ଭୁବନେଶ୍ୱର,୨୯/୦୯: ବିଜେଡିର ନୂଆପଡ଼ା ବିଧାୟକ ତଥା ପୂର୍ବତନ ମନ୍ତ୍ରୀ ରାଜେନ୍ଦ୍ର ଢୋଲକିଆଙ୍କ ପରଲୋକ ପରେ ଖାଲିପଡ଼ିଥିବା ଆସନରେ ହେବାକୁ ଥିବା ଉପନିର୍ବାଚନ ବିହାର ବିଧାନସଭା ନିର୍ବାଚନ ସହ ହେବ । ଆସନ୍ତା ନଭେମ୍ବରରେ ଏହି ଉପନିର୍ବାଚନ ହୋଇପାରେ ବୋଲି ବିଭିନ୍ନ ଜାତୀୟ ଗଣମାଧ୍ୟମ ଆକଳନ କରିଛନ୍ତି ।
ସେହିପରି ବିହାର ବିଧାନସଭା ନିର୍ବାଚନ ସହ ନୂଆପଡ଼ା ଉପନିର୍ବାଚନ ବେଳେ ନିଯୁକ୍ତ ହେବେ କେନ୍ଦ୍ରୀୟ ପର୍ଯ୍ୟବେକ୍ଷକ । ଏହି ପର୍ଯ୍ୟବେକ୍ଷକମାନେ ନିର୍ବାଚନମଣ୍ଡଳୀରେ ନିର୍ବାଚନ ପରିଚାଳନା ତଦାରଖ କରିବେ । ସେମାନେ ଆୟୋଗଙ୍କୁ ରିପୋର୍ଟ କରିବେ । ଖର୍ଚ୍ଚ ପର୍ଯ୍ୟବେକ୍ଷକମାନଙ୍କୁ ପ୍ରାର୍ଥୀମାନଙ୍କ ଦ୍ୱାରା ହୋଇଥିବା ନିର୍ବାଚନ ଖର୍ଚ୍ଚ ଯାଞ୍ଚ କରିବା ପାଇଁ ନିଯୁକ୍ତ କରାଯାଏ । ଏହି ପର୍ଯ୍ୟବେକ୍ଷକମାନେ ବିହାର ବିଧାନସଭା ନିର୍ବାଚନ ସହ ଓଡ଼ିଶାର ନୂଆପଡ଼ା, ଜମ୍ମୁ ଏବଂ କାଶ୍ମୀରର ବଡଗାମ ଏବଂ ନାଗ୍ରୋଟା, ରାଜସ୍ଥାନର ଅନ୍ତା, ଝାଡ଼ଖଣ୍ଡର ଘାଟସିଳା, ତେଲଙ୍ଗାନାର ଜୁବଲି ହିଲ୍ସ, ପଞ୍ଜାବର ତରନତାରନ, ମିଜୋରାମର ଡମ୍ପାରେ ଉପନିର୍ବାଚନ ପାଇଁ କାର୍ଯ୍ୟ କରିବେ । କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ୪୭୦ ଅଧିକାରୀ ନିୟୋଜିତ ହେବେ । ସେଥିମଧ୍ୟରେ ୩୨୦ ଆଇଏଏସ୍, ୬୦ ଆଇପିଏସ୍ ଏବଂ ୯୦ ଆଇଆର୍ଏସ୍/ ଆଇଆରଏଏସ୍/ଆଇସିଏଏସ୍ ରହିବେ ।
ବିହାର ନିର୍ବାଚନ ଓ ଅନ୍ୟ ରାଜ୍ୟଗୁଡ଼ିକରେ ହେବାକୁ ଥିବା ଉପନିର୍ବାଚନରେ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ଓଡ଼ିଶାରୁ ୧୦ ଜଣ ଆଇଏଏସ୍ ଓ ୨ଜଣ ଆଇପିଏସ୍ଙ୍କୁ ନିଯୁକ୍ତ କରାଯାଇଛି । ସେମାନଙ୍କୁ ଆସନ୍ତାକାଲି(ସୋମବାର) ନୂଆଦିଲ୍ଲୀର ଦ୍ୱାରକାରେ ଥିବା ଇଣ୍ଡିଆ ଇଣ୍ଟରନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଡେମୋକ୍ରେସି ଆଣ୍ଡ ଇଲେକ୍ସନ୍ ମ୍ୟାନେଜମେଣ୍ଟ୍ (ଆଇଆଇଆଇଡିଇଏମ୍)ରେ ତାଲିମ ଦିଆଯିବ । ଓଡ଼ିଶାରୁ ଥିବା ଆଇଏଏସ୍ ତାଲିକାରେ ରାଜେଶ ପ୍ରଭାକର ପାଟିଲ, ଅରବିନ୍ଦ ଅଗ୍ରୱାଲ, ବଲୱନ୍ତ ସିଂ, ଭୁପିନ୍ଦର ସିଂ ପୁନିଆ, ବି ପରମେଶ୍ୱରନ୍, ଡି ପ୍ରଶାନ୍ତ କୁମାର ରେଡ୍ଡି, ପ୍ରେମଚନ୍ଦ୍ର ଚୌଧୁରୀ, ଇନ୍ଦ୍ରମଣି ତ୍ରିପାଠୀ, ସିଦ୍ଧାର୍ଥ ଦାସ, ଶୁଭଶ୍ରୀ ନନ୍ଦ ଅଛନ୍ତି । ସେହିପରି ୨୦୦୦ ବ୍ୟାଚ୍ ଆଇପିଏସ୍ ପ୍ରତୀକ ମହାନ୍ତି ଓ ୨୦୦୧ର ସାଇନି ଏସ୍ ମଧ୍ୟ ଏହି ପର୍ଯ୍ୟବେକ୍ଷକ ତାଲିକାରେ ଥିବା ଭାରତ ନିର୍ବାଚନ ଆୟୋଗଙ୍କ ପକ୍ଷରୁ ଓଡ଼ିଶା ମୁଖ୍ୟ ନିର୍ବାଚନ ଅଧିକାରୀଙ୍କୁ ଲେଖା ଯାଇଥିବା ଚିଠିରେ ସୂଚିତ କରାଯାଇଛି ।
