ନୂଆଦିଲ୍ଲୀ, ୦୫/୧୦: ମହିଳା ଦିନିକିଆ ବିଶ୍ୱକପ୍ରେ ଆଜି ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ପରସ୍ପରକୁ ଭେଟିବାକୁ ଯାଉଛନ୍ତି । ଏହି ମ୍ୟାଚ୍କୁ ନେଇ ଉଭୟ ଦେଶର କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍କଣ୍ଠା ବଢ଼ି ଚାଲିଛି । ରେକର୍ଡ ଭାରତ ସପକ୍ଷରେ ରହିଥିଲେ ମଧ୍ୟ ପାକିସ୍ତାନ ବିପର୍ଯ୍ୟୟ ଘଟାଇବାକୁ ପ୍ରସ୍ତୁତ ରହିଥିବା ଅଧିନାୟିକା ଫାତିମା ସାନା ଶନିବାର ମ୍ୟାଚ୍ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି । ପୂର୍ବରୁ ଉଭୟ ଦଳ ୧୧ଥର ପରସ୍ପରକୁ ଭେଟିଛନ୍ତି ଏବଂ ଭାରତ ସମସ୍ତ ମ୍ୟାଚ୍ ଜିତିଛି ।
ସାନା କହିଛନ୍ତି, ପ୍ରଥମତଃ ରେକର୍ଡ ସୃଷ୍ଟି ହୋଇଥାଏ ଭାଙ୍ଗିବା ପାଇଁ । ଆମେ ଭାରତକୁ ହରାଇ ପାରିବୁ । ଆମ ନିକଟରେ ଏକ ଦୃଢ଼ ଦଳ ରହିଛି । ଏହା ନୁହେଁ କି ଆମେ ଭାରତକୁ କେବେ ହରାଇ ପାରିବୁନି । ଭଲ କ୍ରିକେଟ୍ ଖେଳିଲେ ଆମେ ଯେକୌଣସି ଦଳକୁ ହରାଇବାର କ୍ଷମତା ରଖିଛୁ । ପୂର୍ବ ପ୍ରଦର୍ଶନକୁ ନେଇ ଆମେ ଚିନ୍ତିତ ନାହୁଁ । ଭାରତ ବିପକ୍ଷ ମ୍ୟାଚ୍ରେ ଚାପ ରହିବା ସ୍ୱାଭାବିକ । ଏହି ମ୍ୟାଚ୍ ଉପରେ ସମଗ୍ର ବିଶ୍ୱର ନଜର ରହିବ । ଚାପରେ ରହି ଆମକୁ ନିଜ ନିଜର ଶ୍ରେଷ୍ଠ ପ୍ରଦର୍ଶନ ଦେବାକୁ ପଡ଼ିବ ।’
ଗତ ଏସିଆ କପ୍ରେ ଭାରତ-ପାକିସ୍ତାନ ବିବାଦକୁ ନେଇ ସାନା କହିଛନ୍ତି, ଭାରତୀୟ ଦଳ ସହ ଆମର ପୂର୍ବରୁ ଭଲ ସମ୍ପର୍କ ରହିଆସିଛି । ଗତ ୨୦୨୨ ବିଶ୍ୱକପ୍ ସମୟରେ ପୂର୍ବତନ ଅଧିନାୟିକା ବିଶମା ମାରୁଫଙ୍କ ଝିଅକୁ ଭାରତୀୟ ଖେଳାଳିମାନେ ବହୁତ ଭଲ ପାଇବା ଦେଇଥିଲେ । ଏଥର ମଧ୍ୟ ଆମେ ଖେଳୁଆଡ଼ ମନୋଭାବକୁ ଅଧିକ ଗୁରୁତ୍ୱ ଦେବୁ
