ବ୍ରହ୍ମପୁର, ୧୯/୦୨ (ସ୍ୱାଧୀନ ସାହୁ): ଦେହସାରା ଶୃଙ୍ଖଳରେ ଆବଦ୍ଧ । ୪ ଗୋଡ଼ ବନ୍ଦୀ । ବେକକୁ ଚାପି ଧରିଛି ଶକ୍ତ ପ୍ଲାଷ୍ଟିକ୍ । ଶରୀରରେ ଗୁଡ଼େଇ ତୁଡ଼େଇ ହୋଇ ପ୍ରାୟ ୧୦ ଫୁଟ୍ ଲମ୍ବି ଯାଇଛି ଜାଲ । ତା’ ପୁଣି ୧୦ କେଜି ଓଜନର । ‘ମାଛ ମାଫିଆ’ଙ୍କ ଦାୟିତ୍ୱହୀନତା ପାଇଁ ଏଭଳି ଶକ୍ତ ବନ୍ଧନରେ ପଡ଼ିଛି ଅଲିଭରିଡ୍ଲେ । ହେଲେ ଅଲିଭରିଡ୍ଲେ ମା’ର ମମତାକୁ ଏ ବନ୍ଧନ ରୋକିପାରିନି । ଶୃଙ୍ଖଳକୁ ଜାବୁଡ଼ି ଧରି ବହୁ ଯାତନା ସହିସହି କୂଳକୁ ଛୁଟି ଆସିଛି ଅଣ୍ଡା ଦେବା ଲାଗି ।
ଏଭଳି ଅଭାବନୀୟ ଚିତ୍ର ଆସିଛି ଋଷିକୁଲ୍ୟା ମୁହାଣରୁ । ପେଟ ଭିତରେ ଅମାପ ଯନ୍ତ୍ରଣା, ଦେହରେ ପାହାଡ଼ ଭଳି ବୋଝ ବୋହିବୋହି ଅଲିଭରିଡ୍ଲେ ବାଲିରେ ପାଦ ଚାପିଚାପି ଆସିବା ଘଟଣା ଭାବବିହ୍ୱଳ କରି ପକାଉଛି । ଏ ଚିତ୍ର ଯିଏ ଦେଖିଲା କହୁଥିଲା, ସତରେ ମା’ର ମମତା ଅତୁଳନୀୟ । ଯେତେ ବି ବାଧାବିଘ୍ନ ଆସୁ ସନ୍ତାନର ସୁରକ୍ଷା ପାଇଁ ସେ ସବୁ ତୁଚ୍ଛ । ବହୁ ଯନ୍ତ୍ରଣା ସହି ଗର୍ଭରେ ଥିବା ଶିଶୁକୁ ସେ ନୂଆ ଦୁନିଆ ଦେଖାଇଥାଏ । ସେ ମଣିଷ ହେଉ କି ପ୍ରାଣୀ । ମୁହାଣରେ ଆଜି ଶୃଙ୍ଖଳ ଘେରରେ ଏହି କଇଁଛର ମାତୃତ୍ୱର ନିଦର୍ଶନ ଦୃଶ୍ୟ ଏହାକୁ ପ୍ରମାଣିତ କରିଛି ।
ମଙ୍ଗଳବାର ଭୋର୍ର ଘଟଣା। ସମୁଦ୍ର ଜଳରାଶିରୁ ଋଷିକୁଲ୍ୟା ମୁହାଣମୁହାଁ ହେଉଥିଲା ଅଲିଭରିଡ୍ଲେ । ପୂରାଦେହ ମାଛଧରା ଜାଲରେ ଛନ୍ଦି ରଖିଥିଲା । ବେକ ସହ ୪ ଗୋଡ଼କୁ ଜାଲ ଗୁଡ଼ାଇ ହୋଇ ରହିଥିଲା । ପଛକୁ ଲମ୍ବିଥିଲା ୧୦ ଫୁଟ୍ ଯାଏ । ଜାଲ ଓ କଇଁଚ୍ଛ ଦେହରେ ବହୁ କ୍ଷୁଦ୍ର ସାମୁଦ୍ରିକ ଜୀବ ବସା କରି ସାରିଥିଲେ । ଜାଲକୁ ଘୋଷାରି ଅଣନିଃଶ୍ୱାସୀ ଅବସ୍ଥାରେ ସମୁଦ୍ର ଜଳରାଶିରୁ ବେଳାଭୂମିକୁ କଇଁଛଟି ଆସୁଥିଲା । ଗର୍ଭରେ ଥିବା