ଭୁବନେଶ୍ୱର,୦୯/୧୧: ହଷ୍ଟେଲରେ ରହି କମ୍ପିଟେଟିଭ୍ ପରୀକ୍ଷା ପାଇଁ ପ୍ରସ୍ତୁତି ଚଳାଇଥିବା ଜଣେ ଛାତ୍ରୀଙ୍କ ବ୍ୟାଙ୍କ ଆକାଉଣ୍ଟ୍ରୁ ୪ ଲକ୍ଷ ଟଙ୍କା ଆତ୍ମସାତ ହୋଇଯାଇଛି । ଖଣ୍ଡଗିରି ଥାନା ଅଞ୍ଚଳରେ ଥିବା ଏକ ଘରୋଇ ବ୍ୟାଙ୍କ ଆକାଉଣ୍ଟ୍ରୁ ଟଙ୍କା ଆତ୍ମସାତ ହୋଇଥିବା ଅଭିଯୋଗ ହୋଇଛି । ଉକ୍ତ ବ୍ୟାଙ୍କ ଶାଖା ପରିଚାଳକଙ୍କ ନାମରେ ଥାନାରେ ଏତଲା ପରେ ପୁଲିସ ତଦନ୍ତ ଆରମ୍ଭ କରିଛି ।
ମିଳିଥିବା ଅଭିଯୋଗ ମୁତାବକ, ମୟୂରଭଞ୍ଜ କପ୍ତିପଦା ଅଞ୍ଚଳର ଉଷାରାଣୀ ବେହେରା ବରମୁଣ୍ଡାରେ ଏକ ହଷ୍ଟେଲରେ ରହି କମ୍ପିଟେଟିଭ୍ ପରୀକ୍ଷା ପାଇଁ ପ୍ରସ୍ତୁତି ଚଳାଇଥିଲେ । ଅକ୍ଟୋବର ୨୭ ତାରିଖରେ ହଠାତ୍ ତାଙ୍କ ଆକାଉଣ୍ଟ୍ରୁ ୧ ଲକ୍ଷ ଟଙ୍କା ଉଠି ଯାଇଥିଲା । ପରଦିନ ଉଷାରାଣୀ ଉକ୍ତ ବ୍ୟାଙ୍କରେ ପହଞ୍ଚି ଶାଖା ପରିଚାଳକଙ୍କୁ ଆକାଉଣ୍ଟ୍କୁ ବ୍ଲକ କରିବା ପାଇଁ କହିବା ସହ ଆକାଉଣ୍ଟ୍ରେ ଥିବା ଅବଶିଷ୍ଟ ଟଙ୍କାକୁ ଅନ୍ୟ ଆକାଉଣ୍ଟ୍କୁ ଟ୍ରାନ୍ସଫର କରିବାକୁ କହିଥିଲେ । ହେଲେ ଶାଖା ପରିଚାଳକ ଟଙ୍କା ଟ୍ରାନ୍ସଫର ହୋଇ ପାରିବନାହିଁ ବୋଲି କହି ବିଦା କରି ଦେଇଥିଲେ । ୨୯ ତାରିଖରେ ପୁଣି ତାଙ୍କ ଆକାଉଣ୍ଟ୍ରୁ ୩ ଥରରେ ୩ ଲକ୍ଷ ଟଙ୍କା କଟି ଯାଇଥିଲା । ସମୁଦାୟ ୪ ଲକ୍ଷ ଟଙ୍କା କଟିଯିବା ପରେ ତାଙ୍କର ଶାଖା ପରିଚାଳକଙ୍କ ଉପରେ ସନ୍ଦେହ ଉପୁଜିଥିଲା । ତେଣୁ ଗତକାଲି ଏନେଇ ଉଷାରାଣୀ ଖଣ୍ଡଗିରି ଥାନାରେ ଶାଖା ପରିଚାଳକଙ୍କ ବିରୋଧରେ ଏତଲା ଦେଇଥିଲେ । ପୁଲିସ ଥାନା କେସ୍ ନଂ-୭୮୫/୨୪ରେ ଏକ ମାମଲା ରୁଜୁକରି ତଦନ୍ତ ଆରମ୍ଭ କରିଛି।
