ନୂଆଦିଲ୍ଲୀ, ୦୪/୧୧: ପର୍ନ ବା ଅଶ୍ଳୀଳ ଭିଡିଓକୁ ବ୍ୟାନ୍ କରିବା ଲାଗି ହୋଇଥିବା ପିଟିସନ ଉପରେ ତ୍ୱରିତ ଭାବେ କୌଣସି ଆଦେଶ ଦେବାକୁ ସୁପ୍ରିମକୋର୍ଟ ସୋମବାର ମନା କରିଛନ୍ତି । ଏହି ସମୟରେ ପ୍ରଧାନ ବିଚାରପତି (ସିଜେଆଇ) ବି.ଆର୍ ଗଭଇଙ୍କ ଖଣ୍ଡପୀଠ ଗତ ସେପ୍ଟେମ୍ବରରେ ନେପାଳରେ ହୋଇଥିବା ଜେନ୍ଜି ବିକ୍ଷୋଭର ଉଦାହରଣ ଦେଇଥିଲେ । ନେପାଳରେ ସୋସିଆଲ ମିଡିଆ ଆପ୍ ଉପରେ ବ୍ୟାନ ଲାଗିବା ଯୋଗୁ ସ୍ଥିତି କ’ଣ ହୋଇଥିଲା ତାହା ଦେଖନ୍ତୁ ବୋଲି ଖଣ୍ଡପୀଠ କହିଥିଲେ । ପର୍ନୋଗ୍ରାଫି ବ୍ୟାନ୍ ଲାଗି ଆଗତ ପିଟିସନ ଉପରେ ୪ ସପ୍ତାହ ପରେ ଶୁଣାଣି ହେବ ବୋଲି ସୁପ୍ରିମକୋର୍ଟ କହିଛନ୍ତି ।
ପ୍ରକାଶଥାଉ କି, ସିଜେଆଇ ଗଭଇ ନଭେମ୍ବର ୨୩ରେ ଅବସର ନେବେ । ପିଟିସନରେ ଦାବି କରାଯାଇଥିଲା ଯେ, କେନ୍ଦ୍ର ସରକାର ଅଶ୍ଲୀଳ ବିଷୟବସ୍ତୁ ବା ପର୍ନୋଗ୍ରାଫି ଉପରେ ବ୍ୟାନ୍ ଲଗାଇବା ପାଇଁ ଏକ ଜାତୀୟ ନୀତି ଆଣନ୍ତୁ । ଏଥିସହ ପିଲାଙ୍କ ନିକଟରେ ଯେପରି ଏଭଳି କଣ୍ଟେଣ୍ଟ ନ ପହଞ୍ଚେ ସେ ଦିଗରେ ଜରୁରି ପଦକ୍ଷେପ ନିଆଯାଉ । ପବ୍ଲିକ୍ ପ୍ଲାଟଫର୍ମରୁ ମଧ୍ୟ ଏପରି ଭିଡିଓ ହଟାଯାଉ । ଭାରତରେ ୨୦ କୋଟିରୁ ଅଧିକ ପର୍ନ ଭିଡିଓ ଏବଂ କ୍ଲିପ୍ ବିକ୍ରି ପାଇଁ ଉପଲବ୍ଧ ଅଛି । ସେଥିରେ ଶିଶୁ ପର୍ନୋଗ୍ରାଫି ବି ସାମିଲ । ସରକାରଙ୍କ ପାଖରେ ଆଇଟି ଆକ୍ଟ ୬୯ଏ ଅନୁସାରେ ଏପରି ସାଇଟ୍କୁ ବ୍ଲକ୍ କରିବା ଲାଗି ଅଧିକାର ରହିଛି ।
ପିଟିସନର କହିଥିଲେ ଯେ, ଡିଜିଟାଲାଇଜେସନ ପରେ ପ୍ରତ୍ୟେକ ବ୍ୟକ୍ତି ଇଣ୍ଟରନେଟ ସହ ଜଡ଼ିତ । ସେ ଶିକ୍ଷିତ ହୁଅନ୍ତୁ ବା ଅଶିକ୍ଷିତ । ସବୁ କିଛି ଗୋଟିଏ କ୍ଲିକ୍ରେ ଉପଲବ୍ଧ। ସରକାର ନିଜେ ମାନିଛନ୍ତି ଯେ ଇଣ୍ଟରନେଟରେ କୋଟି କୋଟି ଅଶ୍ଲୀଳ ସାଇଟ ରହିଛି । କୋଭିଡ୍ ବେଳେ ପିଲାଙ୍କ ପାଠପଢ଼ା ପାଇଁ ସେମାନଙ୍କୁ ଡିଜିଟାଲ ଡିଭାଇସ୍ ଦିଆଯାଇଥିଲା । କିନ୍ତୁ ସେହି ଉପକରଣଗୁଡ଼ିକରେ ଏଭଳି ଭିଡିଓ ଦେଖିବାକୁ ରୋକିବା ଲାଗି କୌଣସି ପକ୍କା ସିଷ୍ଟମ ନାହିଁ । ଅଶ୍ଲୀଳ ଭିଡିଓ ହଟାଇବା ଲାଗି କୌଣସି ଆଇନ ଆସିନାହିଁ । ଏପରି କଣ୍ଟେଣ୍ଟ ସମାଜ ଏବଂ ବ୍ୟକ୍ତିଙ୍କ ଉପରେ ଖରାପ ପ୍ରଭାବ ପକାଉଛି । ବିଶେଷକରି ୧୩ରୁ ୧୮ ବର୍ଷର ପିଲାଙ୍କ ମସ୍ତିଷ୍କ ଅଧିକ ପ୍ରଭାବିତ ହେଉଛି ।
ପୂର୍ବରୁ ଗତ ଏପ୍ରିଲରେ ସୁପ୍ରିମକୋର୍ଟ ଅନ୍ଲାଇନରେ ଅଶ୍ଲୀଳ କଣ୍ଟେଣ୍ଟ ଷ୍ଟ୍ରିମିଂ ଉପରେ ରୋକ ଲଗାଇବା ଲାଗି ଆଗତ ପିଟିସନ ଉପରେ ଶୁଣାଣି କରିଥିଲେ । ଏଥିରେ ସର୍ବୋଚ୍ଚ ଅଦାଲତ କେନ୍ଦ୍ର ସରକାର ଏବଂ ୯ ଓଟିଟି-ସୋସିଆଲ ମିଡିଆ ପ୍ଲାଟଫର୍ମକୁ ନୋଟିସ ଜାରି କରି ଜବାବ ମାଗିଥିଲେ । ଏଥିସହ କେନ୍ଦ୍ର ସରକାର କିଛି ଠୋସ୍ ପଦକ୍ଷେପ ନେବା ଜରୁରି ବୋଲି ସୁପ୍ରିମକୋର୍ଟ କହିଥିଲେ ।
