ନୂଆଦିଲ୍ଲୀ: ପାକିସ୍ତାନୀ ସେନାର ଅମାନବୀୟ କଳାକାରନାମା ପୁଣିଥରେ ପଦାରେ ପଡିଛି। ପାକିସ୍ତାନ ଅଧିକୃତ ଜମ୍ମୁ ଓ କାଶ୍ମୀର (PoJK)ରେ ଶାନ୍ତିପୂର୍ଣ୍ଣ ପ୍ରଦର୍ଶନକାରୀଙ୍କ ଉପରେ ପାକିସ୍ତାନୀ ସୁରକ୍ଷା ବାହିନୀ ଅତ୍ୟନ୍ତ ନିର୍ମମ ଭାବେ ଗୁଳି ଚଳାଇଛି। ଏହି ଘଟଣାର ଏକ ଭିଡିଓ ସାମ୍ନାକୁ ଆସିଛି, ଯାହା ଫଳରେ ୬ ଜଣଙ୍କର ମୃତ୍ୟୁ ଘଟିଛି। ପ୍ରତିବାଦକାରୀମାନେ ଆତ୍ମନିର୍ଣ୍ଣୟର ଅଧିକାର, ସୁଲଭ ବିଦ୍ୟୁତ୍ ଏବଂ ଅଟା ଯୋଗାଣ ସମେତ ସେମାନଙ୍କର ୩୮ ଦଫା ଦାବି ପାଇଁ ରାସ୍ତାକୁ ଓହ୍ଲାଇଛନ୍ତି।
ଜାତୀୟ ଖବର ସରବରାହ ସଂସ୍ଥା ANI ରିପୋର୍ଟ ଅନୁଯାୟୀ, ଗତ ସେପ୍ଟେମ୍ବର ୨୯ ତାରିଖରୁ ଆରମ୍ଭ ହୋଇଥିବା ପ୍ରତିବାଦକୁ ବନ୍ଦ କରିବା ପାଇଁ ପାକିସ୍ତାନୀ ରେଞ୍ଜର୍ସ ମୁଜାଫରାବାଦ ଏବଂ ଅନ୍ୟାନ୍ୟ ଅଞ୍ଚଳରେ ଗୁଳି ଚଳାଇଛନ୍ତି। ଇଣ୍ଟରନେଟ୍, ମୋବାଇଲ୍ ଏବଂ ଲ୍ୟାଣ୍ଡଲାଇନ୍ ସେବା ସମ୍ପୂର୍ଣ୍ଣ ବନ୍ଦ କରାଯାଇଛି। ରାସ୍ତାରେ ସୈନ୍ୟ ମୁତୟନ କରି ଲୋକଙ୍କୁ ଘରେ ସୀମିତ ରଖିବା ପାଇଁ ଜୋର ଦିଆଯାଇଛି। ସୋସିଆଲ ମିଡିଆରେ ପ୍ରସାରିତ ଭିଡିଓଗୁଡ଼ିକରେ ପୋଲିସ ଏବଂ ରେଞ୍ଜର୍ସମାନେ ଲୁହ ବୁହା ଗ୍ୟାସ୍ ସେଲ୍ ଫିଙ୍ଗୁଥିବା ଏବଂ ଲାଠିଚାର୍ଜ କରୁଥିବାର ଦେଖାଯାଇଛି।
ମୀରପୁର ଜିଲ୍ଲାର ଦୁଦୟାଲ ଅଞ୍ଚଳରେ, ପ୍ରଦର୍ଶନକାରୀମାନେ ଜଣେ ମୃତ ବ୍ୟକ୍ତିଙ୍କ ଶବକୁ କବର ଦେବାକୁ ମନା କରି ଦେଇଥିଲେ। କହିଥିଲେ ଯେ ପ୍ରଶାସନ ସେମାନଙ୍କ ଦାବି ପୂରଣ ନ କରିବା ପର୍ଯ୍ୟନ୍ତ ଅନ୍ତିମ ସଂସ୍କାର କରାଯିବ ନାହିଁ। ଏହି ସମୟରେ, ମୀରପୁର, କୋଟଲି ଏବଂ ମୁଜାଫରାବାଦରେ ମିଳିତ ଆୱାମୀ କାର୍ଯ୍ୟ କମିଟି (JAC) ନେତୃତ୍ୱରେ ବିଶାଳ ରାଲି ଅନୁଷ୍ଠିତ ହୋଇଥିଲା। ଏହି ରାଲିଗୁଡ଼ିକ ସ୍ପଷ୍ଟ ଭାବରେ ପାକିସ୍ତାନ ସରକାରଙ୍କ ବିରୁଦ୍ଧରେ ଜନସାଧାରଣଙ୍କ କ୍ରୋଧ ଏବଂ ଏକତା ପ୍ରଦର୍ଶନ କରିଥିଲା।
