ଭୁବନେଶ୍ୱର, ୨୧/୦୯: ଭାରତୀୟ ଜୁନିୟର ମହିଳା ହକି ଦଳ ଚଳିତ ମାସ ଅଷ୍ଟ୍ରେଲିଆ ଗସ୍ତ କରି ୫ମ୍ୟାଚ୍ ବିଶିଷ୍ଟ ସିରିଜ ଖେଳିବ । ଏଥିପାଇଁ ହକି ଇଣ୍ଡିଆ ପକ୍ଷରୁ ୨୩ଜଣିଆ ଦଳ ଘୋଷଣା ହୋଇଛି । ଏହି ଦଳରେ ଓଡ଼ିଶାରୁ ୪ଜଣ ଖେଳାଳି ସ୍ଥାନ ପାଇଛନ୍ତି । ସେମାନେ ହେଲେ ସୁନେଲିତା ଟପ୍ପୋ, ମମିତା ଓରାମ, ପୂଜା ସାହୁ ଏବଂ ରାଣୀ ମିଞ୍ଜ । ଜ୍ୟୋତି ସିଂହଙ୍କୁ ଦଳର ନେତୃତ୍ୱ ଦାୟିତ୍ୱ ପ୍ରଦାନ କରାଯାଇଛି ।
କାନବେରା ଠାରେ ଥିବା ଜାତୀୟ ହକି କେନ୍ଦ୍ରରେ ଆସନ୍ତା ୨୬ରୁ ଅକ୍ଟୋବର ୨ ତାରିଖ ପର୍ଯ୍ୟନ୍ତ ଏହି ସିରିଜ ଖେଳାଯିବ । ଭାରତୀୟ ଦଳ ଅଷ୍ଟ୍ରେଲିଆ ଜୁନିୟର ଦଳ ବିପକ୍ଷରେ ୩ଟି ମ୍ୟାଚ୍ ଏବଂ ଅଷ୍ଟ୍ରେଲିଆ ହକି ୱାନ୍ ଲିଗ୍ କ୍ଲବ୍ କାନବେରା ଚିଲ ବିପକ୍ଷରେ ଶେଷ ୨ଟି ମ୍ୟାଚ୍ ଖେଳିବ । ଏହି ସିରିଜ ଜରିଆରେ ଉଭୟ ଦଳ ଆଗାମୀ ଜୁନିୟର ମହିଳା ହକି ବିଶ୍ୱକପ୍ ପାଇଁ ପ୍ରସ୍ତୁତି କରିବେ । ଆଗାମୀ ଡିସେମ୍ବରରେ ଚିଲିର ସାଣ୍ଟିଆଗୋ ଠାରେ ଜୁନିୟର ବିଶ୍ୱକପ୍ ଅନୁଷ୍ଠିତ ହେବ ।
ଭାରତୀୟ ଦଳ
ଗୋଲ୍କିପର- ନିଧି, ରାଣୀ ମିଞ୍ଜ³ ଡିଫେଣ୍ଡର- ମନୀଷା, ଜ୍ୟୋତି ସିଂହ (ଅଧିନାୟିକା), ଲାଲ୍ଥନ୍ତଲୁଆଙ୍ଗି, ମମିତା ଓରାମ, ସାକ୍ଷୀ ଶୁକ୍ଳା, ପୂଜା ସାହୁ, ନନ୍ଦିନୀ³ ମିଡ୍ଫିଲ୍ଡର- ପ୍ରିୟଙ୍କା ଯାଦବ, ସାକ୍ଷୀ ରାଣା, କେଏସ୍. ଚାନୁ, ରଜନୀ କେରକେଟ୍ଟା, ବିନିମା ଧନ, ଈଶିକା, ସୁନେଲିତା ଟପ୍ପୋ, ଅନିଶା ସାହୁ³ ଫରୱାର୍ଡ- ଲାଲ୍ରିନପୁଇ, ନିଶା ମିଞ୍ଜ, ପୂର୍ଣ୍ଣିମା ଯାଦବ, ସୋନମ, କନିକା ସିୱାଚ, ସୁଖବୀର କୌର ।
