ନୂଆଦିଲ୍ଲୀ/ଜଗତସିଂହପୁର,୦୪/୧୧: ହିଂସାଗ୍ରସ୍ତ ସୁଦାନରେ ଜଣେ ଓଡ଼ିଆ ପୁଅଙ୍କୁ ଅପହରଣ କରି ନିଆଯାଇଛି । ସେଠାକାର ଉଗ୍ରବାଦୀ ସଙ୍ଗଠନ ‘ରାପିଡ୍ ସପୋର୍ଟ ଫୋର୍ସେସ (ଆର୍ଏସ୍ଏଫ୍)’ ହିଁ ଏହି କାଣ୍ଡ ଭିଆଇଛି । ଏହାର ଏକ ଭିଡିଓ ସାମ୍ନାକୁ ଆସିବା ପରେ ପରିବାରରେ କାନ୍ଦ ବୋବାଳି ପଡ଼ିଛି । ଉତ୍ତର ଆଫ୍ରିକାର ଏହି ଦେଶରୁ ପୁଅକୁ ସୁରକ୍ଷିତ ଫେରାଇ ଆଣିବା ଲାଗି ପରିବାର ଲୋକ ନିବେଦନ କରିଛନ୍ତି ।
ଉଗ୍ରବାଦୀ ସଙ୍ଗଠନ ଆର୍ଏସ୍ଏଫ୍ ଦ୍ୱାରା ଅପହୃତ ହୋଇଥିବା ଯୁବକ ଜଣକ ହେଉଛନ୍ତି ଆଦର୍ଶ ବେହେରା (୩୬) । ଘର ଜଗତ୍ସିଂହପୁର ଜିଲ୍ଲାର ତିର୍ତ୍ତୋଲ ବ୍ଲକ ଅଧୀନ ତରଜଙ୍ଗା ପଞ୍ଚାୟତସ୍ଥିତ କୋଟକଣା ଗ୍ରାମରେ । ଏବେ ତାଙ୍କୁ ଉଗ୍ରବାଦୀମାନେ ସୁଦାନର ଅଲ୍ଫସିରରେ ବନ୍ଦୀ କରି ରଖିଛନ୍ତି । ସେଠାରେ ଆର୍ଏସ୍ଏଫ୍ ଉଗ୍ରବାଦୀଙ୍କ ଦବ୍ଦବା ଥିବାରୁ ତାଙ୍କୁ ପଣବନ୍ଦୀ ରଖାଯାଇଛି ।
ମୁମ୍ୱାଇରେ କାମ କରିବା ସମୟରେ ଆଦର୍ଶ ଏକ କମ୍ପାନିର ମାଲିକଙ୍କ ପରାମର୍ଶରେ ସୁଦାନର ଏକ ପ୍ଲାଷ୍ଟିକ କାରଖାନାରେ କାମ କରିବାକୁ ଚୁକ୍ତିବଦ୍ଧ ହୋଇଥିଲେ । ସୁଦାନରେ ପ୍ରଥମ ୮ ମାସ ଠିକ୍ଠାକ୍ ରହିଥିଲା । କିନ୍ତୁ ଯୁଦ୍ଧ ଲାଗିବା ପରେ ସମସ୍ୟାରେ ପଡ଼ିଯାଇଥିଲେ ଆଦର୍ଶ । ବର୍ତ୍ତମାନ ସେ ପଣବନ୍ଦୀ । ଦୁଇ ବର୍ଷ ଧରି ଠିକ୍ରେ ଖାଇବାକୁ ପାଉ ନାହାନ୍ତି । ଦୀର୍ଘ ମାସ ଧରି ପରିବାର ସହ କଥା ହୋଇନାହାନ୍ତି । ଏକ ଭିଡିଓ ବାର୍ତ୍ତା ଜାରି କରି ଆଦର୍ଶ ରାଜ୍ୟ ସରକାରଙ୍କୁ ଉଦ୍ଧାର କରିବାକୁ ନିବେଦନ କରିଛନ୍ତି ।
ଗ୍ରାମବାସୀଙ୍କ ସୂଚନା ମୁତାବକ, ଆଦର୍ଶ ବେହେରାଙ୍କ ପରିବାର କହିଲେ ବାପା କ୍ଷେତ୍ରବାସୀ ବେହେରା, ମା’ ଆରତୀ, ପତ୍ନୀ ଓ ଦୁଇ ପୁତ୍ର (୮, ୩) । ଆଦର୍ଶଙ୍କ ସାନ ଭାଇ ଗୁଜରାଟରେ କାର୍ଯ୍ୟ କରୁଥିଲେ । ସେ ଏବେ ନିଜ ପରିବାର ସହ ଗ୍ରାମରେ ରହୁଛନ୍ତି । ବର୍ତ୍ତମାନ ସୁଦାନରେ ଆଦର୍ଶଙ୍କ ସହ ଆଉ ଦୁଇ ଜଣ ଫସି ରହିଥିବା କୁହାଯାଉଛି ।
