ଆନନ୍ଦପୁର,୧୭/୧୦: ପୋଖରୀରେ ବୁଡି ଶିଶୁପୁତ୍ରର ମୃତ୍ୟୁ । ମୃତକ ଶରତ ବେହେରାଙ୍କ ୩ବର୍ଷର ପୁଅ ସାଇ ସୁଧାଂଶୁ ବୋଲି ଜଣାପଡ଼ିଛି । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ନନ୍ଦିପଦା ଥାନା ବ୍ରାହ୍ମଣୀକଳା ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସାଇସୁଧାଂଶୁ ଘର ପାଖରେ ଖେଳୁଥିଲା । ପରେ ଦୀର୍ଘ ସମୟ ଧରି ଘରକୁ ନଫେରିବାରୁ ଘରଲୋକେ ଖୋଜାଖେଜି କରି ନୟାନ୍ତ ହୋଇଥିଲେ । ହେଲେ ପୁଅର କୌଣସି ସନ୍ଧାନ ମିଳିନଥିଲା । ସନ୍ଦେହ ହେବାରୁ ଘର ପଛପଟ ପୋଖରୀରେ ଖୋଜାଖୋଜି କରିଥିଲେ । ସେଠାରେ ତାଙ୍କ ପୁଅ ପୋଖରୀ ପାଣିରେ ବୁଡି ଯାଇଥିବାର ଦେଖିଥିଲେ । ଏହା ଦେଖି ତୁରନ୍ତ ପୁଅକୁ ପୋଖରୀରୁ ଉଦ୍ଧାର କରି ପ୍ରଥମେ ଶାଳଣିଆଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଏହି ଘଟଣା ସମ୍ୱନ୍ଧରେ ପୋଲିସକୁ ଖବର ଦେଇଥିଲେ । ଖବର ପାଇ ନନ୍ଦିପଦା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି । ଗାଁର ଜଣେ ନିଷ୍ପାପ ଶିଶୁର ମୃତ୍ୟୁକୁ ନେଇ ପୁରା ଗାଁ ରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି ।
