ନୂଆଦିଲ୍ଲୀ: ଉତ୍ତର କୋରିଆ ଶନିବାର କିମ୍ ଜୋଙ୍ଗ-ଉନ୍ ଙ୍କ ନେତୃତ୍ୱରେ, ଏହାର ୮୦ତମ ପ୍ରତିଷ୍ଠା ବାର୍ଷିକୀ ପାଳନ କରିଛି। କିମ୍ ଜୋଙ୍ଗ-ଉନ୍ ଏବଂ ବିଦେଶୀ ନେତାମାନଙ୍କ ଯୋଗଦାନ ସହ ଏକ ବିଶାଳ ସାମରିକ ପରେଡ୍ ସହିତ ଉତ୍ତର କୋରିଆ ପୁଣି ଥରେ ବିଶ୍ୱକୁ ଚକିତ କରିଦେଇଛି। ଏହି ପରେଡରେ କିମ୍ ଜୋଙ୍ଗ-ଉନ୍ ତାଙ୍କର ପରମାଣୁ-ସଶସ୍ତ୍ର ସାମରିକ ଶକ୍ତିଶାଳୀ ଅସ୍ତ୍ରଶସ୍ତ୍ର ପ୍ରଦର୍ଶନ କରିଛନ୍ତି, ଯେଉଁଥିରେ ଏକ ନୂତନ ଆନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର (ICBM) ମଦ୍ୟ ଅନ୍ତର୍ଭୁକ୍ତ ରହିଛି। ତେବେ ଏହି ଯେପଣାସ୍ତ୍ରକୁ ସେ ଆଗାମୀ ସପ୍ତାହଗୁଡ଼ିକରେ ପରୀକ୍ଷଣ କରିବାକୁ ଯୋଜନା କରୁଛନ୍ତି।
ରିପୋର୍ଟ ଅନୁଯାୟୀ, ଶୁକ୍ରବାର ରାତିରେ ଶାସକ ୱାର୍କର୍ସ ପାର୍ଟିର ପ୍ରତିଷ୍ଠାର 80ତମ ବାର୍ଷିକୀ ଉତ୍ସବରେ ପାଳନ କରାଯାଇଥିବା ଏହି ପରେଡ୍ କିମ୍ ଙ୍କ ବର୍ଦ୍ଧିତ କୂଟନୈତିକ ପ୍ରଭାବ ଏବଂ ଆମେରିକା ଏବଂ ଏସିଆରେ ତାଙ୍କ ପ୍ରତିଦ୍ୱନ୍ଦ୍ୱୀମାନଙ୍କୁ ପ୍ରଭାବଶାଳୀ ଭାବରେ ଟାର୍ଗେଟ କରିପାରୁଥିବା ଏକ ଅସ୍ତ୍ରାଗାର ନିର୍ମାଣ ପାଇଁ ତାଙ୍କ ପ୍ରୟାସକୁ ଦେଖାଇଥିଲା।
ଉତ୍ତର କୋରିଆର ସରକାରୀ ଖବର ପ୍ରସାରଣକାରୀ ସଂସ୍ଥା କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି(KCNA) ରିପୋର୍ଟ କରିଛି ଯେ ପରେଡ୍ ରେ ହ୍ୱାସଙ୍ଗ୍-୨୦ ନାମକ ଏକ ନୂତନ, ଏପର୍ଯ୍ୟନ୍ତ ପରୀକ୍ଷିତ ହୋଇନଥିବା ଆନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର ପ୍ରଦର୍ଶନ କରାଯାଇଥିଲା। ଯାହାକୁ କିମ୍ ଦେଶର ସର୍ବାଧିକ ଶକ୍ତିଶାଳୀ ପରମାଣୁ ରଣନୈତିକ ଅସ୍ତ୍ର ପ୍ରଣାଳୀ ଭାବରେ ବର୍ଣ୍ଣନା କରିଛନ୍ତି। ପ୍ରଦର୍ଶିତ ଅନ୍ୟାନ୍ୟ ଅସ୍ତ୍ର ମଧ୍ୟରେ କ୍ଷୁଦ୍ର ଦୂରଗାମୀ ବାଲିଷ୍ଟିକ୍, କ୍ରୁଜ୍ ଏବଂ ସୁପରସୋନିକ୍ କ୍ଷେପଣାସ୍ତ୍ର ମଦ୍ୟ ଅନ୍ତର୍ଭୁକ୍ତ ରହିଛି। ଯାହାକୁ ଉତ୍ତର କୋରିଆ ପୂର୍ବରୁ ପ୍ରତିଦ୍ୱନ୍ଦ୍ୱୀ ଦକ୍ଷିଣ କୋରିଆର ଲକ୍ଷ୍ୟସ୍ଥଳ ଉପରେ ପରମାଣୁ ଆକ୍ରମଣ କରିବାକୁ ସକ୍ଷମ ବୋଲି ବର୍ଣ୍ଣନା କରିଛି।
ଉତ୍ତର କୋରିଆର ସରକାରୀ ନ୍ୟୁଜ୍ ଏଜେନ୍ସି ଅନୁଯାୟୀ, ପରେଡରେ ଏକ ଭାଷଣରେ କିମ୍ କହିଥିଲେ ଯେ ତାଙ୍କ ସାମରିକ ବାହିନୀ ଦେଶ ଉପରେ ଥିବା ସମସ୍ତ ବିପଦକୁ ଦୂର କରିପାରିବ। କିନ୍ତୁ ସେ ୱାଶିଂଟନ୍ କିମ୍ବା ସିଓଲ ବିଷୟରେ ସିଧାସଳଖ ଉଲ୍ଲେଖ କରିନଥିଲେ।
ରୁଷିଆର TASS ନ୍ୟୁଜ୍ ଏଜେନ୍ସିରୁ ମିଳିଥିବା ଫଟୋ ଏବଂ ଭିଡିଓରେ ହଜାର ହଜାର ଦର୍ଶକ କିମ୍ ଜୋଙ୍ଗ ଉନଙ୍କ ପ୍ରତିଷ୍ଠାତା ପିତାମହଙ୍କ ନାମରେ ନାମିତ ଆଲୋକିତ କିମ୍ ଇଲ୍ ସୁଙ୍ଗ ସ୍କୋୟାର ଦେଇ କ୍ଷେପଣାସ୍ତ୍ର-ସ୍ଥାପିତ ଯାନଗୁଡ଼ିକୁ ଯାଉଥିବାର ଦେଖୁଥିବା ଦେଖାଯାଇଛି। KCNA ଅନୁଯାୟୀ, ପରେଡ୍ ସମୟରେ ମାର୍ଚ୍ଚ କରୁଥିବା ସୈନ୍ୟମାନଙ୍କ ମଧ୍ୟରେ ବିଦେଶୀ ଅପରେସନ୍ ୟୁନିଟ୍ ମଧ୍ୟ ସାମିଲ ଥିଲା। ଯାହା ସୂଚାଇ ଥିଲା ଯେ ଏମାନେ ୟୁକ୍ରେନ ବିରୁଦ୍ଧରେ ଯୁଦ୍ଧ ପ୍ରୟାସରେ ଯୋଗଦେବା ପାଇଁ ରୁଷକୁ ପଠାଇଥିବା ସୈନ୍ୟ ଥିଲେ।
ୟୁକ୍ରେନ ଆକ୍ରମଣ ପରଠାରୁ, କିମ୍ ରୁଷ ସହ ବୈଦେଶିକ ନୀତି ପ୍ରାଥମିକତା ଦେଉଛନ୍ତି। ସେ ପୁଟିନଙ୍କ ଯୁଦ୍ଧ ପ୍ରୟାସକୁ ଶକ୍ତିଶାଳୀ କରିବା ପାଇଁ ନିଜ ଦେଶର ହଜାର ହଜାର ସୈନ୍ୟ ଏବଂ ବାଲିଷ୍ଟିକ୍ ମିସାଇଲ୍ ସହ ଅସ୍ତ୍ରଶସ୍ତ୍ରର ସହାୟତା ମଧ୍ୟ ପ୍ରଦାନ କରୁଛନ୍ତି। କିମ୍ ଗତ ମାସରେ ଚୀନ୍ ମଧ୍ୟ ଗସ୍ତ କରିଥିଲେ। ଏହି ବିଶାଳ ସାମରିକ ପରେଡ୍ ରେ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଏବଂ ପୁଟିନଙ୍କ ଉଭୟ ଦେଖାଦେଇଥିଲେ।
