ହରଭଙ୍ଗା,୧୩।୧୦ : ରାତି ହେଲେ ଧଳପୁର -ଆଠମଲ୍ଲିକ ସେତୁ ଉପରେ ରାଜୁତି କରୁଛି କିଟିମିଟି ଅନ୍ଧାର l ଏହାର ସୁଯୋଗ ନେଇ ଅସାମାଜିକ ବ୍ୟକ୍ତିଙ୍କ ଅନ୍ଧାରି କାରନାମା ବୃଦ୍ଧି ପାଉଛି। ଫଳରେ ଜନସାଧାରଣ ଯାତାୟାତ କରିବା ପାଇଁ ଅସୁରକ୍ଷିତ ମଣୁଛନ୍ତି l କେବେ ସେତୁ ଉପରେ ହେବ ଆଲୋକୀକରଣ ସେହି ଆଶା ଆଶଙ୍କାରେ ରହିଛନ୍ତି ବୌଦ୍ଧ ଓ ଅନଗୁଳ ଜିଲ୍ଲାବାସୀ l
ଆଠମଲ୍ଲିକ ସେତୁ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଖରସଂକୁଲୋଇ ଓ ଆଠମଲ୍ଲିକକୁ ସଂଯୋଗ କରୁଥିବା ବେଳେ ଏହାର ଲମ୍ବ ୩କିଲୋମିଟର ୩୨ମିଟର l ଉକ୍ତ ସେତୁ ହେଵା ଫଳରେ ବୌଦ୍ଧ ଓ ଅନଗୁଳ ଜିଲ୍ଲାର ସୁସମ୍ପର୍କ ସହିତ ବାଣିଜ୍ୟ, ବ୍ୟବସାୟ, ଶିକ୍ଷା, ସ୍ୱାସ୍ଥ୍ୟ ସହିତ ଅର୍ଥନୀତିରେ ଅଭିବୃଦ୍ଧି ଘଟିଛି l ପ୍ରତିଦିନ ଉକ୍ତ ସେତୁ ଦେଇ ବସ, ଭାରୀଯାନ, ଚଳପ୍ରଚଳ କରୁଛି l କିନ୍ତୁ ସେତୁ ଉପରେ ଦୀର୍ଘ ୩ବର୍ଷ ରୁ ଊର୍ଦ୍ଧ୍ବ ସମୟ ହେଲାଣି ଯାତାୟାତ ହେଉଥିବା ବେଳେ ଆଜି ପର୍ଯ୍ୟନ୍ତ ହୋଇ ପାରିଲାନି ଆଲୋକୀକରଣ l ଏହାର ସୁଯୋଗ ନେଇ ଅସାମାଜିକ ବ୍ୟକ୍ତି ଏହି ସେତୁ ଦେଇ ଗଂଜେଇ ବେପାର, ଗୋ ଚାଲାଣ, ଅପରାଧିକ ଘଟଣା ଘଟାଇ ଫେରାର ମାରିବାରେ ସଫଳ ହେଉଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି l
ଅନ୍ୟ ପଟେ ବୌଦ୍ଧ -ମର୍ଯାକୁଦ ସେତୁ ଆଠମଲ୍ଲିକ ସେତୁ ପରେ କାର୍ଯ୍ୟକ୍ଷମ ହୋଇଥିବା ବେଳେ ନିକଟରେ ଆଲୋକୀକରଣ ହୋଇ ସାରିଛି । ତେବେ କେବେ ହେବ ଆଠମଲ୍ଲିକ ସେତୁ ଉପରେ ଆଲୋକୀକରଣ? ଆଉ କେତେ ଦିନ ଅନ୍ଧାରି କରିବ ରାଜୁତି ? କେବେ ନିର୍ଭୟରେ ରାତ୍ରି ରେ ଯାତ୍ରୀ ଉକ୍ତ ସେତୁ ଉପରେ କରିବେ ଯାତାୟାତ ଦେଖିବାକୁ ବାକି ରହିଲା । ଏ ସମ୍ପର୍କରେ ପୂର୍ତ୍ତ ବିଭାଗ ଯନ୍ତ୍ରୀଙ୍କୁ ପଚାରିବାରୁ ସେ କହିଛନ୍ତି ଯେ ଏଦିଗରେ ଖୁବ ଶୀଘ୍ର ପଦକ୍ଷେପ ନିଆଯିବ ଏବଂ ସେତୁରେ ଆଲୋକୀକରଣ କରାଯିବ ।
