ଟୋକିଓ, ୧୫/୦୯: ଜାମାଇକାର ଓବ୍ଲିକ ସେଭିଲ ଓ ଆମେରିକାର ମେଲିସା ଜେଫରସନ- ଉଡେନ ଯଥାକ୍ରମେ ବିଶ୍ୱର ନୂଆ ଦ୍ରୁତତମ ପୁରୁଷ ଓ ମହିଳା ହେବାର ଗୌରବ ଲାଭ କରିଛନ୍ତି । ବିଶ୍ୱ ଆଥଲେଟିକ୍ସ ଚାମ୍ପିଅନସିପ୍ର ୨୦ତମ ସଂସ୍କରଣର ଦ୍ୱିତୀୟ ଦିବସରେ ଥିଲା ସବୁଠୁ ଗୁରୁତ୍ୱପୂର୍ଣ୍ଣ ଇଭେଣ୍ଟ ୧୦୦ ମିଟର ଦୌଡ଼ । ଉଭୟ ପୁରୁଷ ଓ ମହିଳାରେ ବିଶ୍ୱକୁ ମିଳିଥିଲେ ନୂଆ ବିଶ୍ୱ ଚାମ୍ପିଅନ । ପୁରୁଷ ୧୦୦ ମିଟରରେ ଜାମାଇକାର ଦବ୍ଦବା ଦେଖିବାକୁ ମିଳିଥିଲା ।
୨୪ ବର୍ଷୀୟ ସେଭିଲ ପ୍ରଥମ ବିଶ୍ୱ ଟାଇଟଲ ଜିତିବାରେ ସଫଳ ହୋଇଥିଲେ । ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ ୯.୭୭ ସେକେଣ୍ଡ ସହ ଟାଇଟଲ ହାସଲ କରିଥିଲେ । ୟୁସେନ ବୋଲ୍ଟଙ୍କ ପରେ ପ୍ରଥମ ଜାମାଇକା ପୁରୁଷ ଧାବକ ଭାବେ ବିଶ୍ୱ ଚାମ୍ପିଅନ ହୋଇଛନ୍ତି ସେଭିଲ । ସାଥି କିଷନେ ଥମ୍ପସନ ୯.୮୨ ସେକେଣ୍ଡ ସହ ରୌପ୍ୟ ଏବଂ ଆମେରିକାର ନୋଆ ଲାଇଲ୍ସ ସିଜନର ଶ୍ରେଷ୍ଠ ପ୍ରଦର୍ଶନ ୯.୮୯ ସେକେଣ୍ଡ ଦେଇ ବ୍ରୋଞ୍ଜ ଜିତିଥିଲେ । ସେଭିଲଙ୍କର ଏହା ଦ୍ୱିତୀୟ ବିଶ୍ୱ ଚାମ୍ପିଅନସିପ୍ ପଦକ । ପୂର୍ବ ସଂସ୍କରଣରେ ସେ ୪+୧୦୦ ମିଟର ରିଲେରେ ବ୍ରୋଞ୍ଜ ଜିତିଥିଲେ । ବୋଟସ୍ୱାନାର ୨୦୦ ମିଟରରେ ପ୍ୟାରିସ ଅଲିମ୍ପିକ୍ସ ଚାମ୍ପିଅନ ଏବଂ ୧୦୦ ମିଟରରେ ରୌପ୍ୟ ବିଜେତା ଲେଟସିଲେ ତେବୋଗୋ ଫାଇନାଲରେ ତ୍ରୁଟିପୂର୍ଣ୍ଣ ଆରମ୍ଭ ଯୋଗୁ ଅଯୋଗ୍ୟ ଘୋଷିତ ହୋଇଥିଲେ ।
ମହିଳାରେ ଆମେରିକାର ୨୪ ବର୍ଷୀୟା ମେଲିସା ଜେଫରସନ-ଉଡେନ ନୂଆ ଚାମ୍ପିଅନସିପ୍ ରେକର୍ଡ (୧୦.୬୧ ସେକେଣ୍ଡ) ସହ ଜୀବନରେ ପ୍ରଥମ ବିଶ୍ୱ ଟାଇଟଲ ହାସଲ କରିଥିଲେ । ଜାମାଇକାର ଟିନା କ୍ଲେଟନ ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ (୧୦.୭୬) ଦେଇ ରୌପ୍ୟ ଏବଂ ସେଣ୍ଟ ଲୁସିଆର ଅଲିମ୍ପିକ୍ସ ଚାମ୍ପିଅନ ଜୁଲିଏନ ଆଲଫ୍ରେଡ୍ (୧୦.୮୪ ) ବ୍ରୋଞ୍ଜ ପଦକ ଜିତିଥିଲେ ।
ଜେଫରସନ ପ୍ୟାରିସ ଅଲିମ୍ପିକ୍ସରେ ୧୦୦ ମିଟରରେ ବ୍ରୋଞ୍ଜ ଓ ୪ଢ୧୦୦ ମିଟର ରିଲେରେ ସ୍ୱର୍ଣ୍ଣ ଜିତିଥିଲେ । ସେମିତି ବିଶ୍ୱ ଚାମ୍ପିଅନସିପର ୨୦୨୨ ଓ ୨୦୨୩ ରିଲେରେ ସ୍ୱର୍ଣ୍ଣ ଜିତିଥିଲେ ।
