ନୂଆଦିଲ୍ଲୀ, ୨୯/୦୮: ଭାରତର ଏକ ଅନଲାଇନ୍ ଗେମିଂ କମ୍ପାନୀ A23 ଗୁରୁବାର ମନି ବେସ୍ଡ ଅନଲାଇନ୍ ଗେମ୍ ଉପରେ ସରକାରଙ୍କ ନିଷେଧକୁ ଚ୍ୟାଲେଞ୍ଜ କରି କର୍ଣ୍ଣାଟକ ହାଇକୋର୍ଟର ଦ୍ୱାରସ୍ଥ ହୋଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ସ୍ୱାକ୍ଷରିତ ହେବା ପରେ ଏହି ଆଇନ ବିରୋଧରେ କୋର୍ଟରେ ଦାଖଲ ହୋଇଥିବା ଏହା ପ୍ରଥମ ଆବେଦନ। ଏହି ଆଇନ ଗଠନ ହେବା ପରଠାରୁ, ଅନେକ ଅନଲାଇନ୍ ଗେମିଂ ପ୍ଲାଟଫର୍ମର ଲୋକପ୍ରିୟ ହଠାତ୍ କମିଯାଇଛି ଏବଂ ଅନଲାଇନ୍ ଗେମିଂ ଶିଳ୍ପର ଭବିଷ୍ୟତ ମଧ୍ୟ ଅନିଶ୍ଚିତ ହୋଇଯାଇଛି।
ସଂସଦରେ ଅନଲାଇନ୍ ଗେମିଂ ପ୍ରମୋସନ୍ ଏବଂ ରେଗୁଲେସନ୍ ବିଲ୍, ୨୦୨୫ ପାରିତ ହେବା ପରେ ଦେୟଯୁକ୍ତ ବା ମନି ବେସ୍ଡ ଅନଲାଇନ୍ ଗେମିଂ ବ୍ୟବସାୟକୁ ଏକ ଝଟକା ଲାଗିଲା। ଏହି ବିଲ୍ ଅନୁଯାୟୀ, ସମସ୍ତ ପ୍ରକାରର ମନି ବେସ୍ଡ ଅନଲାଇନ୍ ଗେମ୍ ଉପରେ ପ୍ରତିବନ୍ଧକ ଲଗାଯାଇଛି। ଅନ୍ୟପକ୍ଷରେ, ଇ-ସ୍ପୋର୍ଟସ୍ ଏବଂ ଅନଲାଇନ୍ ସାମାଜିକ ଖେଳକୁ ପ୍ରୋତ୍ସାହିତ କରାଯାଇଛି।
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅନୁମୋଦନ ପାଇବା ପରେ, ଏହି ବିଲ୍ ଏବେ ଆଇନରେ ପରିଣତ ହୋଇଛି। ଏହାର ଉଦ୍ଦେଶ୍ୟ ହେଉଛି ଏପରି ଆପ୍ ମାଧ୍ୟମରେ ବଢ଼ୁଥିବା ନିଶା କାରବାର, ମନି ଲଣ୍ଡରିଂ ଏବଂ ଆର୍ଥିକ ଠକେଇ ମାମଲାକୁ ରୋକିବା।
ବନ୍ଦ ହେଲା ଅନଲାଇନ୍ ମନି ବେସ୍ଡ ଗେମିଂ ପ୍ଲାଟଫର୍ମ-
ସଂସଦରେ ବିଲ୍ ପାସ୍ ହେବା ପରେ Dream11, My11Circle, WinZO, Zupee ଏବଂ Nazara Technologies-ସମର୍ଥିତ PokerBaazi ଭଳି ଅନଲାଇନ୍ ଗେମିଂ ପ୍ଲାଟଫର୍ମଗୁଡ଼ିକ ସେମାନଙ୍କର ଗେମିଂ ଅଫରଗୁଡ଼ିକୁ ବନ୍ଦ କରିଦେଇଛନ୍ତି।
କର୍ଣ୍ଣାଟକ ହାଇକୋର୍ଟରେ A 23 କଣ କହିଥିଲା ?
ରଏଟର୍ସର ଏକ ରିପୋର୍ଟ ଅନୁଯାୟୀ, A23 ହେଉଛି ଏକ ଗେମିଂ ପ୍ଲାଟଫର୍ମ ଯାହା ଅନଲାଇନରେ ରମ୍ମୀ ଏବଂ ପୋକର ଭଳି ଖେଳ ପ୍ରଦାନ କରିଥାଏ । କର୍ଣ୍ଣାଟକ ହାଇକୋର୍ଟରେ ହୋଇଥିବା ଏକ ଆବେଦନରେ A23 କହିଛି, "ଏହି ଆଇନ ଅନଲାଇନ୍ ଗେମ୍ ଖେଳିବାର ବୈଧ ବ୍ୟବସାୟକୁ ଅପରାଧ ବର୍ଗରେ ରଖେ। ଏହା ଯୋଗୁଁ, ଅନେକ ଅନଲାଇନ୍ ଗେମିଂ କମ୍ପାନୀକୁ ରାତାରାତି ବନ୍ଦ କରିବାକୁ ପଡ଼ିପାରେ।"
A23 ଏହାର ଆବେଦନରେ ଏହା ମଧ୍ୟ କହିଛି ଯେ, ନୂତନ ଆଇନ ହେଉଛି ରାଜ୍ୟ ମାଲିକାନା (State Paternalism) ହେବାର ମାନସିକତାର ପରିଣାମ। ଏହି ଆଇନ ରମ୍ମୀ ଏବଂ ପୋକର ଭଳି ଦକ୍ଷତା ଖେଳ ପାଇଁ ଲାଗୁ କରାଯାଇଛି, ଯାହାକୁ ଅସାମ୍ବିଧାନିକ ଘୋଷଣା କରାଯିବା ଉଚିତ। ତଥାପି ଆଇଟି ମନ୍ତ୍ରଣାଳୟ ଏପର୍ଯ୍ୟନ୍ତ ଏହି ବିଷୟରେ କୌଣସି ପ୍ରତିକ୍ରିୟା ଦେଇନାହିଁ।