ଶିଶୁଙ୍କୁ ନୂଆ ଦୁନିଆ ଦେଖାଇବା ପାଇଁ ସତେ ଯେପରି ସବୁ କଷ୍ଟ ଭୁଲି ଯାଇଥିଲା । ଏହାକୁ ଦେଖି ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ (ଜେଡ୍ଏସ୍ଆଇ)ର ଗବେଷକ ଆଶିଷ ଦାଶ ଓ ସ୍ୱେଚ୍ଛାସେବୀ, ବନ କର୍ମଚାରୀ ୫ରୁ ୭ ମିନିଟ୍ ଧରି ସତର୍କତାର ସହ ଜାଲକୁ କାଟିଥିଲେ । ଜାଲର ଓଜନ ଆନୁମାନିକ ୧୦ କିଲୋଗ୍ରାମ ହେବ । ବେଳାଭୂମିରେ ଅଣ୍ଡାଦାନ କରି ଫେରିଥିଲା ମା’ କଇଁଛ ।
ଗବେଷକ ଆଶିଷ କହିଛନ୍ତି, ସଚେତନତା ଅଭାବରୁ ସମୁଦ୍ର କୂଳରେ ଏହା ନିୟମିତ ଦେଖାଯାଉଛି । ମତ୍ସ୍ୟଜୀବୀ ନଷ୍ଟ ଜାଲକୁ ସମୁଦ୍ର ଜଳରାଶିରେ ପକାଉଛନ୍ତି । ସେଠାରେ ବୁଲୁଥିବା ପ୍ରାଣୀ ଏଥିରେ ଛନ୍ଦି ହେଉଛନ୍ତି । ଅନେକ ସମୟରେ ମୁତ୍ୟୁ ମଧ୍ୟ ହେଉଛି । ଅଣ୍ଡାଦାନ ସମୟରେ ଅନେକ କଇଁଛ ଜାଲରେ ବନ୍ଦୀ ଅବସ୍ଥାରେ ଆସୁଛନ୍ତି । ଜାଲକୁ କାଟି ତାହାକୁ ମୁକ୍ତ ଅଣ୍ଡାଦାନ ପାଇଁ ଛାଡୁଛୁ । ଏହି କଇଁଛ ଦେହରେ ମାସେରୁ ଅଧିକ ହେବ ୧୦ କେଜିର ଜାଲଟି ଲାଗିଥିଲା । ୱାର୍ଲଡ୍ ୱାଇଡ୍ ଫଣ୍ଡ୍ ଫର୍ ନେଚର୍ (ଡବ୍ଲ୍ୟୁଡବ୍ଲ୍ୟୁଏଫ୍) ସଂଯୋଜିକା ସାଧ୍ୱୀ ସିନ୍ଦୁରା କହିଛନ୍ତି, ଗଣଅଣ୍ଡାଦାନ ସମୟରେ ଗଣନାରେ ନିୟୋଜିତ କର୍ମଚାରୀ ଓ ସ୍ୱେଚ୍ଛାସେବୀ ପ୍ରତିଦିନ ୫ରୁ ୭ କଇଁଛକୁ ଏହିପରି ଅବସ୍ଥାରେ ଦେଖୁଛନ୍ତି । ସେମାନେ ଏହାକୁ କାଟି ବାହାର କରିବା ସହ ବେଳାଭୂମିରୁ ଦୂରରେ ନେଇ ଜାଲକୁ ପକାଉଛନ୍ତି । ଅନେକ କଇଁଛଙ୍କୁ ସେମାନେ ଯନ୍ତ୍ରଣାମୁକ୍ତ କରୁଛନ୍ତି । ଏଭଳି କାର୍ଯ୍ୟକୁ ସେ ପ୍ରଶଂସା କରିଛନ୍ତି । ଏହାସହ ମତ୍ସ୍ୟଜୀବୀ ସତର୍କ ହୋଇ ସମୁଦ୍ରରେ ଏଭଳି ନଷ୍ଟ ଜାଲ୍କୁ ନ ଫିଙ୍ଗିବାକୁ ସେ ଆହ୍ୱାନ ଦେଇଛନ୍ତି ।
ଏହି ଖବରଟିକୁ ପଢନ୍ତୁ-ବିପଦରେ ଗଜରାଜ, ବର୍ଷକରେ ମରୁଛନ୍ତି ୮୧ ହାତୀ