ସୁଦାନର ରାଜଧାନୀ ଖାର୍ତୁମ୍ଠାରୁ ପ୍ରାୟ ୧,୦୦୦ କିଲୋମିଟର ଦୂରରେ ଥିବା ଅଲ୍ ଫସିର ସହରରୁ ଆଦର୍ଶଙ୍କୁ ଅପହରଣ କରାଯାଇଛି । ୨୦୨୨ ମସିହାରୁ ଆଦର୍ଶ ସୁଦାନରେ ‘ସୁକାରାତି ପ୍ଲାଷ୍ଟିକ ଫ୍ୟାକ୍ଟ୍ରି’ ନାମକ ଏକ କମ୍ପାନିରେ କାମ କରୁଥିଲେ । କେଉଁ କାରଣରୁ ଉଗ୍ରବାଦୀମାନେ ତାଙ୍କୁ ଅପହରଣ କରିନେଲେ ତାହା ନେଇ ଜଣାପଡ଼ି ନାହିଁ ।
ଉଗ୍ରବାଦୀଙ୍କ ସହ ଆଦର୍ଶଙ୍କର ଏକ ଭିଡିଓ ସାମ୍ନାକୁ ଆସିଛି । ଭିଡିଓରେ ଆଦର୍ଶ ଦୁଇଜଣ ଉଗ୍ରବାଦୀଙ୍କ ସହ ବସିଛନ୍ତି । ତାଙ୍କୁ ସେମାନେ ବିଭିନ୍ନ ପ୍ରଶ୍ନ ପଚାରୁଛନ୍ତି । ‘ତୁମେ ଶାହରୁଖ୍ ଖାନ୍ଙ୍କୁ ଜାଣିଛ କି’ ବୋଲି ସେମାନେ ପଚାରିଥିଲେ । ଆଉ ଜଣେ ସଦସ୍ୟ ଆଦର୍ଶଙ୍କୁ କ୍ୟାମେରାକୁ ଚାହିଁ ‘ଦାଗାଲୋ ଭଲ’ ବୋଲି କହିବାକୁ ବାଧ୍ୟ କରୁଥିବା ଦେଖିବାକୁ ମିଳିଛି । ମହମ୍ମଦ ହମଦାନ୍ ଦାଗାଲୋ ହେଉଛି ଆର୍ଏସ୍ଏଫ୍ର ନେତା ।
ପରିବାର ଦେଖାଇଥିବା ଏକ ଭିଡିଓରେ ଆଦର୍ଶ ହାତ ଯୋଡ଼ି ଉଦ୍ଧାର ପାଇଁ ନେହୁରା ହେଉଛନ୍ତି । ସେ କହୁଛନ୍ତି, ‘ଅଲ୍ ଫସିର ସହରରେ ମୁଁ ଦୁଇବର୍ଷ ହେଲା ବହୁ କଷ୍ଟରେ ରହୁଛି । ମୋ ପରିବାର ଓ ସନ୍ତାନ ମୋ ପାଇଁ ଚିନ୍ତାରେ ଅଛନ୍ତି । ମୁଁ ଓଡ଼ିଶା ସରକାରଙ୍କୁ ସହାୟତା ଯୋଗାଇବାକୁ ଅନୁରୋଧ କରୁଛି ।
ଉଲ୍ଲେଖଥାଉ କି ୨୦୨୩ରୁ ସୁଦାନରେ ସଶସ୍ତ୍ର ବଳ ଏବଂ ଆର୍ଏସ୍ଏଫ୍ ମଧ୍ୟରେ ହିଂସାତ୍ମକ ସଙ୍ଘର୍ଷ ଜାରି ରହିଛି । ଏହାଯୋଗୁ ୧ କୋଟି ୩୦ ଲକ୍ଷ ଲୋକ ବିସ୍ଥାପିତ ହୋଇଛନ୍ତି । ରାଜଧାନୀ ଖାର୍ତୁମ୍ରେ ଏହି ସଙ୍ଘର୍ଷ ଭୟାବହ ରୂପ ନେଇଛି । ଅଲ୍ ଫସିର୍ ସହରକୁ ସମ୍ପୂର୍ଣ୍ଣ କବ୍ଜା