ଏହି ପ୍ରତିବାଦଗୁଡ଼ିକ ଦୁଇ ବର୍ଷ ପୂର୍ବେ ଆରମ୍ଭ ହୋଇଥିଲା। ଏହି ପ୍ରଦର୍ଶନରେ ଲୋକମାନେ ନିୟମିତ ଏବଂ ସବସିଡିଯୁକ୍ତ ଅଟା ଏବଂ ବିଦ୍ୟୁତ ଯୋଗାଣ ବଲି ମୌଳିକ ଆବଶ୍ୟକତାର ଦାବି କରୁଥିଲେ। ଧୀରେ ଧୀରେ, ଆନ୍ଦୋଳନଟି ବ୍ୟାପକ ହୋଇ ମାଗଣା ଶିକ୍ଷା, ସ୍ୱାସ୍ଥ୍ୟସେବା, ସଂରକ୍ଷିତ ଆସନ ଉଚ୍ଛେଦ ଏବଂ କାଶ୍ମୀରୀ ଉଚ୍ଚବର୍ଗଙ୍କ ପାଇଁ ସୁବିଧା ଉଚ୍ଛେଦ ଭଳି ପ୍ରସଙ୍ଗ ଅନ୍ତର୍ଭୁକ୍ତ ହୋଇଥିଲା। ପ୍ରତିବାଦକାରୀମାନେ ଅଭିଯୋଗ କରିଛନ୍ତି ଯେ ସରକାର ଦୁଇ ବର୍ଷ ପୂର୍ବେ ହୋଇଥିବା ଚୁକ୍ତିନାମାକୁ କାର୍ଯ୍ୟକାରୀ କରିନାହାଁନ୍ତି।
ଏଥର, ପ୍ରଦର୍ଶନକାରୀମାନେ ୩୮-ସୂତ୍ରୀ ଦାବିପତ୍ର ପ୍ରଦାନ କରିଥିଲେ। ଏହି ଦାବିଗୁଡ଼ିକରେ ୧୨ ଟି ସଂରକ୍ଷିତ ଆସନ ଉଚ୍ଛେଦ, ଟିକସ ଛାଡ, ରାସ୍ତା ନିର୍ମାଣ ପ୍ରକଳ୍ପ ସମାପ୍ତ କରିବା, ଅଟା ଏବଂ ବିଦ୍ୟୁତ ଉପରେ ସବସିଡି ଜାରି ରଖିବା ଏବଂ ନ୍ୟାୟପାଳିକାରେ ସଂସ୍କାର ଅନ୍ତର୍ଭୁକ୍ତ ଥିଲା। ମୁଜାଫରାବାଦର ଲାଲ ଚୌକରେ ଏକ ବିଶାଳ ଜନସମାବେଶ ହୋଇଥିଲା, ଯେଉଁଠାରେ JAC ନେତା ଶୌକତ ନୱାଜ ମୀର ଜନସମାବେଶକୁ ସମ୍ବୋଧିତ କରିଥିଲେ ଏବଂ ସରକାରଙ୍କ ବିରୋଧି ପ୍ରଦର୍ଶନ ଆରମ୍ଭ କରିଥିଲେ।
ଜମ୍ମୁ କାଶ୍ମୀର ନ୍ୟାସନାଲ ଆଲାଏନ୍ସର ଅଧ୍ୟକ୍ଷ ମହମୁଦ କାଶ୍ମୀରୀ ପାକିସ୍ତାନ ଉପରେ PoJKକୁ ଏକ ସାମରିକ ଘାଟିରେ ପରିଣତ କରିବାର ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ପାକିସ୍ତାନ ସରକାର ସୀମାବର୍ତ୍ତୀ ଅଞ୍ଚଳରେ ସୈନ୍ୟ ମୁତୟନ କରିଛନ୍ତି ଏବଂ ସାଧାରଣ ଲୋକଙ୍କୁ ଅସ୍ତ୍ରଶସ୍ତ୍ର ବଣ୍ଟନ କରୁଛନ୍ତି। ସେ କହିଛନ୍ତି ଯେ ଏହା ଶାନ୍ତିପୂର୍ଣ୍ଣ ପ୍ରତିରୋଧ ପାଇଁ ବିପଦ ସୃଷ୍ଟି କରୁଛି। ସେ ଇସଲାମାବାଦକୁ ତୁରନ୍ତ ସୈନ୍ୟ ପ୍ରତ୍ୟାହାର କରିବାକୁ ଏବଂ ସାଧାରଣ ନାଗରିକଙ୍କୁ ହତ୍ୟା କରିବାର ଷଡ଼ଯନ୍ତ୍ର ବନ୍ଦ କରିବାକୁ ଚେତାବନୀ ଦେଇଛନ୍ତି, ନଚେତ୍ ବ୍ୟାପକ ଜନ ପ୍ରତିବାଦ ଆରମ୍ଭ ହେବ ବୋଲି ସେ କହିଛନ୍ତି।
