ଭୁବନେଶ୍ୱର,୧୭/୧୦: ପୁଲିସ ଏସ୍ଆଇ କେଳେଙ୍କାରୀ ଘଟଣାରେ କ୍ରାଇମ୍ବ୍ରାଞ୍ଚ୍କୁ ସଫଳତା ମିଳିଛି । ଏହି ଘଟଣାରେ ମୁଖ୍ୟ କାର୍ପଟଦାର ମୁନା ମହାନ୍ତିଙ୍କୁ ଗିରଫ କରିଛି କ୍ରାଇମ୍ବ୍ରାଞ୍ଚ । ନୟାଗଡ଼ ଜିଲ୍ଳା ଦଶପଲ୍ଳା ଅଞ୍ଚଳର ଏକ ଫାର୍ମହାଉସ୍ରେ ସେ ଲୁଚିଥିଲେ । କ୍ରାଇମ୍ବ୍ରାଞ୍ଚ ସେଠାରେ ଚଢ଼ଉ କରି ମୁନା ଓ ତାର ଦୁଇ ସହଯୋଗୀଙ୍କୁ ଗିରଫ କରି ବ୍ରହ୍ମପୁର ନେଇଛି । ଶୁକ୍ରବାର କୋର୍ଟ ଚାଲାଣ କରାଯିବ ବୋଲି କ୍ରାଇମ୍ବ୍ରାଞ୍ଚ ଡିଜି ସୂଚନା ଦେଇଛନ୍ତି ।
ଏସ୍ଆଇ ଜାଲିଆତିର ମାଷ୍ଟରମାଇଣ୍ଡ ହେଉଛନ୍ତି ହିଞ୍ଜିଳି ବ୍ରାହ୍ମଣଛାଇ ଅଞ୍ଚଳର ଶଙ୍କର ପୃଷ୍ଟି । ଶଙ୍କରର ବହୁ ବରିଷ୍ଠ ଅଧିକାରୀ, ନେତା, ମନ୍ତ୍ରୀ ଓ ପୁଲିସ ଅଧିକାରୀଙ୍କ ସହ ସଂପର୍କ ରହିଛି । ଶଙ୍କରର ଦୁଇଟି କମ୍ପାନି ଥିଲା । ଗୋଟିଏ ପାନ୍ସଫ୍ଟ ଟେକ୍ ପ୍ରାଇଭେଟ୍ ଲିମିଟେଡ ଓ ଅନ୍ୟଟି କେଦାରନାଥ ଟେକ୍ନୋଲୋଜିସ୍ । ଏସ୍ଆଇ ପରୀକ୍ଷା ପରିଚାଳନା ଦାୟିତ୍ୱରେ ଥିଲା ପାନ୍ସଫ୍ଟ । ଶଙ୍କରର ଅତି ଖାସ୍ ଥିଲା ମୁନା ମହାନ୍ତି ।ବିଭିନ୍ନ ପର୍ଯ୍ୟାୟରେ ୩ ଶହରୁ ଅଧିକ ପରୀକ୍ଷାର୍ଥୀଙ୍କୁ ନେଇ ଆନ୍ଧ୍ରପ୍ରଦେଶରେଲିଖିତ ପରୀକ୍ଷା ପାଇଁ ତାଲିମ୍ ପାଇଁ ଯୋଜନା ହୋଇଥିଲା । ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ଏମାନେ ସଫଳ ହୋଇଥିଲେ । ତୃତୀୟ ପର୍ଯ୍ୟାୟରେ ୧୧୪ ପରୀକ୍ଷାର୍ଥୀ ଆନ୍ଧ୍ରପ୍ରଦେଶ ଯାଉଥିଲା ବେଳେ ବ୍ରହ୍ମପୁର ପୁଲିସ୍ ଗିରଫ ଗିରଫ କରିଥିଲା । ଏଥି ସହ ୬ ଜଣ ଦଲାଲ୍ ମଧ୍ୟ ଗିରଫ ହୋଇଥିଲା । ଏହି ସମୟରେ ଜଣାପଡିଥିଲା ସବୁ ପରୀକ୍ଷାର୍ଥୀଙ୍କୁ ମୁନା ଯୋଗାଡ଼ କରିଥିଲା । ପ୍ରତି ପରୀକ୍ଷାର୍ଥୀଙ୍କ ଠାରୁ ୨୫ ଲକ୍ଷ ଟଙ୍କା ଲେଖାଏଁ ନେବାକୁ ଡିଲ୍ ହୋଇଥିଲା । ଅଗ୍ରୀମ ଆକାରରେ ୫ରୁ ୧୦ ଲକ୍ଷ ଟଙ୍କା ଲେଖାଏଁ ମୁନା ଆଦାୟ କରିଥିଲା । ପରୀକ୍ଷାର୍ଥୀ ଓ ଦଲାଲ୍ ଗିରଫ ହେବା ପରେ ଶଙ୍କର ଓ ମୁନା ଫେରାର ହୋଇଯାଇଥିଲେ ।
