ଅହମ୍ମଦାବାଦ,୧୩/୦୬: କଥାରେ ଅଛି ନା ଜୀବନକୁ କି ଅବା ଭରସା । କେତେବେଳେ କଣ ଯେ ଘଟିବ ତାହା କାହାକୁ ଜଣାନଥାଏ । ଅହମ୍ମଦାବାଦରେ ଭୟଙ୍କର ବିମାନ ଦୁର୍ଘଟଣା ଦେଶକୁ ସ୍ତବ୍ଧ କରି ଦେଇଛି । ଶହ ଶହ ପରିବାରକୁ ଛାରଖାର କରିଦେଇଛି ଏୟାର ଇଣ୍ଡିଆର ବୋଇଙ୍ଗ୍ ୭୮୭-୮ ଡ୍ରିମ୍ଲାଇନ୍ର ବିମାନ 'ଏଆଇ-୧୭୧' ବିମାନ ଦୁର୍ଘଟଣା । ସେଥିରେ ଏକ ଡାକ୍ତର ପରିବାର ନିଶ୍ଚିହ୍ନ ହୋଇଛି । ଡାକ୍ତର ଦମ୍ପତିଙ୍କ ସହ ସେମାନଙ୍କ ୩ ପିଲାଙ୍କର ମୃତ୍ୟୁ ହୋଇଛି । ସେମାନେ ପ୍ଲେନ୍ରେ ବସିବା ପରେ ଏକ ସେଲ୍ଫି ନେଇଥିଲେ । ଶେଷ ଥର ପାଇଁ ଗୋଟିଏ ଫଟୋରେ ଏକାଠି ହସିଥିଲେ । ଭବିଷ୍ୟତ ପାଇଁ ପ୍ଲାନ କରିଥିଲେ । ପିଲାଙ୍କ ପାଇଁ ସ୍ୱପ୍ନ ଦେଖିଥିଲେ ଡାକ୍ତର ଦମ୍ପତି । ହେଲେ ଜୀବନ ତାଙ୍କୁ କୌଣସି ଚେତାବନୀ ଦେଲା ନାହିଁ । ଏହା ତାଙ୍କ ଜୀବନର ଶେଷ ଯାତ୍ରା ହୋଇଗଲା ।
ଅହମ୍ମଦାବାଦ ବିମାନ ଦୁର୍ଘଟଣାରେ ଜଣେ ଡାକ୍ତର ଦମ୍ପତି ଏବଂ ସେମାନଙ୍କ ୩ ପିଲାଙ୍କର ମୃତ୍ୟୁ ଘଟିଛି । ସେମାନେ ହେଲେ ରାଜସ୍ଥାନ ବାଂସୱାଡାର ଡାକ୍ତର କୋମି ବ୍ୟାସ, ତାଙ୍କ ସ୍ୱାମୀ ଡାକ୍ତର ପ୍ରତୀକ ଯୋଶୀ, ଯାଆଁଳା ପୁଅ ପ୍ରଦ୍ୟୁତ୍ ଓ ନକୁଲ ଯୋଶୀ (୫), ଏବଂ ଝିଅ ମିରାୟା ଯୋଶୀ (୮) । ଉଦୟପୁର ପାସିଫିକ୍ ହସ୍ପିଟାଲ ଉମର୍ଡାର ପରିଚାଳକ କହିଛନ୍ତି, ଡାକ୍ତର କୋମି ବ୍ୟାସ ମାସେ ପୂର୍ବରୁ ସେହି ହସ୍ପିଟାଲରୁ ଚାକିରି ଛାଡ଼ି ଦେଇଥିଲେ । ସେ ତାଙ୍କ ସ୍ୱାମୀଙ୍କ ସହ ରହିବା ଲାଗି ସେହି ବିମାନରେ ଲଣ୍ଡନ ଯାଉଥିଲେ । ଏଥିପାଇଁ ହିଁ କୋମି ବ୍ୟାସ ଇସ୍ତଫା ଦେଇଥିଲେ । ତେବେ ବିମାନ ଦୁର୍ଘଟଣାରେ ସମସ୍ତ ୫ ଜଣଙ୍କ ମୃତ୍ୟୁ ଘଟିଛି । ଦୁର୍ଘଟଣା ପୂର୍ବରୁ ଡାକ୍ତର ଦମ୍ପତି ପିଲାମାନଙ୍କ ସହ ବିମାନରେ ସେଲ୍ଫି ନେଇଥିଲେ । ଏବେ ତାହାର ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି ।
