀ ଦିମିତ୍ରୀ ପାଟ୍ରୁଶେଭ ଭାରତରେ ଆୟୋଜିତ ୱାର୍ଲଡ ଫୁଡ୍ ଇଣ୍ଡିଆ ଏକ୍ସପୋରେ ଭାଗ ନେଇ ଏ ପ୍ରସଙ୍ଗରେ ଆଲୋଚନା କରିଛନ୍ତି । ତାଙ୍କ ସହ ରୁଷ୍ର ଏକ ବଡ଼ ପ୍ରତିନିଧିଦଳ ଏଥିରେ ଯୋଗ ଦେଇଛନ୍ତି । ଭାରତରୁ ରୁଷକୁ ଚିଙ୍ଗୁଡି ରପ୍ତାନି ଯୋଜନାକୁ ଆଗକୁ ବଢ଼ାଇବାରେ ଏହି ଆଲୋଚନା ସହାୟକ ହେବ ।
ପ୍ରକାଶଯୋଗ୍ୟ, ଭାରତରୁ ଆସୁଥିବା ଚିଙ୍ଗୁଡ଼ି ଉପରେ ଆମେରିକା ୫୦% ଟିକସ ଲଗାଇଛି । ଏଭଳି କ୍ଷେତ୍ରରେ ରୁଷ ଭାରତୀୟ ଚିଙ୍ଗୁଡ଼ି ରପ୍ତାନିକାରୀଙ୍କ ପାଇଁ ଉତ୍ତମ ବଜାର ପାଲଟିପାରେ । ଉଭୟ ଦେଶ କୃଷି ଏବଂ ସାର ସମ୍ବନ୍ଧୀୟ କ୍ଷେତ୍ରରେ ଯୌଥ ଉଦ୍ୟୋଗ ସ୍ଥାପନ ଉପରେ ବିଚାର କରୁଥିବା ଜଣାପଡ଼ିଛି ।
ପ୍ରକାଶଯୋଗ୍ୟ, ଆମେରିକା ଭାରତରୁ ଚିଙ୍ଗୁଡ଼ି କ୍ରୟ କରୁଥିବା ସର୍ବବୃହତ୍ ରାଷ୍ଟ୍ର । ଏଠାକୁ ପ୍ରତିବର୍ଷ ବହୁ କୋଟି ଡଲାରର ଚିଙ୍ଗୁଡ଼ି ଭାରତରୁ ଯାଇଥାଏ । କିନ୍ତୁ ଆମେରିକା ଭାରତ ଉପରେ ଅନେକ ପ୍ରକାର ଶୁଳ୍କ ଲାଗୁ କରିଛି । ଏଥିରେ ଆଣ୍ଟି-ସବ୍ସିଡି ଡ୍ୟୁଟି ଏବଂ ଆଣ୍ଟି-ଡମ୍ପିଂ ଡ୍ୟୁଟି ସାମିଲ । ଫଳରେ ଭାରତୀୟ ଚିଙ୍ଗୁଡ଼ି ଉପରେ ମୋଟ ଟିକସ ୫୮%ରୁ ଅଧିକ ହେବା ସମ୍ଭାବନା ରହିଛି । ଫଳରେ ଭାରତୀୟ ଚିଙ୍ଗୁଡ଼ି ରପ୍ତାନିକାରୀ ଇକ୍ୱେଡର, ଇଣ୍ଡୋନେସିଆ, ଭିଏତ୍ନାମ ଏବଂ ଚୀନ୍ ଭଳି ଦେଶଗୁଡ଼ିକ ସହ ମୁକାବିଲା କରିପାରିବେ ନାହିଁ । ଉଚ୍ଚ ଟାରିଫ୍ ଯୋଗୁ ଦେଶର ବହୁ କୋଟି ଡଲାରର ରପ୍ତାନି ବ୍ୟାହତ ହୋଇଛି ।
ସୂତ୍ର ଅନୁସାରେ, ରୁଷର ବଜାର ଭାରତୀୟ ଚିଙ୍ଗୁଡ଼ି ରପ୍ତାନିକାରୀଙ୍କୁ ଆଶ୍ୱସ୍ତି ଦେଇପାରେ । ଯଦିଓ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ୍ ସହ ଭାରତର ବ୍ୟାପାରକୁ ସମାଲୋଚନା କରିଆସୁଛନ୍ତି ଭାରତ ଏହାକୁ ଖାତିର କରୁନାହିଁ । ଏହାମଧ୍ୟରେ ରୁଷ ଭାରତକୁ ସାର ରପ୍ତାନି ୨୦% ବଢ଼ାଇଛି ।
