ମୁମ୍ବାଇ ୧୧/୧୦: ଆଗାମୀ ଅଷ୍ଟ୍ରେଲିଆ ଗସ୍ତ ପାଇଁ ଜୋରଦାର ପ୍ରସ୍ତୁତି ଚଳାଇଥିବା ରୋହିତ ଶର୍ମା ଆଗାମୀ ଘରୋଇ ସିଜନରେ ବିଜୟ ହଜାରେ ଟ୍ରଫି ଖେଳିବାକୁ ଯୋଜନା କରୁଥିବା ଜଣାପଡ଼ିଛି । ବିଜୟ ହଜାରେ ଟ୍ରଫିରେ ୬ରାଉଣ୍ଡ ଲିଗ୍ ମ୍ୟାଚ୍ ହେବ । ଏଥିରୁ ରୋହିତ ୩ଟି ମ୍ୟାଚ ଖେଳିବା ସମ୍ଭାବନା ରହିଛି । ଡିସେମ୍ବର ୨୪ ତାରିଖରୁ ବିଜୟ ହଜାରେ ଟ୍ରଫି ଆରମ୍ଭ ହେବ । ମୁମ୍ବାଇ ପ୍ରଥମ ମ୍ୟାଚ୍ରେ ସିକିମକୁ ଭେଟିବ ।
ରୋହିତ ଟେଷ୍ଟ ଓ ଟି-ଟ୍ୱେଣ୍ଟିରୁ ଅବସର ନେଇ ସାରିଛନ୍ତି । ୨୦୨୭ ଦିନିକିଆ ବିଶ୍ୱକପ୍ ଖେଳିବାର ଆଶା ରଖିଥିବାରୁ କେବଳ ଦିନିକିଆ ଫର୍ମାଟ୍ରେ ସେ ସକ୍ରିୟ ରହିଛନ୍ତି । ହେଲେ ଭାରତ ଆଗାମୀ ଦିନରେ ଖୁବ କମ୍ ଦିନିକିଆ ମ୍ୟାଚ୍ ଖେଳିବ । ତେଣୁ ଏଥିପାଇଁ ପ୍ରସ୍ତୁତ ହେବାକୁ ରୋହିତଙ୍କ ନିକଟରେ ସୁଯୋଗ ନାହିଁ । ସେ କେବଳ ନେଟ୍ସରେ ନିୟମିତ ଅଭ୍ୟାସ କରି ପ୍ରସ୍ତୁତ ହେଉଛନ୍ତି । କେବଳ ବିଜୟ ହଜାରେ ଟ୍ରଫି ଏକମାତ୍ର ଟୁର୍ଣ୍ଣାମେଣ୍ଟ ଭାବେ ତାଙ୍କୁ ମ୍ୟାଚ୍ ଅଭ୍ୟାସ ସୁଯୋଗ ଦେଇ ପାରିବ ।