କରିନେଇଛନ୍ତି ଉଗ୍ରବାଦୀ । ଘଟଣାକୁ ନେଇ ଅନ୍ତର୍ଜାତୀୟ ଅପରାଧ କୋର୍ଟ ସୋମବାର ସତର୍କତା ଜାରି କରିଛନ୍ତି । ସୁଦାନରେ ଗଣହତ୍ୟା, ଗଣବଳାତ୍କାର ଘଟଣା ବଢୁଥିବାରୁ ଆର୍ଏସ୍ଏଫ୍ର କାର୍ଯ୍ୟ ଯୁଦ୍ଧ ଅପରାଧ ବିବେଚିତ ହେବ ବୋଲି କହିଛନ୍ତି ।
ଆଦର୍ଶଙ୍କ ଉଦ୍ଧାର ସଂକ୍ରାନ୍ତରେ ଭାରତରେ ଅବସ୍ଥାପିତ ସୁଦାନ ରାଷ୍ଟ୍ରଦୂତ ଡ. ମହମ୍ମଦ ଅବ୍ଦଲ୍ଲା ଅଲ୍ ଏଲ୍ଟମ୍ ଯେଉଁ ଟିପ୍ପଣୀ ଦେଇଛନ୍ତି, ତାହା ତାଙ୍କ ଉଦ୍ଧାର ନେଇ ପ୍ରଶ୍ନବାଚୀ ସୃଷ୍ଟି କରିଛି । ସେ କହିଛନ୍ତି, ଅଲ୍ ଫସିରକୁ ଆମର ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ବର୍ତ୍ତମାନ କେହି କାହା ସହ କୌଣସି ପ୍ରକାର ଯୋଗାଯୋଗ କରିପାରୁ ନାହାନ୍ତି । ଆମେ ଆଶା କରୁଛୁ ତାଙ୍କର କୌଣସି କ୍ଷତି ହୋଇ ନ ଥିବ । ସେ ଶୀଘ୍ର ଫେରି ଆସନ୍ତୁ ବୋଲି ଆମେ ଆଶା କରୁଛୁ ।
ଚଳିତବର୍ଷ ମାର୍ଚ୍ଚ ୨୨ରେ କେନ୍ଦ୍ରୀୟ ଖାର୍ତୁମ୍ରେ ଥିବା ରାଷ୍ଟ୍ରପତି ଭବନକୁ ଉଗ୍ରବାଦୀମାନେ ପୁନଃ ଅକ୍ତିଆର କରିନେଇଥିଲେ । ତେବେ ଆର୍ଏସ୍ଏଫ୍ର ଡ୍ରୋନ୍ ଆକ୍ରମଣରେ ଜଣେ ସେନା ମୁଖପାତ୍ର ଏବଂ ସୁଦାନ ଟିଭିର ୩ ଜଣ କ୍ରୁ ସଦସ୍ୟ ପ୍ରାଣ ହରାଇଥିଲେ । ବର୍ତ୍ତମାନ ଏହି ହିଂସାତ୍ମକ ସଙ୍ଘର୍ଷ ନର୍ଥ ଡାର୍ଫର୍କୁ ବ୍ୟାପିଯାଇଛି । ଏଠାରେ ଆର୍ଏସ୍ଏଫ୍ ଏବଂ ଡାର୍ଫର୍ ମିଳିତ ସୁରକ୍ଷା ବାହିନୀ ମଧ୍ୟରେ ଜୋରଦାର ମୁହାଁମୁହିଁ ଲାଗିରହିଛି । ଏହିଭଳି ଏକ ଘଟଣାକ୍ରମେ ଆର୍ଏସ୍ଏଫ୍ ଉଗ୍ରବାଦୀମାନେ ୭୦୦ରୁ ଅଧିକ ଗାଡ଼ିରେ ଆସି ମିଳିତ ବାହିନୀ ଉପରେ ଆକ୍ରମଣ କରିଥିଲେ । କିନ୍ତୁ ସେମାନଙ୍କ ଉପରେ ମିଳିତ ବାହିନୀ ଭାରୀ ପଡ଼ିଥିଲା । ଏହି ସଙ୍ଘର୍ଷରେ ୧୦୦ ଉଗ୍ରବାଦୀ ନିପାତ ହୋଇଥିଲେ । ୩୦ଟି ଗାଡ଼ି ଜବତ ହୋଇଥିଲା । ୧୭ଟି ନଷ୍ଟ ହୋଇଯାଇଥିଲା ।