ଏ ବର୍ଷ ପ୍ରଥମ ୬ ମାସରେ ଏହା ୨୫ ଲକ୍ଷ ଟନ୍ ପର୍ଯ୍ୟନ୍ତ ପହଞ୍ଚିଛି । ରୁଷ ସାର ଉତ୍ପାଦକ ସଂଘ(ଆର୍ଏଏଫ୍ପି)ର ମୁଖ୍ୟ ଆଣ୍ଡ୍ରୁ ଗୁରୟେବ ନିକଟରେ କହିଥିଲେ ଯେ, ଭାରତର ମୋଟ ସାର ଆମଦାନିରେ ରୁଷର ଭାଗ ୩୩% ପର୍ଯ୍ୟନ୍ତ ପହଞ୍ଚିଛି । ଏହାର ଅର୍ଥ ଭାରତ ପକ୍ଷରୁ ଆମଦାନି କରାଯାଉଥିବା ପ୍ରତି ୩ ଟନ୍ ସାରରେ ଏକ ଟନ୍ ରୁଷ୍ରୁ ଆସିଥାଏ । ଗତ ୪ ବର୍ଷରେ ଭାରତ ଏବଂ ରୁଷ ମଧ୍ୟରେ ବାଣିଜ୍ୟିକ ସମ୍ପର୍କରେ ସାର ପ୍ରମୁଖ ଭୂମିକା ଗ୍ରହଣ କରିଛି । ରୁଷରୁ ଡିଏପି ଏବଂ ଅନ୍ୟ ଏନ୍ପିକେ ସାରର ଯୋଗାଣ ବଢ଼ାଯାଇଛି । ରୁଷର କୃଷି ଏବଂ ତତ୍ ସମ୍ବନ୍ଧୀୟ ବଜାରରେ ଭାରତୀୟ କମ୍ପାନିଙ୍କ ସଂଖ୍ୟା ୧୦୦୦ରେ ପହଞ୍ଚିଛି । ଏ କ୍ଷେତ୍ରରେ ସହଯୋଗ ବଢ଼ାଇବାର ଅଧିକ ସମ୍ଭାବନା ରହିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ୱାର୍ଲଡ ଫୁଡ୍ ଇଣ୍ଡିଆର ଉଦ୍ଘାଟନ କରିଛନ୍ତି । ଏ କାର୍ଯ୍ୟକ୍ରମରେ ପାଟ୍ରୁଶେଭ୍, ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡ଼କରୀ, ଖାଦ୍ୟ ପ୍ରକ୍ରିୟାକରଣ ମନ୍ତ୍ରୀ ଚିରାଗ ପାଶ୍ୱାନ ପ୍ରମୁଖ ସାମିଲ ହୋଇଥିଲେ । ଆମେରିକା ଭାରତୀୟ ଚିଙ୍ଗୁଡ଼ି ଉପରେ ଟାରିଫ୍ ଲଗାଇବା ପରେ ରୁଷ ଭାରତ ପାଇଁ ଏକ ଉତ୍ତମ ବଜାର ପାଲଟିପାରେ । ରୁଷ ଭାରତକୁ ଅଧିକ ମାତ୍ରାରେ ସାର ମଧ୍ୟ ଯୋଗାଉଛି । ଫଳରେ ଉଭୟ ଦେଶ ମଧ୍ୟରେ ସମ୍ପର୍କ ଆହୁରି ମଜଭୁତ ହେଉଛି । ୱାର୍ଲଡ ଫୁଡ୍ ଇଣ୍ଡିଆ ଏକ୍ସପୋରେ ଉଭୟ ଦେଶର ନେତୃତ୍ୱ ଏକତ୍ର ହୋଇ କୃଷି କ୍ଷେତ୍ରରେ ସହଯୋଗ ବଢ଼ାଇବା ଲାଗି ଆଲୋଚନା କରୁଛନ୍ତି ।
