କେସିଙ୍ଗା,୧୧/୦୬: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ ଢାଞ୍ଚାରେ ରାଜ୍ୟର ପ୍ରତି ବ୍ଲକରେ ଗୋଟିଏ ଲେଖାଏଁ ଓଡିଶା ଆଦର୍ଶ ବିଦ୍ୟାଳୟ ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ହେଉଛି । ଏଥିରେ ଷଷ୍ଠ ଶ୍ରେଣୀରୁ ଦ୍ଵାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କୁ ଶିକ୍ଷାଦାନ କରାଯାଉଛି । କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକର ଓଡ଼ିଶା ଆଦର୍ଶ ବିଦ୍ୟାଳୟ ଲଇତରା ପଞ୍ଚାୟତ ଅନ୍ତର୍ଗତ ମଶାଣିମୁଣ୍ଡା ଗାଁ ମୌଜାରେ ଗତ ୨୦୧୬ -୧୭ ମସିହାରୁ ଖୋଲାଯାଇଛି । ହେଲେ ବିଦ୍ୟାଳୟ ଖୋଲିବାର ଦୀର୍ଘ ୮ ବର୍ଷ ପରେ ମଧ୍ୟ ଛାତ୍ରଛାତ୍ରୀମାନଙ୍କ ଯିବା ଆସିବା କରିବା ପାଇଁ ଭଲ ରାସ୍ତାଟିଏ ନିର୍ମାଣ ହୋଇ ପାରିନାହିଁ । ମୁଖ୍ୟ ରାସ୍ତା ଠାରୁ ବିଦ୍ୟାଳୟ ପର୍ଯ୍ୟନ୍ତ ପ୍ରାୟ ୫ ଶହ ମିଟର ରାସ୍ତା କଚ୍ଚା ରାସ୍ତା ରହିଛି । ରାସ୍ତାର ଅବସ୍ଥା ଖରାପ ହୋଇଥିବା ବେଳେ ସାମାନ୍ୟ ବର୍ଷା ହେଲେ କାଦୁଅ ସରସର ହୋଇଯାଉଛି । ଯାହା ଫଳରେ ପିଲାମାନେ ବିଦ୍ୟାଳୟକୁ ଯିବା ଆସିବା କରିବା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି । ଏନେଇ ଗଣମାଧ୍ୟମ ଜରିଆରେ ଅନେକ ଥର ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି । ହେଲେ ବର୍ତ୍ତମାନ ସୁଦ୍ଧା କୌଣସି ସୁଫଳ ମିଳିନାହିଁ । ବିଦ୍ୟାଳୟ ରାସ୍ତା ସମସ୍ୟାକୁ ନେଇ ଆଗାମୀ ଦିନରେ ଅଭିଭାବକଙ୍କ ତରଫରୁ ଆନ୍ଦୋଳନ କରାଯିବ ବୋଲି ଚେତାବନୀ ମଧ୍ୟ ଦିଆଯାଇଛି ।      

କହିରଖୁ କି, କେସିଙ୍ଗା ବ୍ଳକ ଅଞ୍ଚଳରୁ ପ୍ରତ୍ୟେକ ଦିନ ସାଇକେଲ ଯୋଗେ ଅଧିକାଂଶ ଛାତ୍ରଛାତ୍ରୀ ବିଦ୍ୟାଳୟକୁ ଯିବା ଆସିବା କରିଥାନ୍ତି । କେତେକ ଛାତ୍ରଛାତ୍ରୀଙ୍କୁ ଅଭିଭାବକମାନେ ନିଜର ମୋଟର ସାଇକେଲରେ ନେବା ଆଣିବା କରିଥାନ୍ତି । ବିଜେଡି ସରକାର ଅମଳରେ କେସିଙ୍ଗା ବ୍ଲକର ଓଡ଼ିଶା ଆଦର୍ଶ ବିଦ୍ୟାଳୟକୁ 5-T ଯୋଜନାରେ ସାମିଲ କରାଯାଇଥିଲା ଏବଂ ବିଦ୍ୟାଳୟ ରୂପାନ୍ତରୀକରଣ ନାମରେ ଲକ୍ଷାଧିକ ଟଙ୍କା ଅନୁଦାନ ଯୋଗାଇ ଦିଆଯାଇଥିଲା । ହେଲେ ବିଦ୍ୟାଳୟର ରାସ୍ତା ପ୍ରତି ଦୃଷ୍ଟି ଦିଆଯାଇନଥିଲା । କଳାହାଣ୍ଡି ଜିଲ୍ଲାପାଳଙ୍କ ସମେତ ଅନେକ ଉଚ୍ଚ ପଦସ୍ଥ ଅଧିକାରୀ କଚ୍ଚା ରାସ୍ତା ଦେଇ ବିଦ୍ୟାଳୟକୁ ଯିବା ଆସିବା କରିଥିଲେ ମଧ୍ୟ କାହାର ଦୃଷ୍ଟି ପଡୁ ନଥିବା ଦୁଃଖର ବିଷୟ ବୋଲି ଅଭିଭାବକମାନେ କହିଛନ୍ତି । ବର୍ତ୍ତମାନ ଖରା ଛୁଟି ସରିବାକୁ ବସିଲାଣି । ଆଉ କିଛି ଦିନ ପରେ ସ୍କୁଲ ଖୋଲିବା ସହିତ ବର୍ଷା ଋତୁ ମଧ୍ୟ ଆରମ୍ଭ ହୋଇଯିବ । ପୁଣି ସେହି ସମସ୍ୟା ହେବ ବୋଲି ଅଭିଭାବକ ମହଲରେ ଅଭିଯୋଗ ହେଉଛି । 

ତେବେ ଓଡିଶା ଆଦର୍ଶ ବିଦ୍ୟାଳୟ ରାସ୍ତାର ଶୋଚନୀୟ ଅବସ୍ଥାକୁ ଦେଖି କେସିଙ୍ଗା ବିଡିଓ ଜନ୍ମେଜୟ ସ୍ୱାଇଁ ତତ୍ପରତା ଦେଖାଇଛନ୍ତି । ବିକଶିତ ଗାଁ ବିକଶିତ ଓଡିଶା ଯୋଜନାରେ ୧୦ ଲକ୍ଷ ଟଙ୍କା ଅନୁଦାନ ଯୋଗାଇ ଦିଆଯାଇ ଆସନ୍ତା ୧୫ ଦିନ ଭିତରେ ପକ୍କା ରାସ୍ତା ନିର୍ମାଣ କରାଯିବ ବୋଲି କେସିଙ୍ଗା ବିଡିଓ ଜନ୍ମେଜୟ ସ୍ବାଇଁ କହିଛନ୍ତି ।