ଗତ ୧ ତାରିଖଠାରୁ ଏହି ଦୁଇ ଜଣଙ୍କୁ ଖୋଜୁଥିଲା କ୍ରାଇମ୍ବ୍ରାଞ୍ଚ । ଶଙ୍କର ଓ ମୁନା ନାଁରେ କ୍ରାଇମ୍ବ୍ରାଞ୍ଚ ଲୁକ୍ ଆଉଟ୍ ସର୍କୁଲାର ଜାରି କରିଥିଲା । ଶଙ୍କର ଦେଶ ଛାଡି ଫେରାର ହୋଇଯାଇଥିବା ଜଣାପଡିଛି । ମୁନା, ପିଙ୍କୁ ଓ ଅନ୍ୟ ଜଣେ ସହଯୋଗୀ ଦଶପଲ୍ଳାରେ ଜଣେ ବ୍ୟକ୍ତିଙ୍କ ଫାର୍ମହାଉସ୍ରେ ଲୁଚିଥିଲେ । ପରୀକ୍ଷାର୍ଥୀଙ୍କ ଠାରୁ ମୁନା ଓ ତାର ସହଯୋଗୀମାନେ ଅଗ୍ରୀମ ଟଙ୍କା ଆଣି କେଉଁମାନଙ୍କୁ ଦେଇଛନ୍ତି ସେ ବିଷୟରେ ଜାଣିବାକୁ କ୍ରାଇମ୍ବ୍ରାଞ୍ଚ ମୁନାକୁ ରିମାଣ୍ଡରେ ଆଣିବ ବୋଲି ଜଣାପଡିଛି । ବଡ଼ କଥା ହେଲା ୨୦୨୩ ଜେଇ ପ୍ରଶ୍ନପତ୍ର ଲିକ୍ ଘଟଣାରେ ମୁନାର ହାତ ଥିବା ଜଣାପଡିଛି ।
ମୁନା ଘର ବାଙ୍କୀ କଳାପଥରସ୍ଥିତ ତଳସାହିରେ । ତା’ ବିଷୟରେ ଖୋଳତାଡ଼ କରିବାରୁ ଅନେକ ତଥ୍ୟ ପୁଲିସ୍ ପାଇଛି । ମୁନା ମାଟ୍ରିକ୍ ଫେଲ୍ ହେବା ପରେ ଗାଁରେ ଲୁଚାଛପାରେ ଗଞ୍ଜେଇ ପୁଡିଆ ବିକୁଥିଲା । ପରେ ହଠାତ୍ ପ୍ଲଟ୍ ବ୍ୟବସାୟରେ ମନ ଦେଇ ରାତାରାତି ଲକ୍ଷପତି ହେବାର ନିଶା ମୁନା ମୁଣ୍ଡରେ ସବାର୍ ହେଲା । ଭୁବନେଶ୍ୱର ଯାଇ ସେଠାରେ କିଛି ବିଲ୍ଡର୍ ସଂସ୍ଥା ସହ ଯୋଗାଯୋଗରେ ରହି ସେମାନଙ୍କୁ ବାଙ୍କୀ, ଆଠଗଡ଼, ବଡମ୍ବା ଆଦି ଅଞ୍ଚଳରେ ଜମି ରେଜିଷ୍ଟ୍ରି କରିବାରେ ସହଯୋଗ କଲା । ଏ ବାବଦରେ ମିଳୁଥିବା କମିସନ୍ରେ କିଛି ଦିନ ଭିତରେ ମୁନାର ଚଳଣି ସମ୍ପୂର୍ଣ୍ଣ ବଦଳି ଯାଇଥିଲା । ଭୁବନେଶ୍ୱରରେ ରହିବା ସହ ଗାଁକୁ ଆସିବା ବେଳେ ନୂଆ ନୂଆ କାର୍ ନେଇ ଆସୁଥିଲା । କେବଳ ପ୍ଲଟିଂ ନୁହେଁ ଗାଡ଼ି କିଣାବିକା ଓ ଘରୋଇ ସଂସ୍ଥାରେ ନିଯୁକ୍ତି କରାଇଦେବା କଥା କହି ଲୋକଙ୍କ ଠାରୁ ଲକ୍ଷ ଲକ୍ଷ ଟଙ୍କା ନେଇଥିଲା ମୁନା । ଦଲାଲି କରିବା ସମୟରେ ମୁନା ସହ ଶଙ୍କରର ପରିଚୟ ହୋଇଥିଲା ।
