ନୂଆଦିଲ୍ଲୀ ୦୨/୦୯: ବରିଷ୍ଠ ଫିଲ୍ମ ନିର୍ମାତା ତଥା ଚାରିଥର ଓସ୍କାର ବିଜେତା ନିର୍ଦ୍ଦେଶକ ଉଡି ଆଲେନ ପୁଣି ଥରେ ଚର୍ଚ୍ଚାରେ। ନିକଟରେ ଏକ ସାକ୍ଷାତକାରରେ, ଆଲେନ୍ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ପ୍ରଶଂସା କରି କହିଛନ୍ତି କି ଯଦି ତାଙ୍କୁ ସୁଯୋଗ ମିଳେ, ସେ ତାଙ୍କୁ ଏକ ଫିଲ୍ମରେ ନିର୍ଦ୍ଦେଶନା ଦେବାକୁ ଚାହିଁବେ।
୧୯୯୮ ମସିହାରେ ରିଲିଜ କରିଥିବା 'ସେଲିବ୍ରିଟି' ଫିଲ୍ମରେ ଡୋନାଲ୍ଡ ଟ୍ରମ୍ପଙ୍କୁ ନିଜ ଚରିତ୍ରରେ ଅଭିନୟ କରିବାର ସୁଯୋଗ ଦେଇଥିଲେ ଉଡି ଆଲେନ୍। ସେହି ସମୟରେ ଟ୍ରମ୍ପ ରିଅଲ୍ ଇଷ୍ଟେଟ୍ ଜଗତର ଜଣେ ପ୍ରସିଦ୍ଧ ବ୍ୟବସାୟୀ ଥିଲେ। ସିନେମାରେ ସେ ଏକ ଛୋଟ ଦୃଶ୍ୟରେ ନିଜକୁ ବହୁତ ମଜାଦାର ଢଙ୍ଗରେ ଉପସ୍ଥାପନ କରିଥିଲେ।
ସାକ୍ଷାତକାରରେ ଆଲେନ କହିଛନ୍ତି , 'ଟ୍ରମ୍ପ୍ଙ୍କ ଶୈଳୀ ଏବଂ ତାଙ୍କର ଶୋବିଜ୍ ଦକ୍ଷତା ତାଙ୍କୁ ସର୍ବଦା ପ୍ରଭାବିତ କରିଥିଲା। ତାଙ୍କ ଅନୁସାରେ, ଟ୍ରମ୍ପ୍ ବହୁତ ଭଦ୍ର, ସମୟାନୁବର୍ତ୍ତୀ ଏବଂ ସେଟରେ କ୍ୟାମେରା ସାମ୍ନାରେ ସମ୍ପୂର୍ଣ୍ଣ ପ୍ରସ୍ତୁତ ଥିଲେ। କିନ୍ତୁ ବାସ୍କେଟବଲ୍ ମ୍ୟାଚ୍ ଦେଖିବା ଏବଂ ଗଲ୍ଫ ଖେଳିବାକୁ ଭଲ ପାଉଥିବା ଜଣେ ବ୍ୟକ୍ତି ରାଜନୀତି ଭଳି ଏକ କଷ୍ଟକର ଏବଂ ଚାପପୂର୍ଣ୍ଣ କ୍ଷେତ୍ରରେ ସାମିଲ ହେବା ଦେଖି ସେ ଆଶ୍ଚର୍ଯ୍ୟ ହୋଇଥିଲେ। ତେବେ ଆଲେନ୍ ସ୍ପଷ୍ଟ କରିଛନ୍ତି ଯେ ସେ ଡୋନାଲ୍ଡ ଟ୍ରମ୍ପଙ୍କ ନୀତି ଏବଂ ବିଚାରଧାରାର ସହ ପ୍ରାୟ ୯୯ ପ୍ରତିଶତ ସହମତ ନୁହଁନ୍ତି। ସେ ୨୦୨୪ ନିର୍ବାଚନରେ କମଳା ହାରିସଙ୍କୁ ଭୋଟ ମଧ୍ୟ ଦେଇଥିଲେ। କିନ୍ତୁ ଯେତେବେଳେ ଅଭିନୟ କଥା ଆସେ, ସେ ଟ୍ରମ୍ପଙ୍କୁ ଜଣେ ଭଲ ଅଭିନେତା ବୋଲି ବିବେଚନା କରନ୍ତି।
