ନୂଆଦିଲ୍ଲୀ: ଇସ୍ରାଏଲ ସୁରକ୍ଷା ଏଜେନ୍ସିଗୁଡ଼ିକ ଏକ ବଡ଼ ଖୁଲାସା କରିଛନ୍ତି । ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର ରଚାଯାଉଛି । ଇସ୍ରାଏଲ ନ୍ୟୁଜ୍ କାନ୍ ପବ୍ଲିକ୍ ବ୍ରଡକାଷ୍ଟରର ରିପୋର୍ଟ ଅନୁଯାୟୀ, ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର କରୁଥିବା ଅଭିଯୋଗରେ କେନ୍ଦ୍ରୀୟ ଇସ୍ରାଏଲର ଜଣେ ଜଣାଶୁଣା ସରକାର ବିରୋଧୀ କର୍ମୀଙ୍କୁ ଦୁଇ ସପ୍ତାହ ପୂର୍ବରୁ ଗିରଫ କରାଯାଇଛି । ଏବେ ଇସ୍ରାଏଲ ପୁଲିସ ମଧ୍ୟ ଏହି କଥାକୁ ନିଶ୍ଚିତ କରିଛି । 

ପୁଲିସ ଅନୁଯାୟୀ, ୭୦ ବର୍ଷୀୟ ମହିଳାଙ୍କୁ ପୁଲିସ ଏବଂ ଶିନ୍ ବେଟ୍ ସୁରକ୍ଷା ସେବା ଗିରଫ କରିଛି । ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା ବିଷୟରେ ଅସ୍ତ୍ରଶସ୍ତ୍ର ଏବଂ ସୂଚନା ପାଇବା ପାଇଁ ଅନ୍ୟ ପ୍ରଦର୍ଶନକାରୀଙ୍କ ସହ ଯୋଗାଯୋଗ କରିଥିଲେ । କାନ୍ ପବ୍ଲିକ୍ ବ୍ରଡକାଷ୍ଟର ରିପୋର୍ଟ ଅନୁଯାୟୀ, ତେଲଅଭିଭରୁ ଆସିଥିବା ମହିଳାଙ୍କୁ ଦୁଇ ସପ୍ତାହ ପୂର୍ବରୁ ଗିରଫ କରାଯାଇଥିଲା ଏବଂ ପରେ ପ୍ରଧାନମନ୍ତ୍ରୀ ଓ ସରକାରୀ କୋଠାରୁ ଦୂରେଇ ରହିବାକୁ ନିର୍ଦ୍ଦେଶ ଦେଇ ତାଙ୍କୁ ମୁକ୍ତ କରାଯାଇଥିଲା । ରିପୋର୍ଟରେ ଆହୁରି କୁହାଯାଇଛି ଯେ, ମଙ୍ଗଳବାର ଦିନ ମହିଳାଙ୍କ ବିରୁଦ୍ଧରେ ଅପରାଧିକ ଏବଂ ଆତଙ୍କବାଦ ଅଭିଯୋଗ ଦାଖଲ କରାଯାଇଛି ।

BREAKING:

🇮🇱 Attempt to assassinate Netanyahu foiled

70yo woman from central Israel suspected of planning to kill Bibi with an explosive device — Kan 11 pic.twitter.com/vDEeOYwfda

— Megatron (@Megatron_ron) July 23, 2025

ଏହା ସହିତ କୋର୍ଟ ଦ୍ୱାରା ଜାରି କରାଯାଇଥିବା ଆଦେଶ ଯୋଗୁଁ ଏହା ସନ୍ଦିଗ୍ଧ ବ୍ୟକ୍ତିଙ୍କ ନାମ ଏବଂ ଠିକଣା ଗୋପନ ରଖାଯାଇଛି । ଏପର୍ଯ୍ୟନ୍ତ ଇସ୍ରାଏଲ ଏହାର ଗୁପ୍ତଚରମାନଙ୍କ ମାଧ୍ୟମରେ ଇରାନରେ ନେତାମାନଙ୍କୁ ହତ୍ୟା କରିଆସୁଛି ଏବଂ ଅନେକ ରିପୋର୍ଟରୁ ଏହା ମଧ୍ୟ ଜଣାପଡିଛି ଯେ, ଇରାନର ବିରୋଧୀ ନେତା, କର୍ମୀ ଇସ୍ରାଏଲ ସହିତ ଯୋଗାଯୋଗରେ ଅଛନ୍ତି । ଇରାନରୁ ମଧ୍ୟ ନେତାନ୍ୟାହୁଙ୍କ ହତ୍ୟା ପାଇଁ ଆହ୍ୱାନ ଦିଆଯାଇଛି । ଏପରି ପରିସ୍ଥିତିରେ, ଲୋକମାନେ ଏହି ମହିଳାଙ୍କୁ ଇରାନ ସହିତ ମଧ୍ୟ ଯୋଡୁଛନ୍ତି । ଇରାନ ମଧ୍ୟ ଇସ୍ରାଏଲରେ ଏହାର ଗୁପ୍ତଚର ନେଟୱାର୍କ ନିର୍ମାଣ କରୁଥିବା କୁହାଯାଉଛି ।