ଭୁବନେଶ୍ୱର,୧୩/୦୯: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମିଜୋରାମର ବୈରବି-ସୈରାଙ୍ଗା ରେଳ ଲାଇନ ଏବଂ ତିନୋଟି ନୂଆ ଟ୍ରେନର ଶୁଭାରମ୍ଭ କରିବେ । ଏଥି ସହିତ ମିଜୋରାମ ରାଜ୍ୟ ରାଜଧାନୀରୁ ଜାତୀୟ ରାଜଧାନୀ ନୂଆଦିଲ୍ଲୀକୁ ପ୍ରଥମ ଟ୍ରେନ ଚଳାଚଳ କରିବ । ଏହାର ଅବ୍ୟବହିତ ପୂର୍ବରୁ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ବୈରବି-ସୈରାଙ୍ଗ ରେଳ ଲାଇନର କ୍ଷେତ୍ରୀୟ ନିରୀକ୍ଷଣ କରିଛନ୍ତି । ଶ୍ରୀ ବୈଷ୍ଣବ ମିଜୋରାମର ସୈରାଙ୍ଗ ରେଳ ଷ୍ଟେସନ ପରିଦର୍ଶନ କରିବା ସହ ଏହି ରେଳ ଲାଇନର ଗୁରୁତ୍ୱ ସମ୍ପର୍କରେ ଗଣମାଧ୍ୟମକୁ ସୂଚନା ଦେଇଛନ୍ତି ।
ଏହି ଅବସରରେ ଶ୍ରୀ ବୈଷ୍ଣବ କହିଲେ, ସୈରାଙ୍ଗରୁ ନୂଆଦିଲ୍ଲୀକୁ ସାପ୍ତାହିକ ରାଜଧାନୀ ଏକ୍ସପ୍ରେସ, ସୈରାଙ୍ଗରୁ କୋଲ୍କାତାକୁ ୩ ସପ୍ତାହକୁ ଥରେ ମିଜୋରାମ ଏକ୍ସପ୍ରେସ ଏବଂ ସୈରାଙ୍ଗରୁ ଆସାମ ଗୌହାଟିକୁ ଦୈନିକ ଆଇଜଲ ଇଣ୍ଟରସିଟି ଟ୍ରେନ ଚଳାଚଳ କରିବ । ୧୪ ତାରିଖଠାରୁ ମାଲ୍ବାହୀ ଟ୍ରେନ ଏହି ରୁଟ୍ରେ ଗଡ଼ିବ । ବହୁତ ଆହ୍ୱାନ ସାମ୍ନା କରି ନିର୍ମାଣକାରୀ ଦଳ ଏହି ପ୍ରକଳ୍ପକୁ କାର୍ଯ୍ୟକ୍ଷମ କରିଛନ୍ତି । ଏହି ରେଳ ଲାଇନ ଦ୍ୱାରା ଉକ୍ତ ଅଞ୍ଚଳର ଲୋକମାନେ ବେଶ ଲାଭବାନ ହେବେ । ସିମେଣ୍ଟ, ଷ୍ଟିଲ୍, ଘରୋଇ ସାମଗ୍ରୀ ପରିବହନ ଏହା ଦ୍ୱାରା ତ୍ୱରାନ୍ୱିତ ହେବ । ମିଜୋରାମରୁ ଦେଶର ଅନ୍ୟ ସ୍ଥାନକୁ ଜୈବିକ, ତାଜା ପନିପରିବା, ଫୁଲ, ଡ୍ରାଗନ ଫଳ ପରିବହନ ହେବ । ଏହି ରେଳଲାଇନ ପର୍ଯ୍ୟଟନର ନୂଆ ସମ୍ଭାବନା ଯୋଡ଼ିବ । ଏହି ପ୍ରକଳ୍ପ ପାଇଁ ବଜେଟରେ ଆବଣ୍ଟନ ୨ ହଜାର କୋଟିରୁ ୧୦ ହଜାର କୋଟିକୁ ବଢ଼ିଛି । ବୈରବିରୁ ସୈରାଙ୍ଗ ୫୧ କିମିରେ ୪୫ଟି ସୁଡ଼ଙ୍ଗ, ୫୫ଟି ସେତୁ ନିର୍ମାଣ ହୋଇଛି । ଯେଉଁଥିରୁ କୁତବ ମିନାରଠାରୁ ଉଚ୍ଚ ସେତୁ ସାମିଲ । ଏହା ଭାରତୀୟ ଇଞ୍ଜିନିୟରିଂ ଦକ୍ଷତାର ପ୍ରତୀକ ବୋଲି ଶ୍ରୀ ବୈଷ୍ଣବ ଉଲ୍ଳେଖ କରିଛନ୍ତି ।
