ସାକ୍ଷୀଗୋପାଳ,୧୩/୧୦: ସାକ୍ଷୀଗୋପାଳ ମନ୍ଦିରରେ ଅଁଳାନବମୀ ପ୍ରସ୍ତୁତି ସମୀକ୍ଷା କଲେ ଏସ୍ପି ପ୍ରତୀକ ସିଂ । ରବିବାର ସନ୍ଧ୍ୟା ମନ୍ଦିରରେ ପହଞ୍ଚି ଥଲେ ଏସ୍ପି। ଭିଡ଼ ନିୟନ୍ତ୍ରଣ, ସୁରକ୍ଷା, ଟ୍ରାଫିକ, ଅଗ୍ନି ନିରାପତ୍ତା ସମ୍ପର୍କରେ ସ୍ଥାନୀୟ ପୁଲିସ୍ ଅଧିକାରୀଙ୍କ ସହ ଆଲୋଚନା କରି ବ୍ଲୁ ପ୍ରିଣ୍ଟ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ ।
ଏସ୍ପି ପ୍ରଥମେ ଠାକୁରଙ୍କ ଦର୍ଶନ କରିବା ପରେ ଏକତରଫା ରାସ୍ତାରେ ସିଂହଦ୍ୱାର ଦେଇ ଭକ୍ତଙ୍କ ପ୍ରବେଶ, ଦର୍ଶନ, ବେଢ଼ା ପରିକ୍ରମା, ଉତ୍ତର ଦ୍ୱାରରେ ପ୍ରସ୍ଥାନ ବ୍ୟବସ୍ଥା ବୁଲି ଦେଖିଥିଲେ । ମନ୍ଦିର ସମ୍ମୁଖ ବ୍ୟାରିକେଡ୍, ପଞ୍ଚସଖା ପଡ଼ିଆରେ ପଲ୍ଲିଶ୍ରୀ ମେଳା, ସାଂସ୍କୃତିକ ମହୋତ୍ସବ, ପାର୍କିଂସ୍ଥଳ ପରିଦର୍ଶନ କରିଥିଲେ । ଯାତ୍ରା ସମୟରେ କରାଯାଉଥିବା କଟକଣା, ଯାନବାହାନ ଚଳାଚଳ ସମ୍ପର୍କରେ ସାଧାରଣରେ ଠିକ୍ ସୂଚନା ଗଣମାଧ୍ୟମ ଜରିଆରେ ପ୍ରଦାନ କରିବା ନେଇ ଏସ୍ପି କହିଥିଲେ । ଏହି ସମୟରେ ପିପିଲି ଏସ୍ଡିପିଓ ଦେବାଶିଷ ମିଶ୍ର, ସତ୍ୟବାଦୀ ଥାନା ଆଇଆଇସି ବିଜୟ କେତନ ବେହେରା, ସେବାୟତ ସଂଘ ସମ୍ପାଦକ ପ୍ରତାପ କୁମାର ମହାପାତ୍ର ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ ।
